Жижиг дунд үйлдвэрлэлийг дэмжих сангаар амьсгалсан монголын улс төрд халуухан өдрүүд өрнөж байна. Нэр бүхий УИХ-ын гишүүн, төрийн өндөр албан тушаалтнууд өөрсдийн мэдээлэлд ойр байдаг давуу талаа ашиглан жилийн гурван хувийн хүүтэйгээр зээл авч бидэнд өөрсдийн банк бус санхүүгийн байгууллагаар дамжуулан 30-36%-ийн хүүтэйгээр зээлж, мөнгө хүүлдэг байсныг ил болгосон.
Ингэж мөнгө хүүлснээр тухайлбал, нэг гишүүнд оногдсон 950 сая төгрөгийн жилийн цэвэр ашиг 27-33 % буюу 250 саяас 320-оод сая төгрөг болж байна. Энэ мөнгө бол 2-3 өрөө байр 4 ширхэгийг авах мөнгө юм.
ЖДҮХС-д нийт 700 гаруй тэрбум төгрөг эргэлддэгээс 200 гаруй тэрбум төгрөг нь найдваргүй зээл хэмээн бүртгэгджээ. Энэ нь 70 орчим сургууль барих мөнгө улс төрчид болон тэдний танил тал, хамаатан садны халаас руу ороод алга болж байна гэсэн үг юм.
ЖДҮХС-тай холбоотойгоор эрх баригч МАН-ын дотоод зөрчил хурцдаж, зарим өнцгөөс МАН-ын их цэвэрлэгээ эхэллээ гэж харагдаж байна. Энэ үетэй зэрэгцүүлэн сөрөг хүчин болох АН-д ч бас их цэвэрлэгээ хийвэл улс төр нийтээр цэвэрших боломжтой.
Тухайлбал, 2016 онд АСЕМ-ыг зохион байгуулж, улсын төсвөөс нэлээдгүй хөрөнгө мөнгө зарцуулсан АН-ынханыг хуулийн байгууллагууд шалгаж байна. Үндэсний аудитын газраас АСЕМ-д холбоотой 290,8 тэрбум төгрөгийн зөрчил илэрч, энэхүү зөрчилтэй холбоотой нэр бүхий 17 албан тушаалтныг шалгуулна хэмээн мэдэгдсэнээс хойш даруй зургаан сар өнгөрчээ. Тэгвэл зөвхөн АСЕМ-д холбогдуулан, шалгагдаж байгаа гэх 17 эрхэмд хариуцлага тооцох, цаашилбал намаа цэвэрлэх боломж АН-ынханд байна.
Улсын Ерөнхий прокурор УИХ-ын индэр дээрээ шударга ёсыг шаардсан. Тэгвэл түүнийг шаардлагыг намууд хүлээн авч, их цэвэрлэгээгээ хийх эсэхийг нь харах л үлдлээ.
