“Даншиг наадам-Хүрээ цам 2018” шашин соёлын наадам Хүй 7 худагт өнөөдөр 11:00 цагт нээлтээ хийж амралтын хоёр өдөр үргэлжилнэ. Энэхүү арга хэмжээний үеэр лам нарын дунд ном хаялцах, мэтгэлцэх, балин тосон урлалын тэмцээн зохиогдох ба цам харайх, маань татах, Соёмбот туг залах, шашны сүлд дуулал эгшиглүүлэх зэрэг олон сонирхолтой арга хэмжээнүүд болдог билээ.
Мөн 256 хүчит бөх барилдан, их насны болон жороо морьд уралдах бөгөөд морьт харвааны тэмцээнийг зохион байгуулна.
Улаанбаатар хот жуулчдын тав тух, аюулгүй байдлыг хангах, аялал жуулчлалын үйлчилгээний чанар, хүртээмжийг нэмэгдүүлэх, жуулчдыг татах, шинэ бүтээгдэхүүн бий болгох зорилгоор “Ulaanbaatar City Tour” хотын аяллын автобусыг явуулж эхлээд байгаа. Тэгвэл тус автобус энэ амралтын өдрүүдэд тусгай хөтөлбөрөөр буюу Хүй долоон худагт зохион байгуулагдаж буй “Даншиг наадам-Хүрээ цам 2018” шашин соёлын наадмыг дотоод, гадаадын жуулчдад үзүүлж, сонирхуулахаар болжээ.
Аялал 1: 10:00 – 17:00 цагийн хооронд
Д.Сүхбаатарын талбай- Үлэг гүрвэлийн төв мүзей үзэх – Гандантэгчэнлин хийд – Даншиг наадам-Хүрээ цам – Д.Сүхбаатарын талбай
Аялал 2: 11:00 – 18:00 цагийн хооронд
Д.Сүхбаатарын талбай – Үлэг гүрвэлийн төв мүзей үзэх– Гандантэгчэнлин хийд – Даншиг наадам-Хүрээ цам – Д.Сүхбаатарын талбай
Тасалбар:
Төв шуудан дахь Жуулчны мэдээллийн төв болон аяллын автобусаас худалдан авах боломжтой.
