АН Амаржаргалыг “аниж”, Батчимэг араас нь баяртай гэж хэлэв

 

 

Ардчилсан намыг хүнд байхад
нь Ерөнхий сайдын албыг нь залгуулж явсан хүн бол Р.Амаржаргал билээ. Тэртээх 1996-2000
оны үедэх авлига, албан тушаалын төлөөх амь өрссөн тэмцэл, хар дарам он
жилүүдээс нэр цэвэр гарч ирсэн АН-ын цорын ганц томоохон улстөрч нь
Р.Амаржаргал юм.

Тэр цагаас хойш хэнтэй ч, хаана ч сурталчилгаагүйгээр өрсөлдөж
чадах, бие даан нэр дэвшээд ялалт байгуулж явсан тийм л нэр хүндтэй
Р.Амаржаргал намдаа жийгддэг ч бусдын адил урваж шарвалгүйгээр шинэчлэгдэнэ
хэмээн хүлээдэг бололтой юм. Өнгөрсөн дөрвөн жил АН-ын хувьд тосонд умбаж,
торгонд хөлбөрсөн он жилүүд байлаа. Бүгдээрээ л сайд, дарга хийж, бүгдийнх нь л
халаас, түрийвч түнтийсэн.

Үүнээс ганцхан хүн хоосон хоцорсон нь Р.Амаржаргал
бөгөөд айлын шоовдор хүүхэд шиг хөнжилдөө харуусч өнгөрүүлсэн өдөр хоногууд олон. Ингэлээ
гээд хорсч занаж, урваж шарваагүй нь түүний гэнэн цайлган зангийнх.

\”Ах
нь хандиваа цуглуулаад тойрогтоо өрсөлдөнө өө” хэмээн тов тодорхой ярьж явсан тэрбээр гэнэт яагаад нэрээ татсаныг тухайн
өдөр нь л гадарлаж байлаа. Гомдсондоо чимээгүйхэн цааш хараад гэлдэрч буй хүний
араас \”уучлашгүй хэргийн эзэн” \”баярлалаа. баяртай” гэх нь бахархал ч юм шиг, басамжлал
ч юм шиг.

 

М.Батчимэг гишүүн цахим хуудсаараа дамжуулан Р.Амаржаргал гишүүнд \”Сүүлийн өдрүүдэд намайг дэмжиж, зоригжуулж, заавал
дэвшээрэй гэсэн захиа даалгаврыг итгэл найдвартай хамт өгч байсан бүх хүмүүст
гүн талархлаа илэрхийлье. Би хичээх болно оо. УИХ-д дэвшихээс сайн дураараа
татгалзаж эмэгтэйчүүдээ дэмжсэн Р.Амаржаргал гишүүндээ их баярлалаа! Монголын
төрд олон жил зүтгэсэн туршлагатай улс төрч таны итгэлийг алдахгүй амжилт
гаргах том хариуцлага ирж байгааг ухамсарлаж байна. Төр түвшин, түмэн олон
амгалан байх болтугай\” хэмээх үгийг дайжээ.

Эрдэнэтэд нэр дэвших гээд \”гологдсон”
М.Батчимэг тойроггүй болж энэ удаагийн сонгуулиас мултрах нь тодорхой болоод
байв. Үүний дараа тэрбээр хүн чанараа гээдэг болохоор барагтай л бол хүмүүс
сонгодоггүй нэгэн аргыг ашиглахаар шийдэв. Хор найруулж байгаад хэн нэгэн нэр
дэвшигчийг жийж, тойргийг нь булаадаг энэ арга амжилттай хэрэгжиж Р.Амаржаргал
жийгдэж, тойрог нь М.Батчимэгт очив.

\”Ерөнхийлөгчийн хүн” гэгддэг М.Батчимэг
тойроггүй болсон ч түүнийг тавьж явуулахгүй гэсэн их том хүч үйлчилж Р.Амаржаргалыг
АН-ын ҮЗХ-ны хурлаас нэрийг нь татуулж, М.Батчимэгт боломж олгов. Ингэхдээ
намынхаа эсрэг хэд гурван үг хэлсэн Р.Амаржаргалын шүүмж үгээр
шалтаглан түүнийг жийжээ. АН-ын тулхтай гишүүн Р.Амаржаргалыг \”тагнуулын хэрэг”-т
хардагдаж байсан М.Батчимэгээр сольсныг АН-ын анхан шатны байгууллагынхан нэлээдгүй шүүмжилж, хэл ам гарсан.

Гэсэн ч Р.Амаржаргал, Л.Цандэлэг нарын намаа
шүүмжилсэн хүмүүсээс энэ удаагийн сонгуулиар салахаар шийдэж, шинэчлэгдэж
өөрчлөгдөхгүй гэдгээ битүүхэндээ зарласан АН Р.Амаржаргалд хамгийн хэцүү учрааг
оноолт тааруулсан. Сүхбаатар-Багануур дүүргийн 61 дүгээр тойрогт Р.Амаржаргалыг Ерөнхий сайд асан, МАН-ын Сү.Батболдтой
тунаж үлдээсэн юм. Гэхдээ тэд хүч тэнцүү өрсөлдөгчид. Тиймээс хэн нэг нь ялагдахад харамсах сэтгэлэ төрөм тийм л үзүүштэй өрсөлдөөн өрнөх байлаа. Гэсэн ч Р.Амаржаргалын оронд АН-ынхан М.Батчимэгийг Сү.Батбодтой өрсөлдүүлэхээр болж байгаа нь дэндүү хүч тэнцвэргүй тулаан гэлтэй. Нөгөө
талаас саяхнаас АН-д тойрог солих гэсэн хөдөлгөөнүүд мэдрэгдээд эхэлсэн. Бодвол энэ мэт
хүч тэнцвэргүй тулаанаас зайлагсад л барилдахаасаа таахалзана гэгчээр бусдадаа
бөөн төвөг удаж байгаа бололтой юм даг.