Чингэлтэй дүүрэгт нэг айлын хаяг дээр 215 хүн шилжиж иржээ

МАХН-ын дэд дарга Э.Эрдэнэжамъян энэ талаар, \”Чингэлтэй дүүргийн 7, 8-р хороонд шилжиж ирсэн хүмүүсийн мэдээллийг нягтлахад нэг хаяг дээр 10-аас дээш хүн бүртгүүлсэн байна. Тухайлбал, Чингэлтэй дүүргийн долдугаар хороонд бүртгэлтэй нэг айлын хаяг дээр 214 хүн бүртгүүлсэн байх жишээний. Нэг айл, нэг хашаанд ийм олон хүн амьдрана гэдэг байж боломгүй зүйл шүү дээ. Монголчууд өнөөдөр нэг айлд хэдэн хүн амьдарч, байдаг вэ гэдгийг бүгд мэдэж байгаа. Гэтэл ийм муухай хүн хуурсан, хууль зөрчсөн үйлдэл гаргаж байгаад бидний хувьд гомдолтой байна.

Ганцхан Чингэлтэй дүүрэг биш бусад дүүрэг, орон нутгуудад ч ийм булхайтай зүйл явагдаж байна. Төв аймагт л гэхэд нэг хороонд нэг шөнийн дотор 300 гаруй хүн шилжсэн байгаа юм. Баянгол дүүргийн нэг хороон дээр нэг айлын хаяг дээр 350-400 хүн шилжиж очсон байна. Түүнчлэн намын ухуулга сурталчилгаа хийж байгаа түрээсийн байр, хорооны засаг даргын гэрийн хаяг дээр хүртэл сонгогч шилжилт хөдөлгөөн хийсэн байна. Энэ бүхэн зохион байгуулалттай, хууль зөрчсөн үйл ажиллагаа. Үндсэндээ 2016 оны сонгуулиар МАХН ялах буюу хамгийн олон сонгогч авах боломжтой нөхцөл байдал үүсч байгаа. Гэтэл сөрөг хүчин энэ бүхнээс айж, ард түмэн сонгогчиддоо итгэхгүй, тэднийхээ саналд найдахгүй ингэж будлиантуулж байна. Чингэлтэй, Хан-Уул, Баянгол гэх зэрэг нэр бүхий нэлээн олон тойрог дээр ийм нөхцөл байдал үүсч байна. Үнэхээр ингэж сонгогчдоо нүүлгэн шилжүүлж тухайн тойргийнхоо иргэдийг доромжлох байсан юм бол, сонгох эрхийг нь булааж авах байсан юм бол Сонгуулийн хуулиа ингэж шинэчлэх шаардлагагүй байсан юм биш үү гэж хэлмээр байна. Энэ луйвар булхиагаа зогсоохыг шаардаж байна. Хэрвээ энэ бүх луйвраа зогсоохгүй бол 2008 оны сонгуулиас долоон дор юм болно\” гэлээ.

Мөн хэвлэлийн хуралд, МАХН-аас Чингэлтэй дүүргийн нэр дэвшигч Ц.Эрдэнэчулуун, А.Даваасүрэн нар хүрэлцэн ирж, өөрсдийн тойрогт гарч буй зөрчлийн талаар мэдээлэл өглөө. Тэд хэлэхдээ   \”Нөхцөл байдал луйвар булхайтай байгаа учраас учрыг нь олохоор хандаж байна. Гэтэл холбоглох хүмүүс, байгууллагууд анхаарал хандуулахгүй, амжилт олохгүй байна. Засаг дарга, нар нь та нар ухуулгаа л хий, бидний ажилд хөндлөнгөөс бүү оролц гэх юм. Тэгш байдал, хууль дүрэм тэнд алга. Бас нэг зүйлийг хэлэхэд, нас барсан хүнийг байгаагаар бүртгэсэн, гадаадад байгаа хүмүүсийг бүртгэсэн зөрчил их байна. Иргэний үнэмлэхний хуулбар худалдаж авч байгаа зөрчил илэрсэн. Ийм байхад сонгууль явуулж болох юм уу\” гэдгийг онцоллоо.

Д.Дуулим

Эх сурвалж: ZuvSongolt.mn