2018 оны 11 дүгээр сарын 06-11-ний өдрүүдэд БНХАУ-ын өмнөд нутаг дахь Зухай(Zhuhai) хотод олон улсын нисэх болон агаар-сансарын үзэсгэлэн шоу болж өнгөрлөө. 12 дахь жилдээ явагдаж буй уг агаарын “шоу”-д ази, европын олон арван нисэх онгоц үйлдвэрлэдэг компаниуд өөрсдийн бүтээлийг сонирхуулжээ. Эндээс Хятадын ардын чөлөөх армийн нисэх хүчний байлдааны нисэх онгоцнууд, нисдэг тэрэг, радар болон бусад нисэхтэй холбоотой тоног төхөөрөмжийг харж болно.
Эдгээр олон үзмэр, тоног төхөөрөмж дотор хамгийн анхаарал татсан нэг бүтээл бол Хятадын эрдэмтэд, инженерүүдийн бүтээсэн “квантын радар”-ын туршилтын загвар байв. Үл үзэгдэгч онгоц нь радарын антениас цацаж буй радио долгионы чиглэлийг өөрчлөх байдлаар эсрэг талд илрэхээс “бултаж” байдаг. Энэ квантын радарын технологи үнэхээр бүтээгдсэн бол АНУ-ын “F-22”, “F-35” онгоцнууд, ОХУ-ын “Су-57”, БНХАУ-ын “J-20” зэрэг дэлхийн хамгийн сүүлийн үеийн радарт үл үзэгдэх онгоцнуудыг илрүүлэх боломжтой болох юм.
Уг технологийн зарчмыг “хар үгээр” тайлбарлавал харагдахуйц давтамж бүхий эмх замбараагүй фотоны урсгалыг үүсгээд түүнийгээ хоёр хэсэгт хуваана. Эхний хэсэг болох “долгионы цацраг”-ыг агаарт нисэж буй “объект” руу цацаад буцаад ойж ирсэн фотоныг нөгөө үлдсэн “чөлөөт цацраг”-тай харьцуулж үзэх замаар үл үзэгдэгч онгоцыг ирүүлэхийг хэлээд байгаа юм.
Хятадын батлан хамгаалах “Электроник, технологийн групп” корпорацын бүтээл болох “JY-26” хэмээн нэрлэж буй уг “квантын радар”-ын туршилтын загварыг гадаад орны эрдэмтэд, судлаачдын анхаарлыг хамгийн их татаж чадаж байна.
Р.Энхболд
