“Евро-2016”-гийн өрсөлдөгчдийг шинжихүй

 

Хэсэг бүрээс хоёр баг, түүнчлэн хэсэгтээ 3 дугаар байр эзэлсэн 6 багаас тоглолтын үзүүлэлтээрээ давуу 4 баг нийт 16 баг хасагдах шатанд шалгарна. Иймд шигшээ тоглолтод үлдэх багууд 7 тоглолт хийх ёстой болж байна.

2008 оны 9 дүгээр сард Европын хөлбөмбөгийн холбооноос /УЕФА/ гаргасан шийдвэрийн дагуу тивийн аварга шалгаруулах тэмцээнд 16 улсын шигшээ баг оролцдог байсныг 24 болгож нэмэгдүүлсэн билээ. Эдгээр 24 багийг сонгон шалгаруулах урьдчилсан шатны тэмцээнд 54 улсын шигшээ баг оролцсоноос 23 нь шувтаргын шатанд шалгарч үлдсэн бол тэдэн дээр зохион байгуулагч орон болох Францын шигшээ баг нэмэгдэж байна.

А хэсэг

Энэ хэсгээс талбайн эзэн францчууд плей-оффт шалгарах нь ойлгомжтой гэж мэргэжилтнүүд таамаглаж байна. Энэ багтай харьцангуй сулд тооцогдох Румын, Албани, Швейцарийн багууд өрсөлдөх юм.

Францын шигшээгийн хувьд олон давуу тал бий. Тухайлбал, нутагтаа тоглож байгаа, залуусын эрч хүчийг ахмад тамирчдын туршлагатай хослуулна, томоохон тэмцээнүүдэд /ДАШТ-1998, ЕАШТ-2000/ Францын шигшээд тоглон аваргалж байсан Дидье Дешам ерөнхий дасгалжуулагчаар ажиллана гэдгийг дурдах нь зүйтэй.

Харамсалтай нь, хамгаалагч Рафаэль Варан, Жереми Матье, хагас хамгаалагч Лассана Диарра нар бэртэлтэй байгаа бол довтлогч Карим Бензема спортод хамаагүй шалтгаанаар энэ удаагийн ЕАШТ-д оролцож чадахааргүй болжээ. Гэсэн хэдий ч хагас хамгаалагч Н\’Голо Канте, Поль Погба, довтолгооны гурвал болох Антуан Гризманн, Оливье Жиру, Димитри Пайе нар \”формдоо орж” бэлтгэл тун сайтай байгаа тул дээрх \”гарз хохирол”-ыг нөхөж чадах юм.

Харин францчуудад эсэргүүцэл үзүүлж чадахаар тоглолт гаргах баг бол Швейцарийн шигшээ юм. Тус багийн бүрэлдэхүүнээс хагас хамгаалагч Гранит Жак, Жердан Шакири, хамгаалагч Штефан Лихтштайнер, Рикардо Родригес нарыг онцолж болно. Албани болон Румыний багуудын хувьд хасаглах шатанд шалгарах магадлал бага байна. Румыний шигшээгийн тоглогчдоос багийн ахлагч, төвийн хамгаалагч Влад Кирикеш /”Тоттенхэм”, \”Наполи” багуудад тоглож байсан/, хаалгач Чиприан Тэтэрушану /Фиорентина/ нар туршлагатайд тооцогдох бол албаничуудаас багийн ахлагч, төвийн тоглогч Лорик Цан /Лацио/-г дурдаж болох юм.

В хэсэг

Энэ хэсгээс Английн шигшээ нэгээр гарах болов уу гэж мэргэжилтнүүд таамаглаж байгаа ажээ. Учир нь, энэ багт өнгөрсөн улиралд Английн \”Премьер Лиг”-т аваргалсан \”Лестер Сити” болон удаалсан \”Тоттенхэм”-д гялалзсан тоглолт үзүүлсэн хэд хэдэн залуу хөлбөмбөгчид байгаа юм. Тэд бол 25 гоол хийсэн Харри Кейн болон Жейми Варди /24 гоол/ нар билээ. Харин Английн шигшээгийн түүхэн дэх хамгийн шилдэг довтлогч Уэйн Руни, төвийн хамгаалагч Гари Кэхилл болон хаалгач Жо Харт нарын тоглолтын арвин туршлага Английн шигшээд дэм болох нь дамжиггүй.

Хэсгийн нөгөө гурван баг болох ОХУ, Уэльс болон Словакийн хувьд тун жигд бүрэлдэхүүнтэй байгаа. Одод гэж хэлж болох Словакийн Марек Гамшик, Юрай Куцка, Владимир Вайсс нар төвийн шугамд тоглох бол ОХУ-ын Леонид Слуцкий-гийн дасгалжуулсан багаас Игорь Денисов, Алан Загоев нар бэртэлтэй байгаа учраас төвийн шугамд оросуудын хүч илт сулрах төлөвтэй байна.

Уэльсийн шигшээгийн хувьд, Испанийн Эзэн хааны \”Реал Мадрид”-д тоглож, \”Аваргуудын Лиг”-т хоёр удаа түрүүлсэн Гарет Бэйл болон ухаалаг тоглолттой Жо Аллен, Аарон Рэмзи гээд туршлагатай сайн тоглогчид бий.

