Зүүн гурван аймагт хэн, хэн нэр дэвших вэ?

Сонгууль дөхөж, хаана хэн нэр
дэвших вэ гэсэн асуудалд олон нийт анхаарлаа хандуулж эхэллээ. АСЕМ-аас шалтгаалж, цаг хугацааны хувьд
өөрчлөлт орж магадгүй байсан ч эцсийн шийдэлд хүрч, сонгуулийг зургаадугаар
сарын 29-ний явуулдагаараа явуулахаар болсон.

 

Мөн 2012 оных шиг холимог
тогтолцоогоор энэ удаагийн сонгууль явагдана. Өөрөөр хэлбэл сонгогч нам болон
хувь хүн гэсэн хоёр сонголтыг хийх юм. Нэр дэвшигч зургаа дугаар сарын 10-ны
өдөр үнэмлэхээ гардан авч, сурталчилгаагаа эхлүүлэх эрх нээгдэх тухай энэ
удаагийн сонгуулийн хуульд заажээ.

Тэгэхээр 27-ны өдөр сонгуулийн
сурталчилгаа хаах хүртэл 17 өдөр өөрийгөө сонгогч түмэндээ сурталчлан таниулах
эрхтэй болж байгаа юм. Эндээс харахад нэр дэвшигчид шахуу хугацаанд \”өндөр
идэвхтэй”-ээр ажиллах шинжтэй. Үүнээс болж зарим сонгуулийн хороо хэсгүүдэд нэр
дэвшигчдийн мэдээ, мэдээлэл хүрэхгүй ч байх мадаглалтай байгаа юм.

Тиймээс хашир улс төрчид, нэр
дэвших нь тодорхой болсон горьлогчид эртнээс нууцхан сурталчилгаагаа эхлүүлээд
байгаа юм. Уг нь сонгуулийн хуулиар нэгдүгээр сарын нэгнээс нэр дэвших
үнэмлэхээ гардан авах хүртэл сурталчилгаа хийхийг хориглосон байдаг. Гэвч УИХ
дахь намууд дөрвөн жилийн ажлаа тайлагнах нэрээр далдуур сурталчилгаагаа
эхлүүлчихдэг нь нууц биш. Мөн нэр дэвшихээр горьлогчид ч нэгдүгээр сарын
нэгнээс өмнө амжиж, тойргийнхоо айл өрхөд календарь, мөнгөн аяга, алтадсан
зоос, усны битон, утасны нэгж зэргээ тараагаад амжуулжээ. Одоо тэд үнэмлэхээ
гардан авах өдрийг хүртэл \”нууцаар” сурталчилгаагаа хийнэ.

Тэгвэл тэднийг сурталчилгаагаа
эхлүүлэхээс өмнө УИХ-ын сонгуулийн тойрогуудад хэн хэн нэр дэвшихээр горьлож
байгаа эрхмүүдийг зүүн гурван аймгаас эхлэн танилцуулья.

Дорнод аймаг

 

Тус аймагт одоо УИХ-ын
гишүүнээр ажиллаж байгаа МАН-ын Н.Номтойбаяр, бие даагч Х.Болорчулуун нараас
гадна УИХ-ын гишүүн, Зам тээврийн сайд АН-ын гишүүн М.Зоригт нар нэр дэвшихээ
мэдэгдээд байгаа. Тэдэнтэй зуузай холбохоор МАН-аас Дорнод аймгийн Засаг дарга
М.Бадамсүрэн, АН-аас УИХ-ын гишүүн, Хүнс, хөдөө аж ахуйн сайд Р.Бурмаа, Дорнод
аймгийн Ардчилсан намын дарга Д.Цэрэнчимэг нарын нэрс яригдаж байна.

Сүхбаатар аймаг

 

Сүхбаатар аймгаас УИХ-ын гишүүн
Ч.Улаан, аймгийн Засаг дарга Ж.Батсуурь, Монголбанкны тэргүүн дэд Ерөнхийлөгч
асан Б.Жавхлан нар нэр дэвших нь тодорхой болсон. Тэднээс гадна УИХ-ын гишүүн
асан Р.Будын нэр яригдах боллоо.

Хэнтий аймаг

Хэнтий аймагт нэр дэвшихээр
санаархаж буй хүмүүс маш олон байна. Эхнээс нь дурьдвал, УИХ-ын гишүүн, Дархан
аварга Б.Бат-Эрдэнэ, УИХ-ын гишүүн Б.Гарамгайбаатар, Аймгийн Засаг дарга
Ж.Оюунбаатар, Шадар сайд асан У.Хүрэлсүх, УИХ-ын гишүүн асан Н.Ганбямба,
НАМЗХ-ны ерөнхийлөгч асан Л.Оюун-Эрдэнэ, \”Их Засаг” сургуулийн захирал
Ням-осорын хүү Учрал, ИЗНН-ын Ерөнхий нарийн бичгийн дарга Б.Хүдэр-Ян зэрэг
хүмүүсийг нэр тодроод байгаа. Тохироо хэрхэн бүрдэн хэн хэн нь нэрээ татаж,
шинээр хэн нэрээ дэвшүүлэх вэ гэдэг нь одоогоор тодорхойгүй байна.   Үргэлжлэл бий.

 

 

А.Аюуш