“Олон улсын хүүхдийн эрхийг хамгаалах өдөр”-ийг тэмдэглэн өнгөрүүлэх хүрээнд НМХГ-аас энэ сарын 7-ны өдрөөс эхэлж зах худалдааны төв, сүлжээ дэлгүүр, жижиглэн худалдаа эрхэлж буй дэлгүүрүүдэд борлуулж буй хүүхдийн бэлгэнд урьдчилан сэргийлэх хяналт шалгалт хийж байна. Тус хяналт шалгалтын явцын талаар өнөөдөр мэдээлэл өглөө.
Одоогийн байдлаар 9 дүүргийн 110 аж ахуйн нэгж, 73 иргэний хүнсний худалдаа, үйлчилгээний газарт хяналт, шалгалт хийж, нийт давхардсан тоогоор 219 зөрчил илрүүлэн 164 буюу 74.8 хувийг газар дээр нь арилгуулах арга хэмжээг авч, илэрсэн зөрчлийг арилгуулахаар улсын байцаагчийн 42 заалт бүхий 9 албан шаардлага, 1 албан даалгавар хүргүүллээ.
Шошгын шаардлага хангаагүй 28 нэрийн 5 кг, 2145 ширхэг, 5.500.000 төгрөгийн хүнсний бүтээгдэхүүнийг хүнсний сүлжээнээс татан авалт хийлгүүлж, хадгалалтын горим зөрчсөн, хадгалах хугацаа дууссан 27 нэрийн 527 ширхэг, нийт 260.850 төгрөгийн хүнсний бүтээгдэхүүнийг улсын байцаагчийн акт тогтоон устгуулж, 24 аж ахуйн нэгж, иргэнд Зөрчлийн тухай хуулийн холбогдох заалтаар 7.350.000 мянган төгрөгийн шийтгэврийн арга хэмжээ тооцлоо. Жишээлбэл, 2013 онд хугацаа нь дууссан чихэр, үнэр орсон гурилан бүтээгдэхүүн болох сүүтэй тэргүүн хүртэл зарж байсныг илрүүлжээ.
Шалгалтын явцад 52 нэр төрлийн хүнсний бүтээгдэхүүний чанар, аюулгүй байдалд дүгнэлт өгөх зорилгоор дээж авч Нийслэлийн мэргэжлийн хяналтын газрын Нэгдсэн төв лабораторид шинжлүүлж байна.
Дэлхийн нийтийн тамхины эсрэг өдөр тавдугаар сарын 31, Эх үрсийн баяр буюу зургадугаар сарын 1-ний өдөр Сүхбаатарын талбай, Үндэсний соёл амралтын хүрээлэн, Үндэсний цэцэрлэгт хүрээлэн зэрэг нэгдсэн өдөрлөг зохион байгуулагдах газруудад нийт 150 албан хаагч ажиллана.
