Д.Гантулга, Д.Мурат нарын бүрэн эрхийг түдгэлзүүлэх үндэслэлгүй гэв

УИХ-ын чуулганы хуралдаанаар УИХ-ын гишүүн Д.Гантулга, Д.Мурат нарын бүрэн эрхийг түдгэлзүүлэх асуудлыг өчигдөр хэлэлцэж,УИХ-ын гишүүн Д. Муратын бүрэн эрхийг түдгэлзүүлэх эсэх асуудлаар чуулганы хуралдаанд оролцож буй гишүүдийн дунд нууц санал хураалт явуулсан юм.
Санал хураахад хуралдаанд оролцсон нийт 57 гишүүний 33 нь УИХ-ын гишүүн Д. Муратын бүрэн эрхийг түдгэлзүүлэх шаардлагагүй гэж үзсэн.
Харин ИХ-ын гишүүн Д.Гантулгын бүрэн эрхийг түдгэлзүүлэх асуудлыг хэлэлцэж, мөн нууц санал хураалтыг явуулсан. Санал хураахад хуралдаанд оролцсон нийт 57 гишүүний 29 гишүүн буюу 50,9 хувь нь УИХ-ын гишүүн Д. Гантулгыг бүрэн эрхийг түдгэлзүүлэх шаардлагагүй гэж үзсэн байна.
Хэлэлцэж буй асуудалтай холбогдуулан УИХ-ын гишүүд байр сууриа илэрхийлсэн юм.
УИХ-ын гишүүн А.Ундраа: Хүний эрхийг хүндэтгэх байх, сонголтоо ухаалаг хийх байх гэж найдаж байна. Эдгээр тохиолдол нь УИХ-ын гишүүдийн дотор эмэгтэй гишүүдийн тоог нэмэх шаардлагатай болжээ гэдгийг харуулж байна.
УИХ-ын гишүүн М.Билэгт:Эрчүүд та нар эхээс төрсөн, эхнэртэй, охидтой шүү дээ. Эрчүүдийн хүчний дор охид, эмэгтэйчүүд үнэхээр өрөвдмөөр шүү. УИХ-ын гишүүнээс түдгэлзүүлээгүй байхад энэ хүнд захиргааны шийтгэл ногдуулах боломжгүй байдаг гэж Ц.Нямдорж гишүүн хэлж байсан. Д.Гантулга залуу хүн, хийгээгүй гэдгээ нотлоод гараад ирэг л дээ. Залуусын нэр хүнд цаашдаа ямар байх вэ гэдэг нь эндээс харагдаж байна. Залуугаараа төрийн түшээ болчихоод хүчирхийллийн гэмт хэрэгт орчихоод, хийгээгүй бол түүнийгээ нотлох боломжийг нь олгох ёстой. Та бүхэн эхнэрүүд, охин хүүхдээ, эхнэрүүдээ бодож шийдвэр гаргаач ээ.
ИХ-ын гишүүн Л.Болд:
Улс төрийн шийдэл рүү явчих вий гэж харж байна. Парламентын түүхэнд гишүүний эрхийг түдгэлзүүлсэн тухай ярьж байгаа нь үнэн. С.Зориг агсныг хөнөөсөн хэргийн улмаас тэр аймшигт асуудлыг хөндөн ингэж хэлэлцэж байсан. Өнөөдөр Прокурорын тухай хуулийн 49 дүгээр зүйлийг яагаад дагаж мөрдөхгүй орохгүй байна вэ. Энэ зүйлийн дагуу Улсын ерөнхий прокурор жилд нэгээс доошгүй удаа мэдээлэл хийх ёстой. Үүнийг дагаж мөрдөх, байнга мэдээллээр хангаж, харилцаатай байх ёстой. Нөгөөтэйгүүр улс төрийн зорилготой үйл ажиллагаа байх вий гэсэн эргэлзээ байгаатай санал нэг байна. Улсын ерөнхий прокурорын нүүрийг өнөөдөр л энэ асуудлаас болж нүүр харж байна. Хуулийн байгууллага шалгаж байгаа гэж ам тагладаг. Тэр байгууллагатай шууд харилцаж зөв мэдээлэл олж авдаг баймаар байна. Тэгж байж зөв шийдвэр гаргана.
УИХ-ын гишүүн Ц.Цогзолмаа:
-Парламентын ёс зүйн хэм хэмжээ, мэргэжлийн ёс зүйг дагаж ажиллах хэрэгтэй. Парламентын гишүүд мэргэжлийн үүднээс эрх зүйт төрд ажиллаж зөв шударга нийгмийн төлөө ажиллаж байна. Энд хувь хүний алдаа гаргах эрх байхгүй. Ёс зүйн алдаа гаргасан энэ хүнийг өмөөрөх боломжгүй. Парламентад насны босго тогтоох ёстой энэ сайн жишгийг цаашид парламентыг төлөвшүүлэхэд хэрэглэхэд болохгүй гэж зүйлгүй. Нэг хүний эрх ашиг нийтийн эрх ашгаас үргэлж дор байдаг. Тиймээс нийтийн эрх ашгийг хүндэлж хууль ёсоор шалгуулах нь зүйтэй гэж үзэж байна.