“Азарга түрүүлэхгүй бол гүүгээ уралдуулна”

УИХ-ын 2016 оны
сонгуульд оролцох 498 хүн нэр дэвшигчийн үнэмлэхээ гардаж авсан.
Тэдэнд дунд тангараг тасарсан ах дүү хоёр, тангараг тасраагүй эгч дүү
хоёр, ах дүү хоёр, нэг айлын хоёр хүргэн, бие биенээ дэмждэг гэр бүлийн хоёр,
нэг нэгнээ дэмждэггүй эхнэр нөхөр, нөхөртэйгээ
хүртэл өрсөлддөг албан тушаалын хэнээтэй авгай нар гээд сонин содон олон хүмүүс
байна. 

Түүнчлэн тэдэнд дунд жолооч, багийн ахлагч, бага ангийн багш, ресепшн, хөтлөгч,
ажил хөдөлмөр эрхлэдэггүй болон хувиараа хөдөлмөр эрхлэгч гэсэн ажил,
мэргэжилтэй хүмүүс нэлээд хэд байна. Гэхдээ энэ удаагийн сонгуулийн хамгийн сонин
содон зүйл \”эхнэрүүдээ сойх моод” юм. Яг л \”азарга маань түрүүлэхгүй бол гүүгээ
уралдуулна\” гэдэгтэй адил зүйл болж байна. 

Төрсөн нутаг Хөвсгөлөөсөө \”хөөгдөж”,
Ард түмний намаа Ард түмнээ хайрлая нам болгон өөрчилсөн Л.Гүндалай энэ
удаагийн сонгуульд Орхон аймгийн 48 дугаар тойрогт үзэхээр болсон ч Эрдэнэтчүүдийг \”өтгөн, шингэн”-ээр нь дуудчихсан учир царайг нь дахин харах
эрхгүй болчихоод байгаа юм. Ямар сайндаа Эрдэнэтчүүд \”Л.Гүндалай биднийг чацга
царайлаад явцгаа гэсэн. Өөрийг нь энэ сонгуулиар чацга царайлуулаад хөөж
явуулнаа” хэмээн занаад байсан юм. 

Тиймээс ч тэр үү Л.Гүндалай Эрдэнэтийн 48
дугаар тойрогт эхнэр Л.Аззаяагаа сойж буйгаа мэдэгдэж, \”Орхон
аймагт нэр дэвшихээр ажиллаж байсан ч эрх баригчид гурван жижиг тойрог болгон
хувааж хор найруулсан учраас өөр
тойрогт нэр дэвшихээр болж өөрийн тойргоо эхнэртээ өгсөн” гэдгээ тайлбарласан. Түүнчлэн эхнэрийг
маань Л.Гүндалай байна гэж бодоод дэмжээрэй гэсэн байдаг. 

Тэгвэл экс Ерөнхийлөгч, МАХН-ын дарга Н.Энхбаярыг эрх баригчид энэ удаагийн
сонгуульд нэр дэвших эрхийг нь хязгаарласны улмаас тэрбээр өөрийн 75 дугаар
тойргоо эхнэр, Тэргүүн хатагтай асан О.Цолмондоо өгсөн. Ингэснээр Н.Энхбаяр
гарах нь тодорхой гэгдэж байсан Сонгинохайрханы 75 дугаар тойрог илүү
өрсөлдөөнтэй болж ирсэн. 

 

Тэгвэл Ховд аймгийн 35 дугаар тойрогт нэг айлын хоёр
хүргэн С.Бямбацогт, Д.Батцогт нар нэг тойрогт хоёр өөр намаас нэр дэвшин өрсөлдөх
гэж байна. Эгч дүү хоёрыг нэг нэгэн рүү нь хяламхийлгэж буй баз хүргэдүүдийн
тулаанд амандаа сахалгүй ч ах настайгаараа С.Бямбацогт ялж МАН-д нэг суудал
авчрах уу эсвэл түрүүлж ургасан чихнээс сүүлд ургасан эвэр урт гэгчээр АН-аас
нэр дэвшиж буй Д.Батцогт ялах уу гэдэг нь тодорхойгүй байна. Магадгүй Д.Батцогт
хадам эгчдээ ад үзэгдэхээс эмээсэндээ тахимаа өгөх тохироо хийсэн байж болох
юм. 

