“Шилээ маажиж” зогсох оюутан шиг МАН-ын байж байгааг

УИХ-ын сонгууль ойртоод л.
Хүмүүс хэлж ярьж байгаа бүхэн цаанаа нэг л зорилго, агуулгатай болж. Хөдөлгөөн
бүр нь сонгуультай холбогдох жишээтэй. Төрийн албан бичгийг стандартын дагуу
зөв бичих хэрэгтэй гээд л шүүмжилчихвэл сонгуультай холбоно. Цэцэрлэгийн багш
хүүхэд зоджээ гэвэл бас л сонгуультай холбоно.
Микронуудыг үйлчилгээнд явуулахаа больчихлоо гээд эсэргүүцвэл мөн л
сонгуультай холбогдчихно. Ер нь яг энэ үеэр л иргэд олон нийтийг иймэрхүү сонин
сэтгэхүйтэй болгочих юм. Өглөө лифт гацаад шатаар уруудаж явсан \”Муу ардын
намын тэнэг ажлаа хийж чадахгүй юм. Ядаж лифтээ ч ажлуулаад байж чадахгүй” гээд
үглэж яваа ахмадтай тааралдав.

Ардын нам ямар байрны лифт
ажиллуулах биш дээ. Харин тус намын гишүүнчлэлтэй нэг эрхэм л манай СӨХ-ны
дарга бололтой юм. Түүнийг шатаар уруудаж яваа ахмад мэддэг учраас л ийнхүү улс
төржүүлж, сонгуулийн уур амьсгал оруулж байгаа нь тэр байх.

 

Тэгсэн автобусанд ороод суусан
хоёр \”авгай” чи наашаа, би цаашаа гээд л учиргүй хэрэлдээд байх юм. Тэр хоёрын
тэмцэлдээнээс болоод урд хаалган дээр хүмүүс овоорч, ундууцаж, бухимдаж эхлэв.
Удалгүй өнөөх хоёр учраа олж хүмүүс ч гарсан зайгаар нь хойш түлхэлцэн
хөдөллөө. Тэгсэн \”авгай” нар яг учраа олоогүй бололтой юм. Зорчигдын шаардлага
шахалтаар хоёр тийш болсон ам, амандаа үглэж, өнөөхөө муулна. Би ч түлхүүлж
явсаар нэгнийх нь хөл дээр гишгэж орхив. Уурлаж бухимдаж байсан хүн яаж зүгээр
байхав. \”Цаад ардчилсан намын балай бүдүүн авгай шигээ хүний хөл бяцаллаа.
Замаа хараач хөлдүү минь” гэгчлэнгээр манийгаа \”шуургадах” нь тэр. Бушуухан шиг
л уучлалт гуйгаад зөрж одов. Түлхэлцэж яваад л санаандгүй хөл дээр нь гишгээ
биз. Энэнд чинь АН, МАН ямар хамаа байна аа. Мэдэхгүй юм.

Иргэд, олон нийт ингэж бужигнаж
байгаа юм чинь Төрийн ордонд ч асуудал хурцдаж байгаа нь мэдээж биз. Тэгээд
сонин гарчигласан чинь \”Өчигдөр МАН-ынхан жижиг дунд бизнес эрхлэгчийг төрийн
ордонд цуглуулж хуралдсан гэнэ”. Ах намынхан ч мундаг байгаа юм шүү. Улс төрийн
чухал асуудал хэлэлцдэг төрийн ордны А танхимд чуулган завсарласан, ордон эзгүй
байгаа энэ завшааныг ашиглаад л \”найман нэрийн дэлгүүр”-ийнхнийг цуглуулаад л баахан
гомдлыг нь сонссон байгаа юм. Тэгээд л сонсч, сонсч байснаа \”Бид нар НӨАТ-ын
хуулийг угаасаа дэмжээгүй. Гэтэл АН-ыхан хүчээр кноп дараад баталчихсан. Үүнээс
болоод та нар минь зовж байгааг мэдэж байна. Бид нарын буруу алдаагаа засч
хуулийн төсөл өргөн барина аа. Гэхдээ нээх их найдаад хэрэггүй шүү. АН-ынхан
хүч түрчвэл бид яаж ч чадахгүй” гэх утгатай тайлбар хийж, дэлгүүрийн эздийн \”амийг
таглав”.

Хууль батлагдаад НӨАТ гэгчээр
иргэдийг дарамтлаад багагүй хугацаа өнгөрсний дараа л МАН \”би буруугүй” гээд л хошигноод
л явж байх юм. Сонгууль л дөхсөний илрэл байхдаа. Ер нь чуулгандаа суудаггүй,
бүлгээрээ тасалдаг хүмүүс дөрвөн жилийн дараа юу ч гэж ярих вэ дээ. Хичээлдээ
суудаггүй оюутан шалгалт болохоор дэмий л шилээ маачиж зогсдог шиг МАН-ынхан
тийм л дүр төрхтэй сонгуулийг угтаж байна. Одоо тойрогтоо очоод юу ярих вэ. \”Биднийг
ажил хийлгэсэнгүй. Ард иргэдийг \”дарамталж” байгаа энэ олон хууль тогтоомжийг
АН-ынхан л баталсан” гээд тайлагнаад явах юм байна л даа. Тэд ингэж \”мэдрэлтэж”
байхад орцны өвөө СӨХ-ны даргыг муулах, хоёр хүүхэн автобусанд муудалцаж ч
яамай байна аа.

 

А.Аюуш