Ард түмэн АН-д л итгэж байгаа гэж үнэн үү?

\”Ардчилсан намын рейтинг маш сайн байгаа. Бусад намууд зориуд гүтгээд байгаа болохоос ард түмэн Ардчилсан намд л итгэж байгаа” гэж З.Энхболд дарга Үндэсний олон нийтийн телевизээр ярьжээ. Үгүй яахав, өөртөө итгэлтэй, намдаа итгэлтэй байна гэдэг сонгууль хаяанд тулсан энэ цаг мөчид тун чухал л даа. Гэхдээ бодит байдлаас хэт тасарч хэлж ярих нь цаагуураа бол түмний дунд элэг доог болгоод золигийн л доо. Тэр үүднээсээ заримдаа Зи даргын хэлж ярьж байгааг сонсоход халуухан л байх юм. Үнэндээ бол 2014 оноос хойшхи судалгаанаас харахад Ардчилсан намын рейтинг унаж ирсэн байгаа юм. Тухайлбал, \”Шинэ Эрин” төвөөс Стратеги академи, \”Сант марал” сан, MPO зэрэг судалгааны мэргэжлийн байгууллагаас 2014 оны 3-4 –р сард гаргасан дүнг харьцуулан  улс төрийн намын рейтингийг харахад  Ардчилсан нам-42.1 хувь, Монгол Ардын нам-24.5 хувь, Монгол ардын Хувьсгалт нам-11.2 хувь гэсэн дүн гарч байсан байдаг. Харин нэг жилийн дараа буюу 2015 оны 3-4-р сар гэхэд \”Сант марал” сангийн судалгаагаар АН-38,9, МАН-33,0, МАХН-18,9 хувийн санал тус тус авсан байдаг. Тэгвэл энэ жилийн 1-2-р сард \”Максима” төвөөс явуулсан судалгаагаар АН тэргүүлэх байр сууриа алдаж, 25,3 хувиар хоёрдугаарт бичигдэж, МАН 31,6 хувийн саналаар нэгдүгээрт бичигдсэн байгаа юм. За харин МАХН-ын тухайд өмнөх жилийн рейтингээ хадгалж 18,5 хувьтай гарчээ. Тэгэхээр З.Энхболд даргын хэлж яриад байгаа шиг ард түмэн АН-д л итгэж байгаа бол 42.1-ээс 25.3 болтлоо олон нийтийн дунд үнэ цэнээ алдана гэж байх уу даа.

Ер нь тэгээд АН-ын нэр хүнд ингэтлээ шалдаа бууж байгаагийн учиг үндэс нь дотоод эв нэгдэл муутай Ардчилсан намын замбараагүй алхмуудтай холбоотой гэдгийг хэлэх нь зөв байх. Тэрчлэн доктор Б.Энхмандах бичихдээ \”2012 онд эрх баригч болж, Засгийн газраа байгуулан ажиллаж эхэлсэн АН хоёрхон жилийн дараа хөнжил дотроо хөлөө жийлцэж, Шинэчлэлийн Засгийн газраа огцруулж, Намын даргаа сольж, \”АН-ынхан засаглаж чаддаггүй” гэдгээ Монгол Улсын парламентийн түүхэнд хоёр дахь удаагаа харуулсан.” хэмээж байсныг хэлэхэд илүүдэхгүй байх. Мөн тэрбээр \”Ерөнхий сайд Ч.Сайханбилэг Ерөнхий сайдын тамгаа гардан авснаар, парламентад суудалтай бүх намын төлөөллөөр танхимаа бүрдүүлж, Шийдлийн Засгийн газар байгуулан ажиллаж эхэлсэн. Ерөнхий сайд нь бүрэн эрхийн дагуу бүх намуудтай зөвшилцөж засагтаа уриад, дөмөгхөн шиг ажиллаж байтал одоогийн АН-ын дарга, УИХ-ын дарга З.Энхболд эзгүй хойгуур нь дур мэдэн МАН-ыг засгаас хөөх шийдвэрийг Гүйцэтгэх Зөвлөлөөрөө гаргуулж чадсныг бүгд сайн мэдэж байгаа. Бүр Монгол Улсын Ерөнхийлөгч дуудаж уулзаад \”хэлсэндээ хүрч бай, хэлснээ хэрэгжүүлж бай” гэж хэлээд ч нэмэр болоогүй. Ерөнхий сайдын зөвшилцөх бичигт Ерөнхийлөгч Ц.Элбэгдорж \”Монгол Улсын Засгийн газрын нэр бүхий зургаан гишүүнийг огцруулах тухай саналтай танилцлаа. Монгол Улсын Засгийн газрын зарим гишүүнийг огцруулах тухай санал нь улс орны нийгэм, эдийн засаг, олон улс дахь нэр хүнд, ард түмний аж амьдралд таагүй нөлөөлж, улмаар улс төрийн тогтворгүй байдал бий болгох үр дагавартай байж болзошгүй тул уг асуудлыг дэмжихгүй байгаагаа үүгээр мэдэгдэж байна” гэсэн хариу өгөөд ч нэмэр болоогүй. Намын даргынхаа шахаанд орсон Ерөнхий сайд Ч.Сайханбилэг Ерөнхийлөгчийн үгийг тоосонгүй, МАН-ын зургаан сайдыг огцруулах асуудлыг УИХ-ын даргад өргөн барив.МАН засагт хамт байгаад байвал ирэх сонгуульд АН ялалт байгуулахад улам хүнд болно гэдгийг мэдэрсэн З.Энхболдын \”шуналт сэтгэл” ард түмний нуруун дээр хүндхэн ачаа болж бууна гэдгийг эрх баригчид тухайн үедээ сайн ухаараагүй бизээ.

