Гэнэт яагаад эмэгтэйчүүдийг жийгээд эхлэв

 

 

 

10-аад жилийн өмнөөс жендерийн тэгш эрхийн тухай эрчимтэй ярих болж, үүний
үр дүнд эмэгтэйчүүдийн квот аажмаар нэмэгдэж ирсэн. Хүйсийн тэгш байдал, олон
улсын парламентын жишгийг харгалзан үзээд ардчилсан орны парламентад эзлэх
эмэгтэйчүүдийн хувь 50 биш юм аа гэхэд дор хаяж 20 хувьтай байх ёстой юм байна
гэдгийг манай эрх баригчид ухаарсан.

Тиймээс энэ удаагийн УИХ өмнөхүүдээ бодвол
илүү олон эмэгтэй гишүүнтэй байв. 76 гишүүний 11 нь эмэгтэй гишүүн, энэ бол том
амжилт, олон улсын жишигт ойртож буйн илрэл. 11 эмэгтэй гишүүн 76-гийн 14 хувь
нь. Дахиад 5 эмэгтэй гишүүн нэмэгдэхэд УИХ дахь эмэгтэй гишүүдийн квот 20 хувьд
хүрнэ. Парламентад эмэгтэйчүүдийн эзлэх хувь нэмэгдсэнээр улс орон уян зөөлөн
бодлоготой болж, нийгмийн хамгаалал сайжирч, иргэдэд, эмэгтэйчүүдэд, бяцхан үрсүүдэд
үгүйлэгдэж байсан төрийн бодлогууд хэрэгжиж эхэлдэг. Улс орон дан ганц уул
уурхай, эдийн засгийн салбараар хөгждөггүй. Эрүүл мэнд, нийгмийн хамгаалал,
боловсролын салбар боловсронгуй болж байж хүн ам өсч, бүрэн хүчин чадлаараа
хөгждөг.

Тэгтэл гэнэт ардчилагчид эмэгтэйчүүдийн квотыг бууруулж, тэднийг улстөрөөс
шахаж эхлэв. Хамгийн олон буюу 6 эмэгтэй гишүүнтэй Ардчилсан нам Р.Бурмаа,
С.Одонтуяа нарыг авч үлдэж, Д.Арвин, Л.Эрдэнэчимэг, Ц.Оюунгэрэл, М.Батчимэг
нарыг жийхээр шийдэв үү тэдэнд нэр дэвших эрх олгосонгүй. Анигдаж буй эдгээр
дөрвөн гишүүнээс М.Батчимэг сугалж үлдээх тэмцэл яг одоо Ардчилсан намд өрнөж
байгаа бөгөөд заримыг нь бүр аниж, заримыг нь үлдээх сонирхол ажиглагдаж байна.
Ингэхдээ энэнд бэл бэнчин, боловсрол ямар ч хамаагүй, зөвхөн царай зүсээр
сонгож байгаа дүр зураг харагдаж байна. Магадгүй явуулж буй гишүүдийн оронд илүү
царайлаг, шинэ эмэгтэй гишүүдийг сонгох гэсэн ч байж болох юм.

Ямартай ч,
Ерөнхийлөгч Ц.Элбэгдорж өөрийн хүн М.Батчимэгийг авч үлдэж чадахгүй бол АН хоёр
эмэгтэй гишүүнтэй болно. Эсрэгээрээ Д.Оюунхорол, Д.Сарангэрэл гэсэн хоёр
эмэгтэй гишүүнтэй МАН харин ч эмэгтэй гишүүдийнхээ тоог нэмэгдүүлэхийг зорьж, Т.Ганди,
Ж.Цолмон тэргүүтэй эмэгтэй гишүүдийг нэр дэвшүүлэхээр эрэлхийлж байна. Энэ
мэтчилэнгээс харахад улстөрд удаан тогтохын тулд эмэгтэйчүүд царай зүс, бие хаа,
нас сүүдэр, \”ар тал\” зэргээрээ бас хэмжигддэг л байх нь.