Монгол Улсын Их сургуулийн оюутнууд төлбөрийн нэмэгдлийг эсэргүүцэн төв сургуулийнхаа үүдэнд тайван жагсаал зохион байгуулж байна. Тус сургуулийн мэргэжлийн суурь хичээлүүүдийн нэг кредитийн үнэлгээ 19.9-.24.7 хүртэлх хувиар нэмэгджээ. Ингэснээр нэг оюутны хагас жилийн сургалтын төлбөр 1.5-2 сая төгрөг болж буй аж.
Хичээлийн шинэ жилийн эхний улиралд нэг оюутан 12-21 кредит судлах ёстой юм байна. Энэ жил нэг кредитийн төлбөр 19200 төгрөгөөр нэмэгдсэн тул дунджаар 1.5 сая төгрөг төлж, хичээл сонголтоо хийх боломж бүрдэж буйг жагсаалд оролцож буй оюутнууд хэлж байлаа.
Сургалтын 19.9-28 хувь нэмэгдчихээд байна үүнийг л бууруулж өгөхийг бид сургуулиасаа шаардаж байгаа
МУИС-ийн Оюутны холбооны Хяналтын зөвлөлийн дарга Г.Ариунзаяагаас зарим зүйлийг тодрууллаа.
-Оюутнууд сургуульдаа сургалтын төлбөрийн асуудлаар яг ямар шаардлага тавьж байгаа вэ?
-Бид өнгөрөгч тавдугаар сарын сүүлээс эхлээд, дүнгийн наймааны асуудлаар олон нийтэд хандаж эхэлсэн. Зургадугаар сард МУИС-ийн ТУЗ-ийн хуралдаан болж, Азийн топ 100 сургуульд багтах зорилгын хүрээнд төлбөр нэмэх шийдвэр гаргасан байдаг. Ингэхдээ 12.5 хувиар нэмэгдүүлнэ гэсэн мэдээллийг бидэнд өгсөн юм. Гэтэл бодит байдал дээр 19.9-28 хувь нэмэгдчихээд байна. Үүнийг л бууруулж өгөхийг бид сургуулиасаа шаардаж байгаа.
-Сайдын өгсөн зөвлөмжөөр зөвшилцлийн хүрээнд 10 хувь хүртэл нэмж болно гэсэн байгаа?
-Инфляцийн түвшин өнөөдрийн байдлаар 8 хувьтай байна. Өнгөрсөн зургадугаар сард 6.3 хувь байсан. Уг нь төлбөрийг нэмэгдүүлэхдээ инфляцийн түвшинтэй уялдуулах бодлого барих ёстой. Сайдын зөвлөмж нь зөвшилцөлд хүрсэн тохиолдолд 10 хүртэлх хувиар нэмж болно гэсэн байгаа. Гэтэл МУИС үүнээс 2-3 дахин их нэмэх шийдвэрийг гаргасан. Сайдынхаа зөвлөмжийг дагадаггүй улсын сургууль гэж байдаг юм уу.
-Та бүхний асуудлыг сургуулийн захиргаа хүлээж авч, уулзсан уу?
-Бид энэ тогтсон төлбөрийн хэмжээг бууруулах хүсэлтэй байна. Нэгдүгээр ангиас төгсөх анги хүртлэх бүх оюутнуудын төлбөр сургуулийн хэмжээнд нэмэгдсэн. Тухайлбал, би төгсөх ангийн оюутан. Өмнөх жилийнхээс нэг кредит 21 мянган төгрөгөөр нэмэгдчихээд байна. Одоохондоо сургуулийн зүгээс бидэнд ямар ч хариу өгөөгүй. Бид салбар яам, ШӨХТГ-д хүртэл гомдол хүсэлтээ гаргасан. Өмнө нь сургуулийн удирдлагуудтай уулзсан хэдий ч бидэнд бодитой хариулт өгөөгүй.
