Улс төрчид үүрэн дотроо эрхэлж суухын оронд жигүүрээ дэлгэ

 

Улс төр менежментийн академийн Ерөнхий захирал Д.Уламбаярын ээлжит захидал сошиалд нэлээн уншилттай байна. Тэрбээр энэ удаад улс төрийн эрхэм түшээдүүдэд хандаж, оюун бодлоо сийрүүлжээ.

Ингээд түүний захидлыг бүрэн эхээр нь хүргэж байна.

Бизнесмен,  УИХ-ын гишүүдэд илгээх ил захидал

  Сайн байна уу

Хүндэт  Женко Х.Баттулга,  Алтай  тредингийн  Сү.Батболд,  Ажнай  Д.Бат-Эрдэнэ, Мон-Ураны Б.Наранхүү, Хурдын Б.Чойжилсүрэн, Эм Си Эс-ийн  Л.Энх-Амгалан, Бодийн  Лу. Болд , АПУ-гийн Г.Батхүү,  Шуудан банкны Д.Зоригт,  Голомтын М.Зоригт   Варьтегийн   Ж.Энхбаяр,  Монгол тамхи Со-гийн   Ц.Дашдорж,  Мон-Роудын  Б.Гарамгайбаатар,  ТБД андуудын  Д.Тэрбишдагва,  Фортуна Н.Батбаяр,  Нью Прогресс С.Бямбацогт,  Үндэсний хөрөнгө оруулалтын банкны Д.Сумъяабазар, Петровисын  О.Содбилэг   нарт.

Та бүхний энэ өдрийн түмэн амар амгаланг эрэн  мэндчилж  байна

Та бүхэн бол өнөөдөр Монголын бизнес, улс төрийн орон зайг эзэгнэж буй  цэнхэр халимнууд.  Бидний хайгаад байгаа, бас хараагаад  байгаа олигархууд  та нар биз.   Монголд  та   бүхний   ороогүй салбар, уулзаагүй хүн, харилцаагүй түнш гэж бараг үгүй болов уу хэмээн найднам. Бас Монголын  олон арван охид бүсгүйчүүдийн мөрөөдлийн цагаан морьтой баян ханхүү,    залуусын  хүрэхийг тэмүүлдэг   оргил нь  мөн л та нар.

Одоо тун удахгүй сонгууль болно.  Аль ч намд,  намын даргад, намын гишүүдэд,  сонгуулийн сурталчилгааны штабд  ажиллах  ухуулагчдад   төдийгүй  аль ч тойргийн сонгогчдын  хамгийн \”хүсэмжит залуус\”  нь та  нар  мөнөөс  мөн.  Одоо бүгд л та нараас хэдэн цаас салгаж авахыгаа дотроо банжиж,  гараа үрж  суугаа. Зах зухаас нь сонсоход та бүхний сонгуульд зарцуулах мөнгөний тоо ч овоо юм дуулдана билээ.

Гэнэтийн зүйл  болохгүй  л юм бол сонгуулийн дараа хоёр Энхболдын нэг нь засгаа толгойлж нөгөө нь Их хурлаа даргалж та нар  өөр өөрсдийн  дагуулуудаа   хөтлөн гар гараасаа барилцан цаашаа хамтдаа яваад өгнө.  Та бүгд зарцуулсан мөнгөө өөр газраас өөр аргаар олоод авна.    Өнөөгийнхөөс юу ч өөрчлөгдөхгүй.   Саналаа худалдсандаа  бантсан ард түмэн дараагийн сонгуулиар л ёстой нэг үзүүлээд өгнөө хэмээн хоосон  халаасаа тэмтчээд   үлдэнэ.

Дахиад  иймэрхүү маягийн   5 сонгууль болоход  та бүхний үр хойчсын  олонхи нь харийн хүмүүстэй ураглаж өөр эх оронтой, өөр үнэт зүйлтэй болж  өтөлж ядарсан өвөө эмээ нараа асрамжийн газар бараадуулж  бие  амар  байхыгаа л  бодож суух биз дээ.  Хилийн чинад дахь өөр соёлыг  дээдлэн шүтэх Монголчуудын   урсгалыг тогтоон барьж байсан үерийн  далан сэтэрсэн ба  одоо зогсоож  дийлэхэд бэрх болсон.  Та бүхэн үүнийг  мэдэхийн дээдээр мэдэж буй.

Тэр үед  Монголын төрийг  хэн  өндөр төлбөр төлсөн гадны бүлэглэлүүд барьж  ард түмэн хоёр өрөө байр, хуучивтар жип машиндаа сэтгэл нь ханаж  харийн голдуу эзэдтэй хамтарсан нэртэй  компаниудад  хөлсний ажил хийж  өдөр хоногуудыг аз жаргалтайгаар өнгөрөөнө.

Ийм юм хэзээ ч болохгүй, болсон  ч  бид  буруугүй  хэмээн  та  бүхэн  хэлж  болох  болов ч  үүний уг сурвалж нь та бүхэнтэй холбоотой хэмээн үзэж болохоор байна. Тухайлбал:

1.  Намууд өөрсдөө бэхжих,  сонгуульд ялахын тулд ухаантай, бодлоготой  хүнийг бус мөнгөтэй овсгоотой, амбицтай  хүнийг эрхэмлэх үзлээс төрсөн гол дүрүүд нь та нар.  Үр дүн нь танай намын гишүүд үзэл бодлоороо нэгдсэн  гэхээсээ илүү  УИХ-ын гишүүд, дарга нараасаа  ахиухан мөнгө, томоохон албан тушаал  сааж үлдэх   ганц  ашиг сонирхол нэгдэж та нарын төлөө саналаа өгнө, шагналаа авна, саналаа өгнө, шагналаа авна  гэсэн чөтгөрийн тойрогт  гацаж  мөнгө,албан тушаалын донгоос өөр бодох юмгүй хүн сүрэг болж хувирсан.

