Чехэд сургууль төгсөөд Англид хэлний бэлтгэлд суралцаж байх үеэсээ буюу Лондонд амьдарч байхдаа рэппэр Quiza буюу Б.Батцэнгэл Монголд гаргах цомогийнхоо талаас илүү дууны үгийг биччихсэн байсан гэдэг. Тэр л нутгаас уран бүтээлээ өвөртлөн ирж байсан рэппэр Quiza нэг хэсэгтээ Монголын хип хопын ертөнцөд өөрийн гэсэн хэмнэл, стилиэрээ өнгө нэмж явсан нэгэн.
Харин нэг л өдөр тэрээр нийгмийн болохгүйг шүүмжлэх онцлогтой урлагийн ертөнцөөс гэнэт төрд хүчин зүтгэх болсноор шүүмжлэлийн бай болсон тэр тогоон дотор хамт буцалж эхэлсэн. Энэ бол 2013-2016 он. Хүмүүс ч дуучин байсан хүн төрийн албанд дарга болсыг нь янз бүрээр хүлээж авч байлаа. Гэхдээ сөрөг хандлагатай байсан эсэхийг Б.Батцэнгэл мэдээгүй гэж байгаа. Учир нь түүнд өөрт нь хэлэхгүй нь мэдээж гэж өөрөө ярьж байна билээ.
Төрийн ажлынхаа талаар Quiza “Төрийн өмнөөс ажил хариуцаж чаддаг гэдгээ харуулахыг хүссэн. Харуулж ч чадсан гэж бодож байгаа. Үйлчилгээний албаны хүн учраас надад хүнтэй муудах эрх байхгүй. Тэгэхээр дарга гэхээсээ илүү цэрэг байсан юм байна гэж би боддог.” гэж хэлжээ. Нийслэлийн соёл урлагийн газрын дарга, эсвэл цэрэг нь байсан эсэхийг мэдэх нь мэдэх байх.
Гэнэт төрд орсон шиг нь гэнэтийн бас нэг сонин сонссон уу? Юу вэ гэхээр, Quiza рок болоод гурван жил болсон гэж байна. JCI Capital салбар байгууллагын гишүүдээс бүрдсэн “Capital band” хэмээх рок хамтлагийн дуучин нь болжээ. Гэхдээ энэ хамтлаг уран бүтээл хийж гадуур тоглолт хэсдэггүй онцлогтой юм байна. Харин зүгээр л найзуудаараа цагийг зугаатай өнгөрөөж, чөлөөт цагаараа урлагаар амьсгалах хоббитой залуус нэгдсэн мэргэжлийн бус хамтлаг аж. Гэхдээ л олон улсын хэмжээний, 3500 хүнтэй арга хэмжээн дээр тоглолтоо үзүүлчихсэн гэсэн. Түүний хэлж буйгаар хип хоп залуугийн дуулдаг авьяасыг Capital Band хамтлагийнхан нь илрүүлж нээсэн юм гэнэ. Рок болоод гурван жил болж байна гэхээр ноён Б.Батцэнгэл дарга байхдаа л энэ урсгалд хөл тавьжээ.
Төрийн албаны дарга асан, рэппэр, рок Б.Батцэнгэл өөрийгөө ямар азаар ан агнуур гэх мэт өөр хоббитой биш, дуулах хоббитой байсан юм хэмээн таашааж явдаг гэнэ билээ.
