Засгийн газрыг огцруулах тухай асуудалтай холбоотой УИХ-ын гишүүд өөр, өөрсдийн байр сууриа илэрхийлж байна. Зарим гишүүд өнөөдрийн үүсээд байгаа шалтгааны гол буруутанг Ерөнхий сайд У.Хүрэлсүхийг гэж харж байгаа учраас огцрох нь зөв гэж байр сууриа илэрхийлж байгаа бол зарим нь У.Хүрэлсүхийн эхлүүлсэн энэхүү үйлдэл Монгол Улсад ус агаар мэт хэрэгтэй гэж тайлбарлаж байна.
Тухайлбал, УИХ-ын гишүүн Л.Оюун-Эрдэнэ Засгийн газрыг огцруулахын эсрэг байр суурьтай байгаа. Тэрээр энэ байр сууриа илэрхийлж, “Ойрын өдрүүдэд болж буй үйл явдлыг иргэд, олон нийт НАМЫН ХАГАРАЛ гэж харж, дүгнээд байна. Гэвч энэ бол 27 жилийн туршид Монголын төрд баттай бэхжин үүрлэсэн бизнесийн бүлэглэлтэй тэмцэж байгаа явдал юм.
Нийгэмд шударга ёсны хүсэмжлэл 97 орчим хувьтай болсон байна. Үүн дээр тулгуурлан Монгол Улсын Ерөнхий сайд үзэл бодлоо илэрхийлсэн. Энэ буруу зүйл биш. Эндээс гүйцэтгэх засаглал маань ямар хэврэг вэ гэдгийг харж байгаа байх. Нэг хүнд хариуцлага тооцоод л кабинетаараа огцрох асуудал яригдаж эхлээд байна.
Дээрээ Ерөнхийлөгчтэй, доороо парламентын хүчтэй бүлэгтэй ийм үед манай гүйцэтгэх засаглал үндсэн хуулиараа хэврэг байгаа нь харагдаж байна. Өмнөх Ерөнхий сайдууд бүгд л зохицохыг хичээж, шударга ёсны хариуцлагаас зугтсаар ирсэн. Харин У.Хүрэлсүх Ерөнхий сайдын хувьд анх удаагаа гэж хэлж болохоор далайцтай алхамыг эхлүүлэхийг зорилоо. Өөрөөр хэлбэл ордны хуйвалдаанаас илүү олон нийтийн хүсэл сонирхлыг авч үзсэн. Үүнийг олон нийт ойлгож байгаа байх.
Гэвч асуудал ийм дээрээ тулж байгаа бол бид үндсэн хуульдаа дүгнэлт хийх учиртай. Мөн олон нийтийн дэмжлэг байгаа бол яг одоо л харуулмаар байна. МАНАН бүлэглэл хууль хүчин, улс төрийн байгууллагад нөлөөллөө оруулж ирсэн явдлын үр хөврөл энэ болж байна. Монголд байгаа зүйл ерөөсөө л авлигын асуудал. Үүнийг таслан зогсоохгүйгээр цааш явна гэдэг үнэхээр хэцүү. Иргэд олон нийт энэ асуудлыг мэддэг мөртлөө ингэж ил шүүмжилж байсан явдал өмнө гарч байсангүй. Энэ зүйл дээр олон нийт нэгдэж, шударга ёс тогтооход хамтдаа дуу хоолойгоо нэгтгэх нь зөв байх.
Жижиг дунд үйлдвэрлэлийн асуудал дээр иргэд өөрсдөө зээлтэй учраас асар хүндээр хүлээн авсан. Гэвч Төрийн банк, Хөгжлийн банк руу ороод уудалвал, бондууд, тендерүүд, Засгийн газрын бусад сангуудыг сөхөөд харвал жижиг дунд үйлдвэрлэлийн энэ асуудал ямар өчүүхэн болохыг мэдрэх боломжтой. Гол нь дээрх зүйлийг сөхөж, уутлах гэхээр маш том бүлэглэл хаалт хийгээд зогсож байдаг. Үүн дотор хууль хүчний байгууллагууд оролцчихсон байдаг. Нам дамнасан бүлэглэлийн энэ тогтолцооноос салж байж бид жам ёсны тогтолцоо руу орно.
Ерөнхий сайдыг бүх зүйлийг хийх чадвартай, эрх мэдэлтэй албан тушаалтан гэж хардаг байсан. Гэвч гүйцэтгэх засаглалын тэргүүн гэдэг хүн хэдхэн их хурлын гишүүнийг эрх ашгийг хөндөхөд л огцрох хэмжээнд хүрдэг ийм хэврэг албан тушаал юм. Үүнийг өөрчлөх ёстой. Хэн нэгэн тэсрэлт хийх л байсан.
Албан тушаалаасаа унахгүйн тулд зохицоод өнгөрч болох. Тэгвэл утгагүй байдал үргэлжилж, гинжин хэлхээс хөвөрсөөр л байх байлаа.
Засгийн газрыг хэрвээ унагаавал, дараагийн засгийн газар бүрдэнэ гэдэг боломжгүй. Хэрвээ ийм дээрээ тулвал парламент хүссэн хүсээгүй тарах зам руугаа алхана. Өөрөөр хэлбэл нам дамнасан бүлэглэл өнөөгийн Монгол Улсын нийгэм эдийн засгийн хурдацтай өөрчлөлт, шинэчлэлийг даах чадамжгүй болжээ гэж харагдаж байна” гэж ярьсан юм.
Үнэхээр ч ойрын өдрүүдэд эрх баригч намын доторх хагаралдаан гэхээсээ хэт том агуулгатай тэмцэлдээн болоод байна уу гэж харагдаж байна. Өөрөөр хэлбэл хэн нэгэн их хурлын гишүүн, их хурлын даргын сандал суудлын асуудал бус харин том бүлэглэлийн эрх ашиг хөндөгдөж байгаа учраас л эрх мэдлээ авч үлдэхийн тулд эцсийн бүх арга хэмжээг авч байгаа нь энэ болов уу.
