В.Дамдинсүрэн: Явган аялалд гараад 1375 км туулаад байна

$\"\"$ Монгол Улсын хилийг тойрон явган аялж буй бэлтгэл хурандаа В.Дамдинсүрэнтэй Хилийн 0131 дүгээр ангийн Жаалшандын заставын хэсэгт явахад нь утсаар холбогдлоо. Аяллын сонин сайхан хийгээд хүндрэл бэрхшээл юу байгааг \”Эх орны манаа” сонины редакци ийнхүү тодруулсан юм.

-Сайн явж байна уу. Яг одоо хаана явж байна даа?

-Сайн явж байна. Бие сайн, аялал амжилттай үргэлжилж байна. Хилийн 0131 дүгээр ангийн Жаалшандын заставт хүрэхийн тулд өмнөх цэгээсээ есөн цагийн туршид алхан ирлээ. Тойрон аялалд гараад нийт 50 хонож байна. Энэ хугацаанд нийт 1375 км явжээ. Хилийн отярдын 30 гаруй заставаар орсон байна. Заставт ер нь нэг л хонож байгаа. Хилийн 0131 дүгээр ангийн таван хилчин цуг яваагаас гадна нэг тамирчнаар бүл нэмсэн сайхан мэдээтэй явна. Өмнөговийн төвөөс 18 настай Энхбаяр гэх залуу надтай цуг аялахаар болсон. Бид нэг багшийн шавь нар байгаа юм.

-Өдөрт нийт хэдэн км орчим явж байна вэ?

-Тогтмол 30-35 км алхаж байна. Ачаалалтай үед 45 км хүртэл алхах нь бий. Тамирчид формондоо орчихсон гэж ярьдагтай адил одоо явдалдаа дадсан. Цагт дунджаар 6-7 км алхаж байгаа.

-Говь нутгаар цаг агаар ямар байна вэ?

-Цасгүй ч хавар цаг ирсэн болохоор салхитай байна. Манай орон ихэвчлэн баруун хойноосоо салхилдаг шүү дээ. Тиймээс салхи сөрж голдуу алхаж байна.

-Сонирхож асуухад таны аяны үүргэвч хэдэн кг жинтэй вэ?

-Аяллын үүргэвч маань нийт 35 кг жин татна. Гэхдээ байнга үүрч алхах юм бол маш их ачаалал авч сульдах учраас хамт яваа багийнхантайгаа хуваах, заримдаа машинд ойр зуур хэрэглэхгүй эд зүйлээ хийх зэргээр тэнцвэржүүлж явна.

-Одоо та хаашаа хөдлөх гэж байна вэ?

-Нэг цаг орчмын дараа заставын байрлалаас хөдлөх гэж байна. Дараагийн застав хүртлээ нийт гурван хоног хээр хонохоор төлөвлөөд байгаа. Ер нь Овоотын отрядод тав хоногийн дараа очихоор төлөвлөж байна.

$\"\"$

-За таны аян зам өлзийтэй байх болтугай. Эргээд сонин сайхнаараа холбогдоё?

-Баярлалаа. Хил хамгаалах байгууллагын бэлгэдлийн тугийг хилийн отряд, застав, харуулаар аялуулахын зэрэгцээ Нийгмийн эрүүл мэндийн хүрээлэнгээс өгсөн тараах материалыг хилчиддээ хүргэж байгаа. Ер нь бэлтгэл сайтар хангасан болохоор дутагдах зүйлгүй сайн явж байна. Миний аюулгүй байдалд анхаарч хоол хүнс, эмнэлэг үйлчилгээ гээд бүхий л зүйлд сэтгэл зүрхээрээ хамт байгаа нийт хилчиддээ баярлалаа. Аялагчдын сэтгэлийг хамгийн ихээр түгшээдэг асуудлуудыг ийнхүү хилчид минь шийдэж бат найдвартай ар тал болж байгаа учраас аялал маань өлзийтэй байх нь дамжиггүй болов уу.

Дэслэгч Б.АЛТАНЦЭЦЭГ

\”Эх орны манаа” сонин