ЗГХЭГ-аас томилогдсон ажлын хэсэг 13 яам, 12 агентлаг, НЗДТГ-т “Сахилга хариуцлага, дэг журмыг чангатгах тухай” Засгийн газрын албан даалгаврын биелэлтийг өнгөрсөн долоо хоногт шалгасан үр дүнгийн зарим мэдээллийг хүргэсэн билээ. Дүгнэлт тун тааруу гарсан тул Засгийн газрын хуралдаанаар цаашид архи, дарсны зүйлсийг төрийн албан байгууллагуудад нэвтрүүлэхгүй байх, иргэдэд хүнд суртал гаргасан тохиолдолд хариуцлага тооцож байх жишгийг нэвтрүүлэх асуудлыг хэлэлцжээ.
Энэ талаар ЗГХЭГ-ын дарга Г.Занданшатар мэдээлэл хийлээ. Тэрээр “ЗГХЭГ-аас яам, агентлаг, НЗДТГ-т байранд шалгалт хийлээ. Үргэлжлүүлэн ТТХГ-аас тусгай хамгаалалттай газрын байруудад шалгалт хийсэн. Улмаар байнгын хяналт шалгалт хийж, хариуцлагыг чангатгах, эргэж тайлагнаж байхыг даалгасан Засгийн газрын тогтоолыг батлан гаргалаа. УИХ-аас Төрийн албаны тухай хуулийг шинэчлэн баталсан. Ирэх оны нэгдүгээр сарын 1-нээс хэрэгжиж эхэлнэ. Төрийн албаны тухай хуулийг хэрэгжүүлэх хүрээнд НҮБ, Төрийн албаны зөвлөл, ЗГХЭГ “Иргэн төвтэй мэргэшсэн төрийн албыг бэхжүүлэх нь” гэсэн төслийг хэрэгжүүлж байна. Энэ төслийн хүрээнд 47 журмыг шинэчлэн батална.
Ингэснээр үнэхээр мэдлэг чадвартай хүн шалгалтаа өгөөд төрийн албанд ордог, ажлынхаа үр дүнгээр тушаал дэвшинэ. Ажил төрөл хөөцөлдөөд явахад татвар, даатгал, цагдаа, хуулийнхан, эмнэлгийнхэн гээд төрийн байгууллагын дунд шатныхан хэгжүүн, их зантай, ярвагар, дуугарч ядсан, дарга харахаараа бөхийж, иргэдийг харахаараа дээрэлхдэг, танил тал, ах дүү, хамаатан садан, найз нөхөддөө үйлчилсэн, авлига хээх хахуулийн цэг болсон гэх ард иргэдийн шүүмжлэлийг бид хүлээж авна. Тиймээс бид ардчилсан төрийг бий болгоно. Ардчилсан төр гэдэг бол ард түмнээс сонгогдсон төр юм. Төрийн алба гэдэг бол ард түмэндээ үйлчилдэг гарц нь байх ёстой.
Албан тушаалын хэрэгсэл болгодог энэ явдлыг нь таслан зогсоох нь төрийн албаны гол зорилго. Цаашдаа үзлэг шалгалтуудыг сар болгон гэнэтийн байдлаар хийж байхыг холбогдох албан тушаалтнуудад өгч байгаа. Иргэдийн гомдол мэдээллийг тэр дор нь шалгаж хариу өгч байхыг үүрэгдсэн. Төрийн байгууллагын байр, ажлын байранд согтууруулах төрлийн бүтээгдэхүүн, элдэв бодис оруулахыг хатуу хориглож байна. Хэрвээ оруулж, хадгалсан байвал шууд ажлаас нь хална. Төрийн ордонд хэнбэгуай ч архи дарс нэвтрүүлэхийг оруулахыг, хэрэглэхийг хатуу хориглож байна. Төрийн албаны мэдээллийг цахимжуулахаар ажиллаж байна.
Ингээд сэтгүүлчдийн сонирхсон асуултад хариуллаа.
-Шалгалтын талаар тодорхой мэдээлэл өгөхгүй юу. Төрийн байгууллагад тэсэж дэлбэрэх бодис оруулах эрх байдаг уу?
-Соёл урлагийн газраас салют илэрсэн. УУХҮЯ-наас бензин илэрсэн. Архи согтууруулах хэрэглэсэн тохиолдолд шууд хариуцлага хүлээлгэх үүрэг өгсөн. Иргэдтэй хууль бус харьцвал шууд хариуцлага тооцохыг ТНБД нарт даалгасан.
-Шалгалтын явцад илэрсэн зөрчлүүдэд яг ямар хариуцлага хүлээлгэх вэ?
-Өнөөдрийн хууль тогтоомжоор архи хадгалсан тохиолдолд хариуцлага тооцох хуулийн заалт байхгүй. Учир нь хэрэглээгүй. Бэлэг дурсгалын, хөдөө гадаа явахаар хадгалж байсан зэрэг олон тайлбар хэлж байна. Харин өнөөдрийн Засгийн газраас гаргасан тогтоолоор согтууруулах ундаа хадгалсан л бол шууд ажлаас нь хална. Нэвтрүүлэхийг завдсан бол хариуцлага тооцно.
-Монгол банкны Эрдэнэсангаас 36 төрлийн согтууруулах төрлийн бүтээгдэхүүн илэрсэн гэх мэдээллийг Монголбанкнаас үгүйсгэж байна. Үүнд тайлбар өгөөч?
-Илэрсэн.
