Л.Эрдэнэчимэг нэр дэвшигчийг ноцтой хэрэгт гүтгэсэн нь тогтоогдвол хүнд шийтгэл хүлээнэ

 

Л.Эрдэнэчимэг Х.Бат-Ялалтыг Г.Уянга гишүүний гар утсыг хулгайлж, бичлэгийг тараасан гэж мэдэгдэв

 

УИХ-ын гишүүн, УИХ-ын сонгуулийн 72 дугаар тойрог буюу Сонгинохайрхан дүүрэгт Ардчилсан намаас нэр дэвшигч Л.Эрдэнэчимэгийн Төрийн ордонд архи ууж, тамхи татаж, секс ярьж буй бичлэг олон нийтийн хүртээл болсон билээ. Энэхүү бичлэг \”Ийгл\” телевизийн \”Үнэнээ хэлэх мөч\” нэвтрүүлгийн хөтлөгч Т.Алтаншагайд илгээмжээр иржээ. Т.Алтаншагай УИХ-ын сонгуулийн 72 дугаар тойрогт бие даан нэр дэвшиж, Л.Эрдэнэчимэгтэй өрсөлдөж байгаа бөгөөд эндээс бичлэг улстөрийн шалтгаантай болох нь харагддаг. 

Улмаар Т.Алтаншагай өөрийн найз, \”Иргэдийн шударга шүүх\” ТББ-ын тэргүүн, хуульч, УИХ-ын сонгуулийн 71 дүгээр тойрогт бие даан нэр дэвшигч Х.Бат-Ялалтад хандан зөвлөгөө авч, бичлэгийг үзүүлснээр Л.Эрдэнэчимэгтэй холбогджээ. Тэгэхэд Л.Эрдэнэчимэг гишүүн \”Хэд хэрэгтэй юм. Дансаа өгчих\” гээд шууд 50 сая төгрөг шилжүүлсэн гэнэ. Үүний дараа Т.Алтаншагай, Х.Бат-Ялалт нар Л.Эрдэнэчимэгийг 50 сая төгрөг шилжүүлсэн баримтыг бичлэгийнх нь хамт олон нийтэд үзүүлсэн. Ингээд тэд эсвэл Х.Бат-Ялалт дангаараа Л.Эрдэнэчимэгтэй 200 саяар тохиролцох гээд мөнгөн дээрээ тохироогүйн улмаас бичлэгийг олон нийтэд үзүүлсэн, бичлэгийг 72 дугаар тойрогт МАН-аас нэр дэвшигч \”Их засаг\” их сургуулийн өв залгамжлагч Н.Учрал худалдаж авсан, бичлэгийг хийсэн Г.Уянга гишүүн гар утсаа алдсан, Г.Уянга гишүүн бичлэгээ алдаагүй зарсан гэх мэдээллүүд хөвөрч эхэлсэн. Үүнийг мэдээж хууль шүүхийн байгууллага эцэслэн тогтоох ёстой.

 

Харин эцэслэн тогтоогдоогүй байхад Л.Эрдэнэчимэг гишүүн \”Х.Бат-Ялалт Г.Уянга гишүүний утсыг хулгайлж бичлэгийг тараасан\” гэж мэдэгдэж, 71 дүгээр тойрогт бие даан нэр дэвшигч Х.Бат-Ялалтын нэр хүндэд сөргөөр нөлөөлөх мэдээлэл тарааж болохгүй. Ер нь энэхүү тавалжин /таван өнцөгтэй дүрс/ маргаанд нэр холбогдсон Т.Алтаншагай, Х.Бат-Ялалт нар бусдыгаа бодвол эрх мэдэл, ар тал багатай учраас нөгөө хэдийнхээ нөлөөлөлд автаж, тиймдээ ч \”хаяагаа манаад\” эхэлсэн. Учир нь, УИХ-ын гишүүн, эрх мэдэл бүхий хүмүүс өөрсдийнх нь буруу байсан ч Т.Алтаншагай, Х.Бат-Ялалт нарын сэтгүүлч, хуульчдыг хэлсэн өгүүлбэрийнх нь ганцхан үг, үсэг дээр нь тоглож өөрсдийг нь буруутан болгож шүүхээр гэм буруутай болгон яллуулдаг. Төрийн ордонд архи ууж, тамхи татсан нь Л.Эрдэнэчимэг гишүүний буруу. Тиймээс бурууг бусдаас хайж, асуудлын голыг өөр тийш нь хандуулж Төрийн ордонд архи ууж, тамхи татсан явдлыг байдаг л зүйл мэтээр ойлгуулж, увайгүй үйлдлийг нь илчилсний төлөө эргүүлээд харлуулах \”ажиллагаа\”-нууд маш ихээр явлаа. Асуудлын гол нь, Л.Эрдэнэчимэг гишүүний согтуу бичлэгийг хийсэн Г.Уянга гишүүн үнэхээр гар утсаа алдсан уу, аль эсвэл гар утсан дээрх бичлэгээ бусдад худалдаж, тэр нь явсаар Т.Алтаншагайд очсон уу гэдэг явдал юм.

 

Эндээс үйл явдал зөв хөвөрч, хэн нь буруутай, хэн нь буруугүй нь тодорхой болно. Одоогоор буруутай нь тодорхой болчихоод буй ганцхан хүн байгаа Л.Эрдэнэчимэг. Төрийн ордонд согтууруулах ундаа ууж, тамхи татсан. Тэр нь хөдлөшгүй баримтаар нотлогдсон. Гэхдээ Л.Эрдэнэчимэг, Г.Уянга цаашлаад Н.Учрал нарын нэр дэвшигчид энэ бичлэгтэй холбоотой асуудлыг сонгуулиас өмнө шалгуулахыг хүсэхгүй байх магадлалтай. Цаг хожиж байгаад ямар ч хамаагүй аргаар УИХ-ын гишүүн болчихвол дараа нь гэм буруутай нь тогтоогдсон ч ял шийтгэлгүй өнгөрнө хэмээн таамаглаж байгаа байх. Гэхдээ Төрийн ордонд тусгай хамгаалалт дор байгаа Г.Уянга гишүүний гар утсанд өөрийнх нь сонгуулийн ажилд ямар ч хамаагүй Л.Эрдэнэчимэг гишүүний ёс бус бичлэг байгаа гэж таамаглан Х.Бат-Ялалт хулгайлаагүй бол Л.Эрдэнэчимэг хуулийн хариуцлага хүлээх учиртай.

 

Магадгүй Л.Эрдэнэчимэг гишүүний гүтгэсэн мэдэгдлээс болж Х.Бат-Ялалтын нэр хүнд сэвтэж улмаар УИХ-ын сонгуулийн өрсөлдөөнд энэ нь нөлөөлсөн бол Л.Эрдэнэчимэгийг УИХ-ын гишүүнээр дахин сонгогдсон ч түүнийг гишүүнээс нь татах хэмжээнд хүртэл хуулийн хариуцлагыг ярих ёстой. Хэдийгээр эрх баригчид нэр дэвшигчидтэй нэр төрд халдсан, гүтгэлэг, доромжлолтой холбоотой асуудлыг сонгуулиас өмнө шийд гэдэг үүргийг шүүх, цагдаагийн байгууллагад өгсөн ч Л.Эрдэнэчимэг гишүүний ёс бус үйлдэл болон Г.Уянга гишүүний гар утсаа хаясан уу, эсвэл бичлэг зарсан уу гэдэг асуудал энэ сонгуулийн дараа л нэг тийш болох нь тодорхой байна. 

 

Төгс