АНЭУ-ын Дубай хотноо зохион байгуулагдаж байгаа Тусгай олимпын зуны 15 дугаар наадмын усан сэлэлтийн төрлөөс манай тамирчин Б.Элбэрэлт алтан медаль хүртлээ.
Тэрбээр эрэгтэйчүүдийн 25, 50, 100 метрийн ганцаарчилсан усанд сэлэлтийн төрөлд хүч сорьж байгаа бөгөөд 100 метрийн зайд алтан медалийн болзол хангасан байна.
Тэрбээр усан сэлэлтийн спортоор зургаан жилийн хугацаанд хичээллэж байгаа бөгөөд Хонгконгт болсон Зүүн Азийн бүсийн тэмцээнээс 25, 50 метрийн өврөөр даллах сэлэлтийн төрлөөс хүрэл медаль хүртэж байсан юм.
Үүнээс гадна энэхүү наадмын ширээний теннисний төрөлд ганцаарчилсан төрлөөр оролцсон У.Нинжбадам, Б.Амарболд нар хоёул мөнгөн медалийн эзэд болжээ.
Тэд өнөөдөр, маргааш хосын төрөлд хүч үзнэ. Б.Амарболдын хувьд 130 дугаар сургуульд суралцдаг бөгөөд ширээний теннисээр гурван жил хичээллэсэн бөгөөд олон улсын тэмцээнүүдээс найман медаль хүртээд байгаа аж.
Монгол Улс 2013 онд БНСУ-д болсон Тусгай олимпын өвлийн наадамд хоёр тамирчнаа илгээсний нэг нь У.Нинжбадам. Түүний анхлан алхсан энэхүү замаар манай улсын олон тамирчин алхаж, энэ удаагийн Тусгай олимпын наадамд найман төрөлд өрсөлдөх 28 тамирчин Абу Дабид ирээд байгаа талаар зохион байгуулагчдын зүгээс мэдээлж байна.
