Ээлжит шог: Намууд нам хуйвалдаад байгаа учир баг гэдэг нэртэй болгоё

 

 

Ерөнхийлөгч Ц.Элбэгдоржийн санаачилсан Улс төрийн намын тухай хуулийн
төслийг Төрийн байгуулалтын байнгын хорооны хуралдаанаар хэлэлцэхийг
дэмжсэн билээ. МАН-ын гишүүд хэлэлцүүлгийг долоо хоногоор хойшлуулах
хүсэлт гаргасан ч олонхийн дэмжлэг аваагүй тул хуралдааныг орхин гарсан
ба ингэхдээ Д.Лүндээжанцан гишүүн нэлээд бухимдаж байсан юм.

Сөрөг
хүчний гишүүдгүйгээр Улс төрийн намын тухай хуулийн төслийн хэлэлцүүлэг
тийн болж өнгөрсөн. Байнгын хорооны гишүүд хуулийн төслийг хэлэлцэх
эсэхийг дэмжиж үзэл бодлоо илэрхийлэх үеэр Фортуна хэмээх Н.Батбаярын хэлсэн \”санал\” яах аргагүй \”Тэнгэрийн\” санаа байлаа. Өөрийгөө газрынхантай бус тэнгэртэй харьцдаг хэмээдэг түүний хувьд нам гэдгийг бас л бэлгэдлийн шинжтэй өөрчлөх хэрэгтэй гэж үзэж байгаагаа илэрхийлсэн нь олон хүний хувьд наргиа болж байгаа юм.

Тэрбээр
\”Улс төрийн намын тухай хуулийн өөрчлөлт зайлшгүй хэрэгтэй. тэр тусмаа
үг үсгийн хувьд ч өөрчлөх ёстой\” гэсэн. Н.Батбаяр \”Намын ойлголтыг юуны
өмнө зөв болгох ёстой бөгөөд нам гэдэг үгийн утгыг бодох хэрэгтэй, Нам
гэдэг нь нам эвсэж, сэм хуйвалдана гэсэн үгнээс гаралтай тул багийн
тоглолт гэдэг утгаар нь би хувьдаа нам гэдэг үгийг баг гэдэг
үгээр сольчихвол ямар вэ, үгээ солихоос эхэлье” гэсэн. Үүнийг сонссон
олон гишүүн инээдээ дарж ядан, зарим нь сайхан маазарч байна гэлцсэн.

Түүнийхээр бол намууд Ардчилсан баг, Монгол Ардын баг, Монгол Ардын
Хувьсгалт баг зэргээр нэрлэгдэх нь. Дэлхийд party хэмээх үг хэзээ ч баг
хэмээн орчуулагддаггүй, эртнээс нааш бүх улсад нам хэмээн яригдаж
бичигдэж ирснийг монголчууд л \”Тэнгэрийн бошгоор\” өөрчлөх нь л дээ. Энэхүү Н.Батбаярыг хуучин нөхөр нийтлэлч Б.Баабар нь \”мээк\” гэдэг. Үнэхээр ч ийм санал гаргаж байгаа хүн лав л \”цоо эрүүл\” биш мэт.

Тэгэхээр Н.Батбаярынхаар намуудаа баг болгоод багийн ахлагчаар нь түүнээс эхлээд \”нэр хүнд бүхий\” хүмүүсээ томилчихвол ч Монгол улс гараад өгөх юм байгаа биз дээ.

Ер нь энэ удаа хэлэлцүүлж эхлээд байгаа Улс төрийн намын тухай хуулийн төслийг АН-аас бусад бүх улс төрийн намууд эсэргүүцэж байгаа юм.
УИХ дээр жижиг намуудын эсэргүүцэл хол явахгүй гэдгийг саяхны
сонгуулийн хуулийг баталсан явц харуулсан. Гэхдээ АН энэ удаа олонхоороо
түрж батлахад бас хэцүү л дээ. Хамтрагч Шударга ёс эвслээс нь эхлээд
МАН-ын тоглолт асуудлыг хэрхэн шийдэхэд нөлөөлнө.

Тэгэхээр улстөрийн намын тухай хууль энэ удаагийн УИХ-ын үед шинэчлэгдэн батлагдахгүй л болов уу.