![\"\"](http://undesten.mn/uploads/posts/2016-04/1461301580_826c3096d9824d3041f409b7cb6467de.jpg "\\"\\"")
УИХ-ын Хууль зүйн Байнгын хорооны хуралдаанаар дэмжигдсэн \”Өршөөлийн хуулийг хэрэгжүүлэх арга хэмжээ\”-ны тухай тогтоолыг УИХ-ын чуулганы өнөөдрийн хуралдаанаар хэлэлцэхээр тохирсон гэсэн мэдээ байсан юм. Тогтоолд \”2015 оны долдугаар сарын 2-ны өдрийн 24.00 цагаас өмнө гэмт хэрэг үйлдэж, ял шийтгүүлж, үндсэн ялыг эдэлсэн, өршөөл уучлалд хамрагдсан хүний ялтайд тооцох хугацааг ямар гэмт хэрэгт холбогдсноос нь үл хамааран уг хуулийн 6.1-д заасны дагуу өршөөн хэтрүүлсэн тул хувийн хэрэгт нь ял шийтгэлгүйд тооцсон тухай тэмдэглэгээ хийж, нэг мөр хэрэгжүүлэх ажлыг зохион байгуулсугай\” хэмээн дурдсан байгаа.
Энэ тогтоолыг МАХН-ынхан Н.Энхбаярыг сонгуульд оролцуулах зорилгоор анх санаачлан, МАН-тай эвсэхгүй гэдэг ам өчиг өгч байж АН-аар дэмжүүлсэн гэдэг юм. Ганц хүнд зориулсан УИХ-ын тогтоолыг МАХН-ын бодож тооцсон шиг аргаар амархан явуулахгүй байхаа мэдэх баг улс төрд бий. Тухайлбал, Н.Алтанхуягийн багийнхан шоронд байгаа. Бас зарим нь шалгагдаж буй. Мөн Х.Баттулгын тойрон хүрээлэгчдийн хуулийн байгууллагынхантай хийж буй тэмцэл ч шувтрах болоогүй байгаа. Тэд үүнийг зүгээр хараад өнгөрөхгүй нь тодорхой.
Үүнийг тооцсон мэт МАХН МАН-тай эвсэнэ хэмээн \”хошгоруулж\” байснаа гэнэт \”Түгжил\”-дэж орхисон. Тогтоолын төслийн далд санаа, тохиролцоо ийн олонд ил болмогц МАХН-ынхан энэ хөнгөлөлтийг ганцхан Н.Энхбаярт хамаатуулах шаардлагагүй гэх мессежийг түгээв. Үүнтэй зэрэгцэн энэ тогтоол эдийн засгийн гэмт хэргийн сэжигтэн, АН-д хамгийн ихээр адлагдаж, эсэргүү гишүүдийн тоонд багсан УИХ-ын гишүүн сэжигтэн Х.Баттулга болон Б.Батзаяа, А.Гансүх, Н.Алтанхуягийн хүн ялтан Л.Гансүх, сэжигтэн Г.Дэнзэн, МАХН-ын дарга Н.Энхбаяртай бараг л нэгийгээ үзэж, нэхий дээлээ уралцъя гэх нь холгүй үнэнийг дэлгэсэн Эрүүл мэнд, спортын сайд асан Г.Шийлэгдамба нарт ч ижил үйлчлэх нь гэсэн бор шувуу нисэж эхэллээ. Энэ нь тогтоолыг ганц Н.Энхбаярт биш бүгдэд зориулж байгаа юм гэсэн үгээр халхавч хийгээд суухад амар болов. Сураг сонсоход МАХН-ын дарга Н.Энхбаяр МАН-ын дарга М.Энхболдыг \”мурихаасаа\” өмнө Төрийн ордонд АН-ын дарга З.Энхболдтой уулзсан байдаг. Энэ үеэрээ тэр \”Бид МАН-тай нэгдэхээ болилоо.
Гэхдээ намайг ялтайд тооцохгүй гэсэн тогтоолыг та нар батлахгүй бол яах юм бэ\” гэж хаширлаад дээр нэр дурьдагдсан хүмүүсээ ч гэсэн багтаачих гэж шахсан ч юм бил үү хэн мэдхэв. Н.Энхбаяр АН-ынхан өөрийг нь тогтоолоор хуурчих вий гэсэндээ хаширлаж, МАН-тай эвсэх асуудлыг хойш татаж, ар хударгаар нь хонжоогоо тооцчихсон сууж байгаа биз. Хэрвээ Н.Энхбаярыг УИХ-ын сонгуулиас өмнө ялгүйд тооцуулахаар анх тохиролцсон гэх энэ тогтоолд нэр дурьдагдсан хүмүүс багтвал намуудын хооронд багагүй яриа, хэлэлцээ, тохиролцоо хийгдэх учиртай. Энэ тохиролцоо хийгдэж болно. Учир нь, МАН-ынхан \”МАХН-тай эвсэхээргүй болсон\” гэдэг мэдээллийг өчигдөр өгсөн бол дараа нь МАХН-ын зүгээс \”МАН цаг хугацаа богино гэдэг үндэслэлээр татгалзаж байх шиг байна. Гэхдээ МАХН-ын зүгээс хуулийн хугацаа дуусаагүй учраас дахин эвсэх санал хүргүүлнэ\” гэж мэдэгдсэн.
Энэ нь УИХ-аар тогтоолыг хэрхэн шийдвэрлэхийг харгалзан үзэж байгаад эцсийн хариугаа хэлмээр байна гэж буйтай агаар нэгэн болж байгаа юм. Тэгэхээр өнөөдрийн болоод маргаашийн нэгдсэн чуулганаас ихээхэн зүйл шалтгаалах бололтой. УИХ дээр ч тогтоолын төслийг \”дэмжсэн\” дүр үзүүлж, кноп дараад явуулчих хүмүүс бий. Гэхдээ Н.Энхбаярыг болон бусад хүмүүсийг ялгүйд тооцох тохироонд харин Ерөнхийлөгч хориг тавьж магадгүй болоод байна.
Эх сурвалж: Өглөөний сонин
