![\"\"](http://undesten.mn/uploads/posts/2016-02/1455845443_3567458d003a7437original.jpg "\\"\\"")
Иргэн Э.Цэрэндолгор нь уржигдар БСШУЯ-ны Стратеги бодлого хариуцсан газрын дарга Б.Насанбаяртай холбоотой өргөдлөө холбогдох байгууллагуудад өгсөн билээ. Түний энэхүү мэдээллийн дагуу БСШУЯ-наас мэдэгдэл гаргажээ.
МЭДЭГДЭЛ
Боловсрол, соёл, шинжлэх ухааны яам, 2012 оноос хойш амжилттай хэрэгжиж байгаа Эрдэм боловсролтой Монгол хүн, Зөв Монгол хүүхэд үндэсний хөтөлбөр, сургуулийн өмнөх, бага, дунд, дээд боловсролын салбарт үе шаттайгаар хэрэгжүүлж байгаа чанарын шинэчлэл нь аль нэг шашны нөлөөгүйн дээр тусгаар улсын бүх нийтийн боловсролын бодлогод шашны үзэл баримтлалыг тусгаж, түүгээр дамжуулан түгээн дэлгэрүүлэх ямар ч боломжгүй гэдгийг нийт интернэт хэрэглэгчиддээ сануулж байна.
СӨБ-ын сургалтын цөм хөтөлбөр: http://www.meds.gov.mn/data/SOBtsum.pdf
Бага боловсрлын сургалтын цөм хөтөлбөр: http://www.meds.gov.mn/data/1409/Tsum_booklet.pdf
Суурь боловсролын сургалтын цөм хөтөлбөр http://www.meds.gov.mn/data/Suuritsum.pdf
БСШУЯ-ны 2015 онд хийсэн ажлын тайлан: http://www.meds.gov.mn/REPORT
Ойрын өдрүүдэд иргэн Э.Цэрэн өөрийн фэйсбүүк хуудсаараа дамжуулан олон нийтэд хандаж Боловсрол, соёл, шинжлэх ухааны яамны Стратегийн бодлого төлөвлөлтийн газрын даргын тухай болон БСШУЯ, түүний харьяа байгууллагууд, төрийн болон төрийн бус өмчийн цэцэрлэг, ЕБС, их, дээд сургууль, коллежуудын хамтран хэрэгжүүлж байгаа чанарын шинэчлэлийн бодлого, хийж хэрэгжүүлж буй ажлыг Мүүний шашин, шашны гаж урсгал гэх зүйлтэй шууд холбон тайлбарлаж, олон нийтийн санаа бодлыг зориудаар төөрөгдүүлж байна. Үүнд:
• Боловсрол шинэчлэх нэрээр бүх шатны нэгжийг задалсан. Одоо их сургуулиудыг хувьчлах хуулийн төсөл явж байна.
–УИХ-д өргөн бариад буй Дээд боловсролын тухай хуулийн нэмэлт өөрчлөлтөд төрийн өмчийн их сургуулийг хувьчлах тухай нэг ч заалт ороогүй. Харин их сургуулийн үйл ажиллагааг улс төрийн нөлөллөөс ангид байлгах, өөрөөр хэлбэл удирдах зөвлөлийн 60 хувийг эзэлдэг байсан төрийн өндөр албан тушаалтан, албан хаагчийн тоог хоёр дахин бууруулж, төрийн албан хаагч биш хараат бус төлөөллийг 40 хувьд хүргэхээр тусгасан.
• Зөв, зүгээр хэрэглэгдэж байсан Монгол хэлээр оролдож үсэг хасан, үгэнд өөрчлөлт оруулсан.
– 2011 оны 10-р сарын 05-нд тухайн үеийн БСШУ-ны сайд Ё.Отгонбаярын гарын үсэг зурж баталгаажуулсан Төрийн хэлний зөвлөлийн тогтоолоор эргэлзээтэй бичигддэг 700 үгийг журамласан. Түүнээс хойш ямар ч үг, үсгийн бичигдэх, хэрэглэгдэх дүрэмд өөрчлөлт оруулаагүй.
• Яахаараа Солонгос хүн Монгол хэлний сурах бичиг зохиох болов?
– Ор үндэсгүй, ташаа мэдээлэл. Иргэн Э.Цэрэн Улаанбаатар их сургуулийн Солонгос багшийн гаргасан Монгол хэлний тайлбар толийг сурах бичиг гэж андууран боловсролын байгууллагуудад одоо хэрэглүүлж байгаа гэж хардсан бололтой. Энэ нь БСШУЯ-д огт хамааралгүйн дээр төрийн болон төрийн бус өмчийн ЕБС-ууд БСШУЯ-ны хэрэгжүүлж буй бодлогын дагуу Боловсролын хүрээлэнгийн эрдэмтдийн эрхлэн гаргадаг сурах бичгүүдийг сургалтдаа ашиглаж байна.
• Уран зохиолын хичээлийг сургалтын хөтөлбөрөөс хасах оролдлого хийсэн.
– МҮОНТ-ийн Монголын мэдээ агентлаг, сурвалжлагчийн алдаатай үйлдлээс болж нийгэмд ташаа мэдээлэл түгээсэн нь шүүхээр тогтоогдож \”ММ” агентлаг албан ёсоор уучлал хүссэн.
Иймд интернэт хэрэглэгч иргэд, ялангуяа сэтгүүлчид, хэвлэл мэдээллийн байгууллагууд иргэн Э.Цэрэнгийн цахим орчинд удаа дараа нийтэлж, нийтлүүлж байгаа дээрх мэдээллүүдийн үнэн худлыг нягталж, судлан, сэтгүүлчийн болон, сэтгүүлзүйн ёс зүйн дүрэм, холбогдох хуулийг чандлан сахиж, соён гэгээрүүлэх үндсэн үүргээ нэр төртэйгөөр биелүүлэхийг хүсье.
БОЛОВСРОЛ, СОЁЛ, ШИНЖЛЭХ УХААНЫ ЯАМ
