Монгол Улсад 35 тэрбум төгрөг өртэй \”Саусгоби Сэндс\” Таван толгойд олборлолт явуулна

Шүүхийн шийдвэрийг үндэслэн \”Саусгоби сэндс” ХХК-ийн өр төлбөрийг барагдуулах Сангийн яамны саналыг Засгийн газрын хуралдаанаар хэлэлцэн шийдвэрлэлээ.

 

 

Шүүхээс улсын төсөвт 35,3 тэрбум төгрөг төлүүлэхээр шийдвэрлэсэн бөгөөд \”Саусгоби сэндс” компани ногдуулсан нийт төлбөрөөс 15 тэрбум төгрөгийг 2016, 2017 онд тус бүр 7,5 тэрбум төгрөг төлж, үлдэгдэл 20,3 тэрбум төгрөгийн өрийг Төрийн өмчит \”Эрдэнэс Таван толгой” компанийн Тавантолгойн уурхайд өөрийн зардал, хүн хүчээр зах зээлийн үнээс хямд өртгөөр олборлолт явуулан  барагдуулах санал тавьсныг хүлээн авч, ажил гүйцэтгэх гэрээ байгуулахыг \”Эрдэнэс Таван толгой” ХК-д даалгахаар шийдвэрлэлээ.

 

\”Саусгоби сэндс” ХХК нь Таван толгойн уурхайд ажиллахад холбогдон гарах тээврийн зардал, цалин хөлс, нийгмийн даатгал, байрлах байр, хоол хүнс, цахилгаан, техник хэрэгслийн засвар үйлчилгээ болон бусад зардлыг бие даан хариуцах бөгөөд \”Эрдэнэс Таван толгой” ХК-аас ямар нэгэн нэмэлт зардал гаргуулахгүй байхаар тохиролцсон байна.

 

Ийм шийдвэр гаргаснаар улс хохирохгүй шүүхээс ногдуулсан төлбөрийг бүрэн хэмжээгээр  авахын зэрэгцээ тухайн компанийн үйл ажиллагааг ч зогсоохгүйгээр өр төлбөрийг эцэслэх боломж бүрдэж байна гэж Засгийн газрын хуралдаанаар шийдвэрлэжээ.

 

Хууль эрх зүйгээр зохицуулагддаг энэ нийгэмд \”ялтан ажиллуулах\” гэж байгаа мэт дүр зураг харагдаж байна. Ялтан ч гэсэн цалинтай гэдгийг манай Засаг мэдэж л байгаа байлгүй дээ. Ямартай ч өр төлбөрөө барагдуулж байгаа учраас дэмжмээр. Гэхдээ \”үнэгүй юм үнэгүй л байдаг\” гэдэг шиг хөрсийг хуулж, оронгоор нь эргүүлж хаячихаад \”бид өрөө дарсан\” гээд явж одох вий дээ. Хяналт, зохицуулалт, үр дагавар, хариуцлага гээд сэтгэлийн хөдлөлөөр бус бодож хандах асуудал дээрх мэдээллийн дараа маш олноор гарч ирж байна.

 

А.Аюуш