ОХУ-ын ГХЯ-ны сайд Сергей Лавровын айлчлал эхэллээ

 

Монгол Улсын Гадаад харилцааны сайд Л.Пүрэвсүрэнгийн урилгаар ОХУ-ын Гадаад хэргийн сайд Сергей Лавров Монгол Улсад хийх айлчлалаа эхлүүллээ.

Түүнийг ГХЯ-ны Төрийн нарийн бичгийн дарга Д.Ганхуяг болон бусад албаны хүмүүс угтан авчээ. Сергей Лавров айлчлалын хүрээнд, Гадаад хэргийн сайд Л.Пүрэвсүрэнтэй ганцаарчилсан уулзалт болон албан ёсны хэлэлцээ хийх аж. Үүний дараа тэрбээр албан ёсны хэлэлцээ, хоёр орны харилцаа, хамтын ажиллагааны талаар сэтгүүлчдэд мэдээлэл хийнэ.

Мөн Ерөнхийлөгч Ц.Элбэгдорж, Ерөнхий сайд Ч.Сайханбилэгт бараалхаж, ГХЯ-ны Зөвшилцөл танхимд \”ОХУ-ын Зүүн Азид явуулж буй гадаад бодлого\” сэдвээр илтгэл тавьснаар түүний айлчлал өндөрлөх аж.

С.Лавровын айлчлалын талаар \”ТАСС\” агентлагийн мэдээлснээр энэ удаад хоёр орны удирдагчдын өмнө нь хэлэлцэн тохиролцсон гэрээ хэлэлцээрийн хэрэгжилтийн хүрээнд Орос-Монголын харилцааны цаашдын төлөв байдал, бүс нутгийн болон олон улсын тулгамдсан асуудал, зарим салбар дахь хоёр орны хамтын ажиллагааны асуудлуудыг хэлэлцэнэ. Дашрамд дурдахад, Сергей Лавров манай орон дахь айлчлалаа өндөрлүүлээд Японд айлчлах бөгөөд тэндээсээ нутаг буцна.

Түүнчлэн энэ сарын 18-нд Москва хотноо ОХУ, Энэтхэг, Хятад /RIC-Russia, India, China/-ын Гадаад хэргийн сайд нарын 14 дэх удаагийн уулзалт болох бөгөөд уг уулзалтаар гурван улсын Гадаад хэргийн сайд нар бүс нутаг хийгээд олон улсын асуудлаар хэлэлцэнэ. Тиймээс энэхүү уулзалтын өмнө ОХУ-ын Гадаад хэргийн сайд Сергей Лавров манай орон болон Япон Улсад айлчилж байгаа нь олон улсын анхаарлыг нэлээд татаж байна.