Ирэнэ Гинэр-Райхэль: Австри Улсаас Монгол Улсын Засгийн газарт хоёр дахь удаагаа зээл олгоно

 

 

 

 Австри Улсаас
Монгол Улсад томилогдсон Онц бөгөөд бүрэн эрхт Элчин сайд, хатагтай Ирэнэ
Гинэр-Райхэль эдгээр өдрүүдэд манай оронд айлчилж байна. Хатагтай Райхэль
Бээжин дэх Австри Улсын Элчин сайдаар ажиллахаас гадна Монгол Улсын Элчин
сайдын албыг давхар хашдаг юм. Тэрбээр 8-12-ны өдрүүдэд манай оронд
ажиллах ба энэ үеэр эртний түүхт хоёр орны харилцаа, хамтын ажиллагаанд тустай нэлээд
хэдэн ажлуудад оролцох юм байна. Үүний хамгийн том нь, Австри Улсаас Монгол
Улсад олгох 40 сая еврогийн зээлэнд гарын үсэг зурах ажил аж. Ирэх 11 дүгээр
сард Монгол, Хятад дахь үүрэгт хугацаагаа дуусгаж нутаг буцах хатагтай Ирэнэ
Гинэр-Райхэлийг Монгол Улсад ирээд байхад нь хэдэн асуултад хариулт авсан юм.

-Монгол Улсын Гадаад хэргийн яамнаас мэдээлэхдээ Австри Улсад Монгол Улсын
2500 гаруй иргэн ажиллаж, амьдарч, сурдаг гэсэн. Үүний 1000 гаруй нь танай улсад хууль бусаар амьдарч байгаа аж. Австри Улс гадны цагаач иргэдийг албадан
гаргах ажлын хүрээнд Монгол
Улсын цагаач иргэдийг ч мөн албадан гаргахаа мэдэгдсэн. Үүнд танай оронд хууль
бусаар амьдарч буй 1000
гаруй Монгол иргэн хамрагдах уу. Эсвэл нийт амьдарч буй 2500
гаруй Монгол иргэн хамрагдах уу. Монгол иргэдийг албадан гаргах хугацаа яг
хэзээнээс эхлэх вэ. 10 хоногийн дотор сайн дураараа гарвал 500 еврогийн
урамшуулал олгоно гэсэн мэдээлэл гараад байгаа.
Хэрвээ 10 хоногийн хугацаа нь өнгөрвөл Монгол иргэдийг албан гаргахдаа торгох, дахиж танай улсад
оруулахгүй байх зэрэг шийтгэл оногдуулах болов уу?

-Европт тулгамдаад буй цагаачлалын асуудал Бүгд найрамдах Австри Улсад ч
мөн тулгараад байна. Тиймээс Засгийн газар гадны цагаач иргэдийг нутаг буцаах
ажлыг үе шаттайгаар хийхээр болсон. Монгол Улсын хувьд хууль бусаар амьдарч буй
1000 гаруй иргэнийг нутаг буцаахаар төлөвлөсөн. Монгол Улсад дайн дажин
болоогүй, хүнд нөхцөлд амьдраагүй учраас Австри Улсад хууль бусаар оршин сууж
буй 1000 гаруй Монгол иргэн Засгийн газрын шаардлагыг хүлээж аваад хугацаандаа
нутаг буцах нь зөв. 

-10 хоногийн дотор гарвал
500 еврогийн урамшуулал өгнө гэсэн. Энэ 10 хоногийн хугацаа нь хэзээнээс эхлэх
вэ?

-Үүнийг сайн мэдэхгүй
байна. 

–Та
ирэх 11 дүгээр сард Монгол Улсын Элчин сайдын албан тушаалаа хүлээлгэн өгөх юм
байна. Таны дөрвөн жилийн бүрэн эрхийн хугацаан дахь хоёр орны харилцаа, хамтын
ажиллагааг дүгнэвэл?

Тиймээ, ирэх 11 дүгээр сард миний Монгол дахь бүрэн эрхийн хугацаа
дуусна. Үүнийхээ дараа Бразил Улс
дахь Австрийн Элчин сайдаар дөрвөн жил ажиллаад тэтгэвэртээ сууна. Миний
ажилласан дөрвөн жилийн хугацаанд Монгол-Австрийн харилцаанд маш том
шинэчлэлүүд бий болсон. 2013 онд Австри-Монгол Улсын хооронд дипломат харилцаа
тогтоосны 50 жилийн ой болсон. Энэ ойгоос хойш хоёр орны харилцаа улам ойр
дотно болсон. Австри Улстай 1963 онд Англи Улс дипломат харилцаа тогтоосны
дараа тухайн онд Монгол Улс манай оронтой дипломат харилцаа тогтоосон. Манай
улсын анхдагч холбоотны нэг. Тиймээс Австри Улс Монгол Улстай илүү ойртож ажиллах сонирхолтой байдаг. Австри Улсын зүгээс Монгол Улстай хамтарч ажиллах хүрээнд Монгол Улсын Засгийн газарт хоёр дахь удаагаа зээл олгох гэж байна. Энэ удаад Монгол Улсад 40 сая еврогийн зээл олгоно. Гэхдээ энэ удаад зээлийг хувийн хэвшилд бус улсын секторт зарцуулна. Эмнэлэг тохижуулах, зам талбай тавих, төвийн шугам хоолой засах гэх мэт ажлуудад илүү зарцуулагдах болов уу. 

-Уучлаарай өмнөх зээлийг хэдэн онд авсан бэ?

2013 онд. 

Сонирхуулахад, Элчин сайд хатагтай Ирэнэ Гинэр-Райхэлийн Монгол Улсад айлчилж буй гол ажил нь Засгийн газарт зээлэх 40 сая евро /90 тэрбум төгрөг/-гийн зээлийг баталгаажуулж гарын үсэг зурах ажээ. Харин үүнээс өмнө буюу 2013 онд Австриас хэдэн сая еврогийн зээл авсан эсэхийг албаны хүнээс тодруулахад \”Сайн мэдэхгүй байна. 40 сая евро хүрэхгүй байхаа. Миний үзэж буйгаар 20 юм уу 30 сая евро байх аа\” гэсэн юм. Ямартай ч, манай Засгийн газар Австри Улсаас хоёр удаа зээл авч байгаа нь энэ аж.   

 Төгс