2.  Сонгогчид намуудын гинжнээс салахыг  хичнээн хүсэвч одон медаль , найз нөхөд, хамаатан садан, намын гишүүнчлэл, эмэгтэйчүүдийн, ахмадын  болон залуучуудыг байгууллага гэх мэт  яаж тэмцэвч салж чадахааргүй олон   сүлжээнүүдэд бат ороогдочихоод  дэмий л бухимдахаас өөр зүйлийг хийж чадахаа больсон.

3.  Өөрийн бизнесээ босгох 10 гаруй жил унтах нойр идэх хоолоо умартан байж зүтгээд  бүтэхгүй болохоор нь нэгэн даргад хэдэн төгрөг өгөөд яамны хэлтсийн дарга болсон залуу ганцхан жилийн дотор  амьдралдаа тоолж үзээгүй мөнгөө   аахар шаахар зүйлд үрж тансаглаж, гадаад дотоодоор аялаж зугаацаж эхэлхийг харсан бусад хүмүүсийн толгойд  юу бодогдох нь тодорхой.

4.  Та нарын хоорондоо дэгдээсэн   \”дайны\” хөлд  улс орноороо өртөж   бид ганц ч алхам урагшилж чадахаа болив. Нийгэм тэр аяараа буруу үнэт зүйлийг  шүтэх болов. Залуус  чинь ганц нэгээрээ  шоронгийн хаалга татаж эхэллээ.  Одоо сүрэг сүрэгээрээ тийшээ зүглэнэ. Хэн ч тэднийг өмгөөлөхгүй. Тэр ч бүү хэл төр засгийн өндөр алба хашиж байсан хүмүүс бурханы оронд залархад хүмүүс   худлаа ч гэсэн гашуудлаа илэрхийлдэг байсан бол одоо та нарын дундаас  хэн нэгэн үхэхэд хүмүүс баярлаж байгаагаа ил тод зарладаг болсоныг анзаарсан биз. Хүмүүс та нарт ийм дүн тавьж байна.  Эртхэн ухаараач.

5.  Та бүгд хөрөнгө мөнгө, нам, хар машин зэрэг олон аргыг ашиглаж энэ  сонгуульд ялалт байгуулж болох боловч  намуудын чинь  дарга удирдлагуудын, та нарын  нэр, нөлөө  өсөхгүй улам бүр дордох болно. Уурлаж бухимдсан, цалин тэтгэврийнхээ зээлийн өрөнд баригдаж ядуурч хоосорсон ард түмний   тэсвэр нэг өдөр алдрах вий дээ. Ийм юм бүү болоосой хэмээн залбирч сууна. 

Өнгөрсөн 26 жилд бид өөр өөрсдийнхөө эрх ашгийг  хангалттай бодлоо.  Хувь хувьдаа  тойрогтой, эцэг эхийнхээ төрсөн нутаг хошууг  ард иргэдтэй нь  хүртэл  хувьчилж   авч үзлээ.  Одоо  эртхэн зогссон дээр ээ.  Иймд та бүхнээс дараах зүйлийн хүсэж, бас шаардаж байна:

Үүнд:

1.  2016 оны УИХ-ын сонгуульд бүү нэр дэвш, хэнд ч мөнгө бүү өг,

2.  Үүний оронд  дэлхий дээр 1,0 сая орчим ам.доллараар худалдаад авчихмаар өчнөөн олон компани байна. Дэлхий даяар хэрэн хэсүүчилж   том дэвжээн дээр гарч хүч чадлаа сориод үз.  Та бүхэн дэлхийн томчуудтай зиндаа ижил харьцахад тустай  нэр төр, туршлага, хүч чадал, арга залийг Монголын төрөөс   сурсан байх ёстой. Үүрэн дотроо  эрхэлж   суухын оронд жигүүрээ дэлгэн нисэх цаг болж. Ингэж чадвал та бүхэнд нэр төр, залууст үлгэр дуурайл, Монголчууд  бидэнд  тус болно.

3.   Сая батлагдсан эдийн засгийн өршөөлийн хуулиар ил гарсан мөнгө юуг өгүүлсэнийг ойлгож  байгаа хэмээн найднам.  Ардаа, үр хүүхэддээ сайн мөр үлдээхийг хичээ. Үүний тулд өөр өөртөө  үнэн цагаанаараа амьдарч сурах дадал суулгахыг  хичээгээрэй. Зохицуулдаг, хулгайлдаг, найрдаг, хуйвалддаг цагийг дуусгая.  Монголоо авч үлдэх, Монголоо мандуулах   боломжыг бүү үгүй хийгээрэй. Гуйж байна.

Нэр нь хүртэл шүлэг шиг  залуус минь  нэг  нэг зүйлийг  дотроо бодоорой.

Хүндэтгэсэн:   Монгол улсын иргэн Д.Уламбаяр

2016 оны 04 сарын 12