Эдийн засгийн хүнд бэрх цаг үед “Шарк танк” нэвтрүүлэг гарснаар олон хүнд үр өгөөжөө өгнө гэдэгт үзэгч олон итгэх болсон. Шүүгч нар нь дотоод, гадаад зах зээлд өөрсдийн гэсэн байр сууриа олсон бизнес эрхлэгчид учраас магадгүй хүмүүст 100 хувийн итгэл үнэмшил төрүүлсэн биз. Энэ нэвтрүүлэгт ороод шаркуудын дэмжлэгээс хувь хүртэнэ гэдэг мэдээж ховор аз завшаан. Тэр дундаа гарааны бизнес эрхлэгчдийн хувьд том боломж гэж харж оролцогчид аль байдгаараа хичээн, бүгд л “горьдлого компани”-ийн далбаан дор нэгддэг. Гэтэл бодит байдал дээр чухам юу болсныг тус шоунд тэнцэж бизнестээ дэмжлэг авахаар болсон Барилга.мн сайтын үүсгэн байгуулагч С.Батсүх тодорхой өгүүлжээ. Үүнийг бүрэн эхээр нь хүргэе.
Шарк танк нэвтрүүлгийн хөрөнгө оруулалтын талаар олон хүмүүс, найз нөхөд байнга асууж байсан болохоор, 8 сарын 31-нд Монгол ТВ-д, 9 сарын 12-нд шарк Ариунболд нарт хариу ирүүлэхийг хүссэн бичиг хүргүүлсэн боловч албан ёсоор ямар нэгэн хариу өгөөгүй тул уулзахаар болсон юм.
Өнгөрсөн 7 хоногт товлосон өдрөө Шарк Ариунболд захиралтай уулзаж, хөрөнгө оруулалтынхаа албан ёсны хариуг сонсохоор үйлдвэр дээр нь очиж уулзлаа. Өмнө нь хэд хэдэн удаа уулзаж байсан бөгөөд уулзалтуудад их нааштай, ах нь хөрөнгө оруулалтаа хийнэ, одоогоор хувьцаа гаргах гээд маш их ажилтай байна, дараа тухтай уулзья гэдэг байлаа. Ариунболд захирал 2 цаг гаруй чулуун хөвөн, үйлдвэрийнхээ талаар ярьж, үйлдвэртэйгээ танилцуулж, цай хуушуураар дайллаа.
Шарк Танк нэвтрүүлэг гарсан 2017 оны тэр нэгэн өдөр маш олон хүн баяр хүргэж амжилт хүсч, дэмжиж байлаа. Маргааш нь гадуур явахаар л энэ нөгөө 500 саяын залуу явж байна, тийм их мөнгийг насаараа цуглуулаад ч барахгүй дээ… гэх мэтээр шивэр авир ярилцаж, тааралдсан таньдаг, таньдаггүй олон хүн баяр хүргээд л, ээж минь хүртэл хадаг сүү барьж баяр хүргэж угтаад л… би ч том хөрөнгө оруулалт авцан маадгар хүн явж байлаа. Олон жил хийж хэрэгжүүлэхийг хүсч байсан төслөө сайн хамтрагчтай болж, хөрөнгө оруулалт авч олон залууст боломж олгоно гэж бодож байв. ШаркТанк нэвтрүүлэг ч хийж бүтээх хүсэл тэмүүлэлтэй олон залууст хүсэл мөрөөдлөө биелүүлэх боломж гэж харж, нэвтрүүлэгт оролцохоор найз, дүү нар надтай уулзаж зөвлөгөө авч байлаа.
Шаркын хувьд хөрөнгө оруулах эсэх шийдвэрээ хэдэн сарын өмнө гаргаж, Монгол базалт ХК-ийнхаа ТУЗ-д Шарк Танкын 500 саяын хөрөнгө оруулалтыг хийхгүй гэдгээ танилцуулсан гэв. Шаркын хувьд амласан хөрөнгө оруулалтаа оруулах эсэх нь өөрийнх нь сонголт бөгөөд оруулахгүй байсан ч ямар нэгэн асуудал хариуцлага байхгүй, хариуг бичгээр өгөх ч албагүй гэлээ. Нэвтрүүлэгт Шарк юу ч амлаж, амласанаа биелүүлэхгүй байж болох юм гэж ойлгогдов.
Шаркаас нэгэнт хөрөнгө оруулалт оруулах боломжгүй гэсэн хариу авсан тул одоо шинэ хамтрагчтай болохоор сэтгэл шулуудсан. Хол явья гэвэл олуулаа яв гэдэг, иймд энэ бизнест хамтран ажиллах хэн бүхэнд нээлттэй үлдээж байна.
Нэвтрүүлгийн дараа barilgachin.mn сайтын хандалт эрс нэмэгдэж, олон хүмүүс манай үйл ажиллагааг мэддэг болж, одоо олон харилцагчтай болж, барилгын материалын борлуулалтын хэмжээ сардаа 400-500 сая төгрөг болсон нь бидний амжилт юм.
Сайхан шоу нэвтрүүлэг хийсэн Монгол ТВ, Шарк Ариунболд захиралд баярлалаа… 🙂
С.Батсүх нь тус шоунд “Онлайн барилгын зах” төслөөр оролцож компанийнхаа 20 хувийг 500 сая төгрөгөөр санал болгосон байдаг. Шүүгчдээс дэмжлэг авсан ч ирээдүйд өгөх ашгаа хэт өндрөөр үнэлсэн хэмээн зэмлүүлсэн түүний төслийг салбар нэгт Л.Ариунболд шарк дэмжин 50 хувь дээр тохирч хамтран ажиллахаар болоод байсан юм.