Харин Завханы 18 дугаар тойрогт ах дүү хоёр хүч үзэх гэж
байна. Ах дүүс хоёр өөр намаас хоорондоо тулж, тангараг тасраад овоо гайгүй
болох нь уу гэтэл улам бүр холдох шинжтэй. \”Нарантуулын босс” Ш.Сайхансамбуу
Завханд дүү Ш.Батсамбуутайгаа нүүр тулах бөгөөд Ш.Сайхансамбуу Тусгаар тогтнол,
эв нэгдэл эвслээс, Ш.Батсамбуу МАН-аас нэр дэвшиж байна. 2008 онд Завхан
аймгаас сонгогдож УИХ-ын гишүүн болж байсан Ш.Сайхансамбуу 2012 онд Завханаас
дахин сонгогдох өндөр боломжтой байсан гэдэг ч МАН-аас тухайн үед түүнд тойрог
өгөөгүй. Түүнчлэн энэ удаагийн сонгуульд ч мөн тойрог өгөөгүйгээс
Ш.Сайхансамбууг МАН-аас гарч Г.Уянгын тэргүүлсэн Тусгаар тогтнол, эв нэгдлийн
намд элссэн гэдэг.

 

Учир мэдэх хүмүүсийн яриагаар, Ш.Сайхансамбуу \”Нарантуул”-ын
газартай холбоотойгоор МАНАН-дуулсан аж. Мөн дүүтэйгээ ч \”Нарантуул зах”-тай
холбоотойгоор маргалдаж тангараг тасарсан гэнэ. Товчхондоо, Ш.Сайхансамбуу анх \”Нарантуул”-ыг
байгуулахад мөнгө дутаж дүү Ш.Батсамбуугаасаа хэдэн төгрөг зээлжээ. Энэ мөнгө
нь тухайн үед \”Нарантуул”-ыг босгосон хөрөнгөний 16.1 хувь нь байсан аж.
Ш.Сайхансамбуу ч зээлсэн мөнгө эргүүлээд төлж, харин өндөр ашигтай \”Нарантуул”-ыг
хамт байгуулцаж байсны хувьд дүү нь захын ашгийн 16.1 хувийг эзэмших гэсэн аж.
Үүнээс энэ хоёрын маргаан эхэлж, тангараг тасрах дээрээ тулсан гэнэ.

 

Түүнчлэн \”Нарантуул”-д
гарсан саяхны галын хэрэгтэй холбогдуулан гал тавьсан хэрэгт Ш.Сайхансамбуу
төрсөн дүүгээ хардаж байна гэх зэрэг мэдээлэл цацагдсан. Ямартай ч, ах дүүс
ингэтлээ нэгэндээ өширхөөгүй гэж найднам. 

 

Энэ мэтчилэн энэ удаагийн сонгуульд ажилчдаа дарамтлаад
сурчихсан, ааш ямбаараа хатан хаанаас ч дутахгүй, нөхөртэйгээ хүртэл албан
тушаал, эрх мэдэл, эд хөрөнгөөрөө өрсөлддөг компанийн захирал хатагтай нар зөвхөн гэр бүлийн хүнээ
дийлэх гэж, түүнээс түрүүлж улстөрд хөл тавих гэж сонгуульд нэрээ дэвшүүлсэн байх юм. За ёстой бүү мэд, 60 чавганц уралдахад нэг нь түрүүлдэг шиг сонголтгүй хэдэн нөхдөөс нэг нь сонгогдох л байх, тэгээд 76 бүрдэх байх.