Зуун айлын барилгын материалын захыг нүүлгэн шилжүүлэх ажил хийгдэж байгаа. Энэхүү ажлын явцын талаар НИТХ-ын төлөөлөгч, Зуун айлын БМЗ-ыг нүүлгэн шилжүүлэх ажлын хэсгийн ахлагч Ч.Гантулгатай ярилцлаа.
-Зуун айлыг нүүлгэх ажлын эхний шатны үйл ажиллагаа хийгдэж байгаа. Ер нь үр дүн ямар байна вэ?
-Зуун айл дахь ил задгай худалдааг цэгцэлсэн байгаа. Ил задгай худалдаа нийслэлийн холбогдох ном дүрмүүдийг зөрчиж байсан. Харин мэргэжлийн хяналтын байгууллага газар дээр нь сайн ажилласны үндсэн дээр ил задгай худалдааг зогсоосон. Нэгдүгээр шатны үйл ажиллагааг өмнө нь бид ярьж байсан. Зуун айл орчимд сүүлийн 15 жилийн хугацаанд ямар асуудал бугшсан байсныг нийслэлийн иргэд бүгд мэдэж байгаа. Энэ асуудлыг нэгдүгээр шатандаа цэгцэлсэн. Өнөөдөр сургууль, цэцэрлэг, эрүүл мэндийн байгууллагууд ямар нөхцөл байдалд үйл ажиллагаа явуулж байсныг бүгд мэднэ. Энэ асуудал үндсэндээ шийдэгдээд явж байна. Мөн байгаль орчин болон хөрсний бохирдол дээр нэлээд хүнд байсан. Хог хаягдал маш их байсан. Нэгдсэн 00 буюу ариун цэврийн өрөө байхгүй байдлаас болж гудамж талбайд бие засах байдал их гарч байсан. Үүнийг шийдсэн.
-Одоо үйлдвэрүүдийг нүүлгэнэ гэж байна. Хэзээнээс нүүлгэх вэ?
-Ажлын хэсгийн хурал дээр үйлдвэрүүдийн зарим төлөөллүүдтэй уулзсан. Дүүргүүд үйлдвэрүүдийг шилжүүлж нүүлгэх асуудлыг ярьж байгаа. Зарим дүүрэг боломжтой, зарим нь боломжгүй гэсэн хариултыг өгсөн. Налайхад үйлдвэр технологийн паркийг барьж ашиглалтад оруулна. Ингээд зуун айлыг ирэх есдүгээр сар гэхэд Налайх уруу нүүлгэнэ.
-Зуун айлыг нүүлгэсний дараа энд ямар бүтээн байгуулалт хийгдэх вэ. Дахин төлөвлөлтийг гаргасан байгаа юу?
-Ажлын хэсгийн хүрээнд нийслэлийн ерөнхий төлөвлөгөөний газартай хамтарч ажиллаж байгаа. Гэр хороолол дахин төлөвлөлт, дэд бүтцийн хөгжлийн газар гэж байгаа. Энэ газартайгаа хамтарч ажиллаж байгаа. Эдгээр газрууд юу хийх вэ гэхээр хэдэн жилийн өмнө яригдаж эхэлсэн дахин төлөвлөлтийн асуудлыг нарийвчилсан байдлаар хийнэ. Энд бизнес эрхэлж байгаа худалдаачид болон иргэд Ерөнхий төлөвлөгөөний газартай хамтарч ажилласны үндсэн дээр барилга байшингаа барих, шинэ үйлчилгээний төвүүдийг бий болгох ажлууд хийгдээд явна.
-Одоо ямар ажил хийхээр төлөвлөгдөж байна вэ?
-Бид гурван шаттай ажиллаж байгаа. Нэгдүгээр шатны ажил үндсэндээ дуусч байна. Одоо хоёрдугаар шатны ажил болох дэд бүтэц, зам тохижилтын ажлыг хийж эхэлнэ. Нийслэлийн иргэдийн төлөөлөгчийн хурал болон тэргүүлэгчдийн хурал дээр саналуудыг оруулсан. Тохижилт, замын ажил энэ зун хийгдэж ирэх есдүгээр сарын 1-ний өдөр гэхэд ашиглалтад оруулахаар зорьж ажиллаж байна.
