“Орон сууцны хөнгөлөлттэй зээлийн санхүүжилтийн журам”-ыг Засгийн газар өнгөрсөн онд батлан, энэ оноос эхлэн мөрдөж эхэлсэн билээ. Шинээр батлагдсан журмын талаар БХБ-ын сайд Х.Баделхан мэдээлэл өглөө.
Ипотекийн зээлийн санхүүжилт өнгөрөгч онд 309 тэрбум төгрөг байсан бөгөөд 4,676 зээлдэгчид санхүүжилт олгосон байна. Тэгвэл энэ онд санхүүжилтийг нэмэгдүүлж 500 тэрбум төгрөгт хүргэжээ.
Өнгөрөгч оны зээлийг задалбал,
• Монголбанкны эх үүсвэрээс 191 тэрбум төгрөгийн санхүүжилтийг 2,768 иргэнд,
• Засгийн газрын эх үүсвэрээс 118 тэрбум төгрөгийг 1,908 иргэнд олгосон байна.
Тэгвэл энэ онд Монголбанкнаас 192 тэрбум, улсын төсвөөс 300 орчим тэрбум төгрөгөөр санхүүжүүлэхээр болсон бөгөөд зээлийг Монголбанкаар дамжуулан банкуудад олгох аж. Монгол банкнаас ипотекийн зээлийг 1 %-иар олгох бол арилжааны банкууд 12-15%-тай олгоно. Ингээд дунджаар 8% буюу энэ жилийн зээлийн хүүнд өөрчлөлтгүй гэсэн үг юм. Харин 2020 оны нэгдүгээр сарын нэгнээс ОУВС-тай тохирсны дагуу Ипотекийн зээлийн хөтөлбөрийг Монголбанкнаас Сангийн яаманд шилжүүлнэ. Ингэснээр зээлийн хүү, урьдчилгааг бууруулах боломж бүрдэнэ гэв.
Мөн энэхүү зээлд хамрагдагсад орон сууцны талбайд тавигдах хэмжээг нэмэгдүүлэхийг ихээр хүсдэг. Мөн барилгын компаниуд ч борлуулалт нь зогссон олон барилга эзэнтэй болно гэж тайлбарладаг. Гэвч энэ удаад талбайн хэмжээг хуучнаар нь 80 м.кв-аар тогтоожээ.
Харин шинээр амины орон сууц барьж байгаа иргэдэд 360 сар хүртэлх хугацаатай зээл олгохоор болсон байна. Амины орон сууц нь 120 м.кв-аас илүүгүй хэмжээтэй, инженерийн дэд бүтэцтэй, эрчим хүчний хэмнэлттэй байх ёстой. Зээлийн нь дээд хэмжээ 60 сая төгрөг байхаар тусгажээ.
Түрээсийн орон сууцны хувьд одоогоор тодорхой шийдэлд хүрээгүй байгаа гэнэ. “Буянт-Ухаа 2” хорооллын 972 айлын орон сууцыг түрээсийн зориулалттайгаар барьсан ч Хөгжлийн банкнаас санхүүжүүлсэн 71 тэрбум төгрөгийг эргүүлэн төлөх шаардлагатай. Хэрэв Засгийн газар орон сууцны сан бүрдүүлэх зорилгоор энэ мөнгийг гаргахаар шийдвэрлэвэл “Буянт-Ухаа 2”-ийг бүхэлд нь түрээсийн орон сууц болгох боломжтой. Энэ саналыг БХБЯ Засгийн газрын хуралдаанд удахгүй оруулна гэж мэдэгдлээ.