С хэсэг 

Энэ хэсэгт дэлхийн аварга германчууд болон Украин, Польш, Умард Ирландын шигшээ багууд багтжээ. Германы дасгалжуулагч Иоахим Левийн хувьд, томоохон тэмцээнүүдэд оролцож, хат суусан тоглогчид болох Томас Мюллер, Мануэль Нойер, Матс Хуммельс, Тони Кроос нарт ихээхэн найдлага тавьж байгаа. 

Гэвч германчуудын өрсөлдөгчид болох Украин болон Польшийн багуудад уран хурц тоглолттой тоглогчид цөөнгүй. Тухайлбал, \”Севилья” клүбт тоглон \”Европын Лиг”-т аваргалсан Украины Евгений Коноплянка байна. Түүнээс гадна, Европын шилдэг клубүүдийн овоо хараанд ороод буй Андрей Ярмоленког нэрлэж болно.

Харин польшуудын хувьд, гоол хийх асар нарийн мэдрэмжтэй Роберт Левандовски гол найдвар нь болоод байна. Тэрбээр Мюнхений \”Бавари” клүбийн бүрэлдэхүүнд багтаж, 2015-2016 оны улиралд 50 тоглолтод оролцож, 42 гоол хийжээ.

D хэсэг

Хүчний тэнцвэрийн хувьд энэ хэсгийнхэн В хэсгийн багуудтай тун төстэй. Нэгээр гарах нь гарцаагүй гэж тооцогдож байгаа баг бол Европын аваргын цомыг хадгалж буй Испанийн шигшээ юм. 2014 онд Бразилд болсон ДАШТ-нд хасагдах шатанд шалгарч чадаагүй испаничууд багийнхаа бүрэлдэхүүнд зарим өөрчлөлтүүдийг хийсэн байна. Шави зодог тайлсан бол Хаби Алонсо, Санти Касорло нар шигшээд багтаж чадсангүй. Тэднийг авьяаслаг залуу тоглогчид болох Коке, Альваро Мората, Тьяго Алькантара нар орлоно.

Энэ хэсгийн нөгөө  гурван багийн хувьд ч мөн адил эрч хүчтэй залуу довтлогчид олон бий. Тухайлбал, Чехийн шигшээгийн Владимир Дарида, Томаш Нецид, Ладислав Крейчи болон Хорватын Лука Модрич, Иван Ракитич, Марио Манджукич, Иван Перишич, Туркийн Хакан Чалханоглу, Арда Туран нарыг нэрлэж болно.

Хорватууд хэсгээсээ хоёроор гарах болов уу хэмээн таамаглаж байгаа хүмүүс олон байна. Учир нь, хамгаалалтад Ведран Чорлука, Дарио Срна нарын туршлагатай тоглогчид байгаа юм.

Е хэсэг

Энэ хэсгээс Бельги, Италийн шигшээ баг гарна гэж үзэж байна. Бразилд болсон ДАШТ-ний үеэр Бельгийн шигшээ багт шинэ залуу үе өсөн бойжиж байгаа нь харагдсан билээ. Тэд бол Эден Азар, Аксель Витсель, Ромелу Лукаку, Раджа Наингголан, Кевин де Брейне нар юм. Харин төвийн хамгаалагч Венсан Компани бэртэл авсны улмаас тэмцээнд оролцохгүй болсон нь том \”гарз хохирол” юм.

Италийн шигшээгийн довтолгоо маш хүчтэй байх боловч дасгалжуулагч Антонио Конте-гийн боловсруулсан тактик ёсоор бол, гол хөзөр нь Леонардо Бонуччи, Жоржо Кьеллини, Андреа Барцальи нараас бүрдэх хамгаалалтын шугам юм. Энэ гурван тоглогч бол \”Ювентус” клубийг Италийн \”Сери-А”-д хоёр удаа түрүүлэхэд хувь нэмрээ оруулснаас гадна 2014-2015 оны \”Аваргуудын Лиг”-ийн финалд хүргэсэн тоглогчид билээ.  

Е хэсэгт тоглох Шведийн багт орчин цагийн хамгийн шилдэг довтлогчдын нэг болох Златан Ибрагимович байгаа нь ихээхэн найдвар төрүүлж байгаа юм. Харин ирландчуудыг хэсэгтээ сүүл мушгих болов уу гэж үзэж байна.

F хэсэг

Португал болон Австрийн багууд хасагдах шатанд шалгарах нь үндсэндээ тодорхой. Тус хэсэгт багтсан Исланд болон Унгарын багуудын хувьд олон улсын тэмцээний туршлага харьцангуй багатай гэж хэлж болно. Португалын шигшээд хөлбөмбөгийн түүхэн дэх шилдэг тоглогчдын нэг гэгддэг Криштиану Роналду тоглох бол түүнийг Пепе, Рикарду Карвалью, Жоау Моутинью, Нани нарын зэрэг туршлагатай тоглогчид дэмжих юм.

Австрийн багийн хувьд Марко Арнаутович, Златко Юнузович, Александр Драгович нарын жигд тоглолттой хөлбөмбөгчдөөс гадна Мюнхений \”Бавари”-д тоглодог Давид Алаба хэмээх \”универсал” тоглогч бий.  

Энэ хэсэгт Эйдур Гудьонсен, Гилфи Сигурдссон, Колбейнн Сигторссон, Альфред Финнбогасон нарын техник сайтай, туршлагатай тоглогчдын ур чадварын ачаар Исландын баг гуравт орох магадлал илүү өндөр. Харин Унгарын шигшээгийн манлай тоглогч бол Махачкала-гийн \”Анжи”, Москвагийн \”Динамо”-д тоглож байсан хагас хамгаалагч Балаж Жужак юм.