Авто машины улсын дугаарын стандартыг шинэчлэх тухай яригдаж эхлээд нэлээд олон жилийг үдэж байна. Тэгвэл энэхүү яриаг эцэс болгож энэ жилийн долдугаар сарын 01-ний өдрөөс олон улсын шаардлага хангасан, латин үсэгтэй, өнгөөр ялгардаг дугаарт шилжих юм байна.
Тээврийн хэрэгслийн улсын дугаар гэдэг бол тухайн тээврийн хэрэгсэлд олгож байгаа бүртгэлийн дугаар. Манай улсад олгож байгаа улсын дугаар 3 үсэг,4 тооноос бүрддэг. Гэвч энэ нь олон улсад “гологддог” аж. Тиймээс яаралтай автомашины улсын дугаарыг сольж, олон улсын стандартад нийцүүлэх шаардлага тулгарсан гэж хэлж болно.
Гэхдээ энд автомашины улсын дугаар солих нэрээр бизнес хийх гээд байна уу гэдэг хардлагыг давхар төрүүлж байна. Бүр Хууль зүйн Дотоод хэргийн сайд Ц.Нямдорж хүртэл ийм хардлагатай байгаа гэдгээ илэрхийлсэн. Тэрээр “Автомашины улсын дугаарыг солих гэж байгааг Хууль зүйн яам дэмжихгүй. Номер хийдэг бизнес л яваад байх шиг байна. Монголчуудаас цөөн тооны хүн л автомашинтайгаа хоёр хөрш рүү нэвтэрч байгаа. Зөвхөн үүний төлөө болж байгаа юмаа албадан солих тухай асуудал гаргаж болохгүй. Цагдаа нарт албадаж автомашины номер солих ажиллагаа явуулж болохгүй гэдэг үүрэг өгсөн. Хэрвээ номер сольж, шинэ стандарт руу шилжиж байгаа бол шинээр авах хүмүүстээ өг. Хуучныг албадаж, давхар бизнес хийж болохгүй гэж үүрэгдсэн” гэж тайлбарлаж байв. Гэхдээ сайдын тайлбар бол бүтэн жилийн өмнөх тайлбар юм. Одоо байдал өөрчлөгдөж, долдугаар сарын 1-ний өдрөөс автомашины дугаарыг шинэчлэх ажил явагдаж эхэлнэ гэдгийг албаны хүн хэлжээ.
Ер нь Монголчууд өдөр шөнөгүй, өглөө оройгүй өөрийн тээврийн хэрэгсэлтэйгээ хил даваад байхгүй. Тиймээс цөөн тооны тээврийн хэрэгсэлд хамаарах асуудлыг бусдад нь нялзааж байгаа нь цаанаа бизнесийн агуулгатай болох нь батлагдаад байгаа мэт. Энэ агуулгаар нэгэн цахим хэрэглэгч “Монгол Улсад нэг сая гаруй тээврийн хэрэгсэл бий. Нэг автомашины улсын дугаар солиход ойролцоогоор 60000 мянган төгрөг /улсын дугаар, гэрчилгээ, татварын гэрчилгээ … гэх мэт/. Тэгэхээр нийтдээ 60 тэрбум төгрөг болох нь. Манайхан яаж ийгээд л 60 тэрбум төгрөг босгох юм аа” гэж бичжээ.
Үнэхээр л яаран хийгдэж буй улсын дугаар солих ажил цаанаа ямар нэгэн зүйлийн санхүүжилт босгох гээд байгаа мэт харагдаж буй учир албаны хүмүүс иргэдэд үүсээд буй эргэлзээ төөрөгдлийг арилгах тайлбар шалтгаанаа хийх байх гэж найдаж байна.
Жич: Одоогийн мөрдөж буй тээврийн хэрэгслийн улсын дугаар тэмдэгийн стандарт 2002 онд батлагдан өнөөдрийг хүртэл мөрдөж байгаа. Энэ стандарт батлагдах үед Монгол Улсын хэмжээнд 142463 тээврийн хэрэгсэл бүртгэлтэй байсан.
