БНСУ-д ажиллаж, амьдарч байсан он жилүүд – 2 /цуврал/

 

 

… ЯНАГ АМРАГ ГЭГЧ НЬ

   ЭМЗЭГХЭН ГЭДЭГ НЬ ЯАХ АРГАГҮЙ

   ЯЛЬГҮЙ ЖААХАН ХӨНДВӨЛ

   ЭМТЭРЧ ЭВДРЭХ НЬ ХЯЛБАРХАН … Д. НАЦАГДОРЖ

 

   Гэр бүл болохдоо нэг нэгэндээ хайртай байж л гэрлэхгүй бол сүүлдээ хагарал үүсч, эхэлдэг юм билээ. Би л хайртай  бол боллоо гэж өрөөсгөл хандсанаас эцэстээ гэр бүл салдаг бололтой…

   Бидний үед бүх юм хаалттай учраас гэр бүл, эр, эмийн харьцааны талаар ямарч мэдлэггүй, зөвхөн физилогийн шаардлагаар нэгэндээ хандаж байснаас, нөгөө нь сэтгэл дундуур үлдэх, улмаар сэтгэл нь хөрч, гэр бүлийн хооронд хэрүүл, маргаан гарч, цаашид хардалт үүсч, сайхан эхэлсэн амьдрал маань ганхаж эхэллээ! Ардчилал эхэлснээр сонин, хэвлэл чөлөөтэй болж, \”Халуун хөнжил”, \”Янаг хорвоо”, \”Алаг хорвоо” гэх мэтийн эротик сонинууд, секслогч Болдцэрэнгийн \”Эр эмийн ёс” ном гарч, анх удаа эр, эмийн харьцааны талаар мэдээллийг ихээр нийтлэх болсон боловч миний хайгаад, хүсээд байгаа зүйлийн талаар байдаггүй.

   Зөвхөн гадаад орны Эротик өгүүллэгүүд, баахан шалдан хүүхний зурагнаас өөр хүний амьдралд үүсээд буй тэр чухал асуудлын талаар ганц ч үг, өгүүлбэр гардаггүй…Гэхдээ нэг үеэ бодвол овоо мэдээлэл авч байлаа.

   Эхнэр маань энэ талаар уншдаггүй. Тэр талаар ярьвал балайр, заваанаар нь дуудаад сонсдоггүй. Багаасаа энэ талын мэдээлэлгүй өссөн. Мөн тэр үеийн охид, бүсгүйчүүд, Монгол цэвэр ичимтгий зантай, эр, эмийн харьцаанд зөвхөн эрэгтэй нь давамгайлах ёстой гэсэн үзэл тогтсон нь их нөлөөлсөн байх гэж би боддог юм.

   Би анхнаасаа л олон хүүхэдтэй, айлын охинтой сууж, түүнийгээ гоё хувцаслаж, сайхан амьдруулна гэсэн зорилготой байсан тул өөрийгөө орхих үе байсан.

   Би армиас халагдахдаа, өмсөх энгийн хувцас юу ч үгүй, нормын ногоон хувцаснаас өөр юмгүй л хүн байлаа шүү дээ…Тэгээд ч зорьсондоо хүрч чадахгүй, эхнэртээ эгч нарынх нь хуучин хувцасыг худалдан авч өгөх үе хүртэл байсан.

   1996 онд Ардчилсан Холбоо Эвсэл сонгуульд олонхи болж, төрийн эрхийг барьж, мал, үйлдвэр, орон сууц, байгууллагуудын мэдлийн байруудыг хувьчилах ажлыг түргэтгэж, хувьчилах хуулийг гаргасан. Тэр үед Төрийн өмчийн хорооны дарга З.Энхболд \”Төр өмчөө мэдье” гэдэг алдарт үгээ хэлж билээ…

   1997 онд би байгууллагынхаа байрны даргаар сонгогдож, З.Энхболдын тэр алдарт үгийг хэлж, байрныхаа дотоод эмх журамд өөрчлөлт хийж, цахилгааны болон байрныхаа мөнгийг олон жилээр төлөөгүй, айлуудын амьдарч байсан өрөөг багасгах, байрнаас зохиогдож буй үйл ажиллагаанд оролцож байгаа хүмүүсийн байрны нөхцлийг нь сайжруулах, байраа хувьчилалд бэлтгэж, халуун, хүйтэн усны системд их засвар хийлгэж, байрныхаа зургийг архиваас олох зэрэг ажлуудыг хөөцөлдсөөр…

   Энэ үед миний байрандаа хийж буй ажлын талаар 81-р суваг сонины нэгэн дугаарт Лхагваагийн бичсэн \”Их газрын ТИТАНИК архин далайд живэх гэж үү” гэсэн нийтлэлд цухас дурдагдсан байсан.

   Би 2000 оны 7 сард байгууллагынхаа байрыг хувьчилж, оршин суугчдад, байраа хувьчилан авсан эрхийн бичгийг нь гардуулан өгч, байрны даргын ажлаа Должин гуайд хүлээлгэн өгсөн.    

 

Үргэлжлэл бий