О.Баасанхүүгийн удирдсан бүлэг тав хонохгүй \”задрах нь\”

О.Баасанхүү дарга болсон. Юуны гэж үү. Бүлгийн дарга болсон шд. УИХ дахь \”Шударга
ёс” эвслийн бүлгийн дарга болох нь О.Баасанхүүгийн чинхүү хүсэл байж. Тэгээд л \”дарга
болгосонгүй” гээд л намынхаа даргатай, дэд сайдтай муудалцаж, шанаа хүртэл
аваад л явж л дээ.

 

Тэгсэн өнгөрөгч долоо хоногт \”Шударга ёс” эвслийн бүлэг хуралдаж, Байгаль
орчин, ногоон хөгжлийн сайд Н.Батцэрэгийг бүлгийн даргаас чөлөөлж оронд нь
О.Баасанхүүг 100 хувийн саналаар дэмжсэн байна. Ингээд бүлгийн дарга болсон
О.Баасанхүү эхний мэдэгдлээ \”5 хоногийн завсарлага авлаа” гэж хийгээд л \”сүрийг
үзүүлэв”. Ер нь сүр үзүүлэхээс ч аргагүй. Учир нь түүнтэй адил намын
жагсаалтаар гарч ирсэн 28 гишүүдийн бүрэн эрхийн асуудал хөндөгдөж байгаа тул
нэн яаралтай уг асуудалд анхаарлаа хандуулах нь ойлгомжтой.

Гэхдээ АН, МАН Цэцийн дүгнэлтийг нэгэнтээ дэмжчихсэн учраас О.Баасанхүү
тэргүүтэй бүлэг завсарлага аваад үр дүнд нэг их өөрчлөлт орохгүй. Дэмий л цаг
алдана гэж улс төрчид тайлбарлаж байна.

Харин шинэ даргын эрх мэдэл тав хоногийн завсарлагатайгаа хамт төгсөх вий
гэсэн таамаглал цахим хуудсаар нисч эхэллээ. Тодруулбал, \”Шударга ёс” эвслийн
бүлэг дотроо цэцийн шийдвэрийг хүлээн авна, авахгүй гэж маргалджээ. Улмаар
Д.Тэрбишдагва тэргүүтэй зарим гишүүд \”хэрвээ цэцийн дүгнэлтийг хүлээн авахгүй
бол бүлгээс гарна” гэж хатуухан анхааруулга өгсөн байна. Бүлгийн завсарлагын гол шалтгаан нь цэцийн дүгнэлтийг хүлээн авахгүй байх.
Үгүй бол хоёр намын саналыг дэмжээд л аль эрт асуудлыг шийдвэрлэчих боломжтой
байсан. Тэгэхээр эсрэг саналтай байгаа Д.Тэрбишдагва хэлсэн амандаа хүрвэл УИХ
дахь \”Шударга ёс” эвслийн бүлэг тарах хэмжээнд хүрч асуудал яригдах нь.

Тус бүлэг Д.Батцогт, Г.Уянга, Л.Цог нарын гишүүдээ алдаад байгаа. Тэдэн
дээр Д.Тэрбишдагва нэмэгдвэл бүлэг задрахаас аргагүй байдалд хүрнэ. Өнөөдрийн
нөхцөл байдлыг харвал задрах нь ойлгомжтой болжээ гэж дүгнэмээр. Ингэж л бүлгийн шинэхэн дарга завсарлага авсан хугацаатайгаа хамт албан
тушаалдаа цэг хатгахаар болж байх шиг. Юмыг яаж мэдэх вэ. Бүлгээ авч үлдэхийн
тулд Д.Тэрбишдагвын саналыг дэмжих ч юм билүү. Тэглээ гэхэд хуулийн үйлчлэх
хугацаанаас хамаараад \”оймсонд хавчуулагдсан” олон хүн бүрэн эрхээ хасуулж
таарах нь байна.

Уг нь О.Баасанхүүд Д.Тэрбишдагва шиг бүлгийг атгаж, \”шантаачлах”, цаашлаад
бүлгийн даргаас найдвартай албан тушаалд очих боломж бололцоо байсан. Гэвч \”энхрий
хайрт” лоозонгоо давтаж ярьсаар хамаг боломжоо алдаж, тав хоногийн дарга
хийгээд сууж байна. Юу ч гэхэв. Гэхдээ хэзээ хаана юу болохыг одоо тааж хэлэхэд
бэрх шүү дээ. Улс төрч одоо л сонирхолтой болж байна даа.

 

 

Шар хүү