-Зуун айл дахь ил задгай худалдааг зогсоосноор замын хөдөлгөөний ачаалал буурсан уу?
-Замын хөдөлгөөний ачаалал 40-өөд хувиар буурсан. Учир нь хоёр сарын өмнөөс Иргэний бүртгэл мэдээллийн төвийн гадаад паспортын олголт болон тодорхойлолт авдаг газруудыг дүүрэг рүү шилжүүлсэн байгаа. Мөн замын хоёр талын ил задгай худалдааг зогсоосон учраас замын хөдөлгөөнд тодорхой өөрчлөлт орсон. Одоо Зуун айлд ил задгай худалдаа байхгүй болсон. Энэ мэт олон үр дүн гарч байна.
–Ажлын хэсэг өнгөрсөн нэгдүгээр сарын 24-нд байгуулагдаж,өнгөрсөн хугацаанд иргэдтэйгээ дөрвөн удаа уулзсан. Харин иргэдийн хувьд мэдээлэл багатай байна. Хаашаа нүүхээ мэдэхгүй байгаа ч хүмүүс байна?
-Бид Зуун айл дээр нүдээ аниж өнгөрөөж чадаагүй. Асуудлыг шийдэж, иргэдийнхээ ая тухтай байдлыг хангахын төлөө ажиллаж байна. Зохион байгуулалттай, үе шаттай ажлуудаа хийгээд явж байгаа. Өнөөдрийн байдлаар иргэдэд учирсан хохирол байхгүй. Иргэд зориулалтынхаа ажлын байран дээр худалдаа наймаагаа эрхлээд явж байгаа. Бидний гол зорилго Зуун айлын орчинд сайхан тохижуулалт хийж, дахин төлөвлөлтөө явуулах, үйлчилгээний газруудаа шинэчилж сайжруулахаар ажиллаж байна. Иргэд энэ асуудал дээр хүлээцтэй хандах байх. Бид түрээслэгч нартай уулзаж хамтарч ажиллана гэдгээ ярьсан. Одоо бид хоёрдугаар шатны үйл ажиллагааг эхлүүлж байна. Үүний дараа дахин төлөвлөлт хийнэ. Аливаа ажлыг хийж эхлэхээр асуудал байдаг. Бид нар асуудлаас айхгүй. Нүүр тулж уулзаж, асуудлыг шийдэхээр ажиллаж байна.
-Зуун айлын худалдааны төвд 400 гаруй үйлдвэр 800 гаруй худалдаа эрхлэгчид байгаа. Эдгээр худалдаа эрхлэгчдийн эрх ашгийг зөрчихгүйгээр асуудлыг шийдэх боломжтой гэж ойлгож болох уу?
-Хотын хөгжлийн бодлогоор явуулдаг хөтөлбөрийн дагуу хөрөнгө оруулалтаа хийгээд дагуул хотыг байгуулаад явах нь зөв. Нийслэл хөгжих зөв бодлогоо гаргах хэрэгтэй. Бид Налайх дүүрэгт үйлдвэр технологийн паркаа байгуулж байгаа. Хэн нэгэнд хүндрэл учруулж, хэн нэгний үйл ажиллагааг боомилох асуудал биш. Төлөвлөгөөний дагуу хийгдээд явна.
-Эдгээр хийгдэх ажлуудын төсөв мөнгө шийдэгдсэн үү. Хэдэн төгрөг зарцуулагдаж байгаа вэ?
-Нийслэлийн автозамын хөгжлийн газар болон Ерөнхий төлөвлөгөөний газар урьдчилсан зураг төсвөө гаргаж байгаа. Зуун айлын ажлын урьдчилсан зураг төсөв нь хийгдээд дуусч байна. Иймээс ном журмынхаа дагуу танилцуулаад, төсөв мөнгө шийдээд явна.
