Э.Бат-Үүлийг АТГ-т өгчээ

 

Хан-Уул дүүргийн иргэн Б.Цэрэн болон түүний өмгөөлөгч Батрагчаа нар өнөөдөр Нийслэлийн засаг дарга бөгөөд Улаанбаатар хотын захирагч Э.Бат-Үүлийг албан тушаалаа урвуулан ашигласан гэдэг үндэслэлээр АТГ-т өглөө.

2013 оны 4-р сарын 6-ны өдөр Баянзүрх дүүргийн 12-р хорооны нутаг дэвсгэрт гэр хорооллын дахин төлөвлөлтийн ажлыг эхлүүлэх тендерийн шалгаруулалт болсон. Шалгаруулалтанд 3 консерциумын 11 компани оролцсон байна. Гурван консерциумын нэг нь Э.Бат-Үүлийн хүү Б.Чулуудайгийн байгуулсан Грандлайн компани болон Зуншин, Сайранбулаг гэсэн гурван компаний нэгдсэн консерциум юм. Тендерийн шалгаруулалт болоход нийт иргэдийн 75 хувийн саналаар Грандлайн компани нь гэр хорооллын дахин төлөвлөлтийн ажлыг эхлүүлэх эрхийг авч Нийслэлийн хөрөнгө оруулалтын газраас олон тэрбум төгрөгийг санхүүжилт болгон авчээ. Энэ нь нийслэлийн хөрөнгө оруулалтын газрын тайланд тусгагдсан гэдгийг ч иргэн Б.Цэрэн тодотгож байна. Хамгийн гол нь Э.Бат-Үүлийн хүү Б.Чулуудайгийн Грандлайн компани нь нь нийт иргэдийн 75 ба түүний илүү хувийн саналыг авч чадаагүй байхад хотын дарга Э.Бат-Үүл албан тушаалаа урвуулан ашиглаж гурван компанийн нэгдсэн консерциумд бус зөвхөн хүүгийнхээ Грандлайн компанийг ялагч болгосон нь хууль бус үйлдэл болж байгаа юм.

Э.Бат-Үүл дарга ийнхүү албан тушаалаа урвуулан ашигласанаас болж, түүний хүү Б.Чулуудай Грандлайн компаниараа дамжуулж төрөөс олон тэрбум төгрөг авсан, БЗД-ийн 12-р хорооны олон арван айл өрх хаусанд бус айлын хажуу өрөөнд түрээсийн мөнгө төлөн бор хоног өнгөрөөх гэсэн олон сөрөг үзэгдлүүд бодитоор бий болоод байгаа юм.