Тамхины хэрэгтэй холбогдуулан ОХУ дахь Монголын ЭСЯ-наас мэдэгдэл гаргалаа

Украин улсын Дьяково боомтын хилийн шалган дээр Монгол Улсын хоёр иргэн \”Дипломат шуудан” гэх наалт бүхий найман хайрцаг тамхи хилээр нэвтрүүлэхээр завдаж байгаад баригдсан. Гадаад хэргийн яамнаас энэ талаар Будапешт дахь Элчин сайдын яаманд нарийн бичгийн дарга, зөвлөхөөр ажиллаж байсан Д.Дөхөмбаяр уг хэрэгт холбогдсон тухай өчигдөр мэдээлсэн.

Тэгвэл Монгол Улсаас ОХУ-д суугаа Элчин сайдын яамнаас энэ үйл явдалтай холбоотойгоор зарим хэвлэлд гарсан ташаа мэдээлэлд тайлбар-мэдэгдэл гаргажээ.

МОНГОЛ УЛСААС ОРОСЫН ХОЛБООНЫ УЛСАД

СУУГАА ЭЛЧИН САЙДЫН ЯАМНЫ МЭДЭГДЭЛ

Москва хот

2016 оны 6 дугаар сарын 20-нд монголын хэвлэл мэдээллийн хэрэгсэлүүдээр монголын дипломат их хэмжээний тамхи зөөж байгаад баригдсан гэсэн мэдээ тархсан байна. Уг хэрэгт холбогдогч хувь хүн нь Монгол Улсаас Бүгд Найрамдах Унгар Улсад суугаа Элчин сайдын яаманд эдийн засгийн зөвлөхөөр 2012-2015 онд ажиллаж байгаад эх орондоо бүр мөсөн буцаж, өндөр насныхаа тэтгэвэрт суусан юм байна.

Гэтэл ийм эзэн тодорхой, хөндлөнгийн хэргийг Монгол Улсаас Оросын Холбооны Улсад суугаа Элчин сайдын яам, Элчин сайдын нэр хүндэд нялзаан, улс оронд болж буй парламентын сонгуулийн сурталчилгааны кампанит цаг үеийн үйл явдалтай холбон башир зорилго агуулсан мэдээлэл цацаж байгаад харамсаж байна.

Болчимгүй, баримт нотолгоогүй ийм мэдээлэл нь хоёр орны харилцаанд ч сэв суулгах уршигтайг зориуд анхааруулан дээрх хэрэгт Москва дахь Элчин сайдын яам учир холбогдолгүй гэдгийг хариуцлагатайгаар мэдэгдэж байна.