Монгол Улс Ази-Номхон далайн бүс нутгийн улс орнууд руу бараа бүтээгдэхүүнээ экспортлохын тулд Алс дорнодийн хязгаарын бүс нутагт далайд гарах өртөө байгуулахыг зорьж байгаа тухай тус хязгаар нутгийн засаг захиргааны хэвлэлийн албанаас мэдээлжээ. “Манай улс өдгөө бараа бүтээгдэхүүнээ ихэвчлэн Хятад руу экспортолдог хэдий ч гуравдагч зах зээлд гарахын тулд далайд гарцтай болохыг хүсч байна. Үүний тулд бидэнд эхний тээвэрлэлтийг зохион байгуулахын тулд далайн боомтыг эрж хайх, шинэ өртөө барьж байгуулах эдэлбэр газрыг сонгоход та бүхний дэмжлэг хэрэгтэй байна” гэж Монгол улсын Гадаад харилцааны дэд сайд Б.Батцэцэг Алс дорнодийн хязгаар нутгийн амбан захирагчийн үүргийг түр орлон гүйцэтгэгч Андрей Тарасенкотой уулзах үеэрээ хэлсэн байна.
Амбан захирагч А.Тарасенко энэ үеэр Монгол улстай хамтран ажиллахад бэлэн байгаагаа илэрхийлэхийн сацуу Алс дорнодийн хязгаарын ачаалал багатай тэнгисийн аль нэгэн боомтод туршилтын тээвэрлэлт хийж үзэхийг санал болгожээ. Монголын ачааг Оросын боомтуудаар дамжуулан тээвэрлэх нь хоёр улсын нутаг дэвсгэр хоорондын стратегийн түншлэлийн хөгжлийн хөтөлбөрт багтсан зорилт бөгөөд энэхүү зорилтыг хэрэгжүүлэхийн тулд хоёр улсын Засгийн газар дамжин өнгөрөх тээвэрлэлт болон хилийн хамтын ажиллагааг хөгжүүлэх нөхцөлүүдийн тухай хэлэлцээр байгуулах төлөвтэй байна.
