\”Ч.Сайханбилэг Оюутолгойн асуудлаар түүхэн хариуцлагаас мултарч чадахгүй\”

 

 

УИХ-ын гишүүн Г.Уянга, Ц.Даваасүрэн нар өнгөрсөн долоо хоногт хэлэлцсэн Ерөнхий сайдыг огцруулах эсэх асуудал болон түүнтэй холбоотой Оюутолгойн асуудлаар мэдээлэл хийсэн.

Тэрхүү мэдээлэлд \”Өнгөрсөн долоо хоногт нилээд удаан хугацаанд цуглуулсан гарын үсэг бүрдээд Ерөнхий сайдыг огцруулах асуудлыг хэлэлцлээ. Энд Засгийн газар унаагүй учраас бид ялагдсан юм шиг хүлээж авах хэрэггүй. Энэ бол тодорхой үр дүнтэй үйл ажиллагаа болсон гэж бодож байгаа. Нэгдүгээрт, Оюутолгойн эдийн засагт үзүүлэх үр нөлөө, яагаад бид Оюутолгой, Дубайн гэрээний асуудлаар Засгийн газрыг огцруулах асуудлыг өргөн барьсныг ард иргэд ойлгосон байх гэж бодож байна.

Гэхдээ УИХ Засгийн газрыг огцруулах асуудлыг нилээд өндөр хувьтай хэлэлцэж Дубайн гэрээний асуудлыг ингэж чухлаар ярьсан нь тодорхой хэмжээний үр дүн авчирна гэж бодож байна. Дубайн гэрээгээр авсан 6.8 тэрбум долларыг манай хойч үе маань төлнө. Ийм гэрээ байгуулсныхаа төлөө Засгийн газар огцрох ч багадна.

Эрүүгийн хариуцлага хүлээх ёстой. Өнгөрсөн долоо хоногт огцрохоос бултаж амжсан ч гэсэн Ч.Сайханбилэгийн Засгийн газар түүхэн хариуцлагаас мултарч чадахгүй гэж хэлмээр байна. Мөн өнгөрсөн долоо хоногт Ерөнхий сайдыг огцруулах асуудлыг хэлэлцсэн тэр чуулган бол эрх баригчдад хатуу сануулга өгсөн. Яг үнэндээ, УИХ-ын олонхи нь Засгийн газрыг сайн ажиллаж байгаа гэж авч үлдээгүй. Эрх баригч Ардчилсан нам гишүүдийг бүгдийг нь тойргоор нь барьцаалж эерэг санал өгүүлсэн. Тэрнээс ямар нэг барьцаагүй бол Ч.Сайханбилэгийн Засгийн газрыг огцруулах санал УИХ-д давамгайлж байсан. Нөгөө талаас \”Шударга ёс” эвсэл албан тушаалын барьцаа хийж гишүүдээ базсан. Тийм учраас энэ Засгийн газар барьцаатайгаар, ихээхэн хүнд нөхцөлд үлдсэн гэдгийг хэлэх хэрэгтэй. МАН бол элдвээр хэлүүлж доромжлуулсан боловч хойч үедээ хэрэгтэй түүхэн шийдвэр гаргахад нөлөө бүхийн оролцоотой байсныг хэлье. Бас их зарчимтай, байр сууриндаа хатуу, зөв зүйлд зангидагдаж саналаа өгсөн МАН-д талархалаа илэрхийлэх ёстой\” гэсэн юм. Өөрөөр хэлбэл, Г.Уянга гишүүн Ерөнхий сайд Ч.Сайханбилэг албан тушаал болон Засгийн газраа авч үлдсэн ч тэрбээр Монголын хойч үед хохиролтой Оюутолгойн гэрээний асуудлаарх түүхэн хариуцлагаас мултарч чадахгүй\” хэмээсэн юм. Ерөнхий сайд Ч.Сайханбилэг Оюутолгойн ордыг Лондон болон Дубайд Монгол Улсад ашиггүй, ганц нэг хүнд ашигтай байдлаар наймаалцсан гэх бөгөөд \”хэрэг хуучирдаггүй\” гэдгийг Г.Уянга гишүүн сануулсан юм.  

 

Нинж