Транжендер Б.Солонго буюу Соко “Miss Universe” тэмцээнд оролцох эрхийн төлөө өрсөлдөж байна. Сокогийн хувьд энэ алхам нь ахиж буй 1 шат хэмээн тодорхойлоод буй. Тэрээр “Дэлхийд чансаагаараа 1-т бичигддэг хамгийн ардчилсан миссийн тэмцээн Miss universe /Mongolia/ -д үзэсгэлэнтэй бүсгүйчүүдтэй оролцож байна 10 дугаартай Б.Солонго энэ удаад 1 шат илүү зориг гаргалаа.” гэжээ.
Тэгвэл эсрэг талаас мөн бялдаржуулах урлагийн төлөөлөл болсон Төмөр хатагтай хэмээгч Ш. Солонго гарч иржээ. Тэрээр “”Miss Universe” бол дэлхийн хамгийн том нэр хүндтэй тэмцээн юм. Эх орноо төлөөлж оролцож байгаадаа баяртай байна. Тиймээс та бүхэн маань чин сэтгэлээсээ халуунаар намайг дэмжээрэй. Би та бүгдийн сэтгэлийн дэмээр итгэлийг чинь алдахгүй өндөрт өргөж эх орныхоо нэрийг дэлхийд таниулнаа” гэсэн байна.
Сокогийн энэ алхам Монголдоо нэр хүндтэйд тооцогдох мисс, моделиудад таалагдаагүй бололтой. Тэд түүний зүг хатуухан үгсийг чулуудаж байгаа тухай шар мэдээнүүд цахим орчинд ч, хэвлэл мэдээллийн хэрэгслээр ч нэлээд явлаа. Харин уг дайралтуудыг намжаахад тус болохуйц мэдэгдлийг Miss Universe тэмцээний Монгол дахь лиценз эзэмшигчийн зүгээс гаргаад байна.
АЛБАН ЁСНЫ МЭДЭГДЭЛ:
“Miss Universe Mongolia 2018” тэмцээний шилдэг оролцогчидтой холбоотой олон гомдол санал, сөрөг сэтгэгдлүүд ирлээ. Үүний дагуу тус тэмцээний хууль дүрэм, гэрээнд үндэслэн дараах тайлбарыг хүргэж байна.
1. АНУ-д төвтэй Miss Universe байгууллагын ерөнхийлөгч Доналд Трампын шийдвэрээр 2012 оноос эхлэн трансжендер буюу хүйсийн шилжилтэд орсон эмэгтэйг тэмцээнд оролцохыг албан ёсоор зөвшөөрсөн байдаг. Энэ жил дэлхийн түүхэнд анх удаа Испани улсыг төлөөлж Анжела Понсе нэртэй трансжендер бүсгүй 90 орны гоо бүсгүйчүүдтэй өрсөлдөхөөр сонгогдоод байна.
2. Miss Universe Mongolia тэмцээний “Фото мисс” шалгаруулалттай NAFA бренд хамтран ажилласан бөгөөд тус тэмцээний дүрэмтэй харшлаагүй болно. Гэвч эх дэлхийгээ хайрлан хамгаалах асуудал хөндөгдөж, амьтны гаралтай зүйлсээс татгалзаж буй энэ цаг үед гоо бүсгүйчүүдийн өнгө төрхийг ийн харуулсандаа зохион байгуулагчдын зүгээс уучлал хүсч байна.
67 жилийн түүхтэй Miss Universe тэмцээн хамгийн ардчилсан шалгууртай, хүний эрх, эрх чөлөөг дээдэлдэг байдлаараа бусад ижил төрлийн тэмцээнүүдээс ялгардаг болно.
Тэмцээний бүртгэл 3 сар гаруй хугацаанд үргэлжилж шилдэг оролцогчдоо сонгон авлаа. Оюун бодол, мөн чанар, гадаад болон дотоод гоо сайхнаараа эх орноо, элгэн саднаа, гэр бүлээ чимж буй үзэсгэлэнт охидоо дэмжиж, урам зориг хайрлахыг уриалж байна.
Бид ард олныхоо саналыг сонсож дэлхийн 1.5 тэрбум үзэгчдийн өмнө алхах анхны Монгол гоо үзэсгэлэнг шалгаруулах болно. Араввдугаар сарын 6-ны өдөр болох Үндэсний ялагч тодруулах ёслолын үйл ажиллагаан дээр уулзацгаая!
Таныг хүндэтгэсэн,
Жавхланбаяр АНХБАЯР
Miss Universe тэмцээний Монгол дахь лиценз эзэмшигч
Сонирхуулахад 67 дахь удаагийн MissUniverse тэмцээнд эх орноо төлөөлөн оролцохоор өрсөлдөж буй Трансжендер Батсүхийн Солонго:
Нас: 25
Биеийн өндөр: 178 см
Биеийн харьцаа: 88*58*88
Төмөр хатагтай буюу Шинэбаярын Солонго:
Нас: 27
Биеийн өндөр: 172 см
Биеийн харьцаа: 95*60*95