Өнгөрсөн зун Ерөнхий сайд Ч.Сайханбилэг намынхаа Гүйцэтгэх зөвлөлд хандаж, Үндэсний Зохицуулах Хороогоо хуралдуулж, Ерөнхий сайд нь намын дарга болох эсвэл намын дарга нь Ерөнхий сайдаа хийхийг шаардсан. Энэ шаардлага нь хууль тогтоох болон гүйцэтгэх засаглалын хэм хэмжээ алдагдаж, УИХ-ын дарга нь эрх баригч нам буюу АН-ын дарга гэдгээрээ гүйцэтгэх засаглалын өдөр тутмын ажилд хутгалдан орох болсноос үүдэлтэй, өөрийн түвшинд асуудлыг шийдэх гэсэн гаргалгаа байсан гэж үзэхээс өөр аргагүйээ. Үүнд, УИХ-ын дарга Тавантолгойн асуудлаар тусгай Ажлын хэсэг байгуулан, түүний дүгнэлтийг үндэслэн Монгол орны эдийн засгийн хөгжилд онцгой ач холбогдолтой энэ том төслийг царцаасан ганцхан жишээг энд хэлж болно. Эв нэгдэл гэдэг үг өнөөдрийн АН-д онцгой чухал болоод байна. Намын эв нэгдэл бол хамгийн түрүүнд, Монгол орны хөгжлийн ирээдүй, ардчиллынхаа үнэт зүйлс дээр эв нэгдэлтэй байхаас эхлэх учиртай болов уу. Үүний тулд хамгийн түрүүнд, АН асуудлаа дотооддоо ардчилсан замаар шийдэж, ярилцаж, хэлэлцэж, нээлттэй байдлаар шийдэж сурах хэрэгтэй болжээ.” хэмээн хэлсэн байдаг. Үнэхээр ч энэ үгийг АН-д, АН-ын даргад хандаж дахиад хэлмээр байна. Сонгуульд нэр дэвшигчдээ тодруулахдаа ҮЗХ-оороо хэлэлцүүлдэггүй, фракциудын эрх ашгийн эрэмбэ дарааллаар тогтоодог, тэгчихээд өөрсдийгөө Ардчилсан хүчин гэж цээжээ дэлдэх нь зүйд нийцэх хэрэг мөн үү. Ядаж л нэр дэвшигчдээ тодруулахдаа дарангуйллын зарчимаар шийдэж байгаа Ардчилсан намд л ард түмэн итгэж байгаа гэдэг үнэн гэж үү?

Эх сурвалж: Б.Тамир, Шуурхай.мн