Монгол улсаа төлөөлөн гадаадад суух Онц бөгөөд Бүрэн эрхт элчин сайдууд удахгүй томилогдоно. Гадаад харилцааны сайд Д.Цогтбаатар “ирэх долоо хоногт Элчин сайдуудын томилгоог Засгийн газрын хуралдаанаар оруулж хэлэлцүүлнэ” гэж мэдэгдсэн байна. Тэгвэл тун удахгүй шинэ албандаа томилогдохоор хүлээн суугаа 18 хүний дотор бидний эчнээ танилууд олон харагдлаа.
Хууль зүйн сайдын хүү
Хууль зүй, Дотоод хэргийн сайд Ц.Нямдоржийн хууль Н.Анхбаяр Монгол Улсаас Австрали улсад суух Элчин сайдаар томилогдохоор хүлээж байна. Тэрээр одоо Гадаад харилцааны яамны Төрийн захиргаа удирдлагын газрын захирлаар ажилладаг. Мөн өмнө нь УИХ-ын Тамгын газар, Гадаад харилцааны яамны Хуулийн хэлтэс, Консулын газарт удирдах албан тушаалууд хашч байжээ. Ажлын туршлага, ур чадварын хувьд улсаа төлөөлөн суух элчин сайдаар томилогдоход болохгүй гэх зүйлгүй. Гэвч эрх баригч намын ургын холбоог үгүйсгэгч мөрийн хөтөлбөр нь зөрчигдөж байна. Өмнө нь ч зөрчигдсөөр байсныг Н.Анхбаярын албан тушаал хашч байсан түүхүүдээс харж болохоор.
Дүүргийн Засаг даргын нөхөр
Газрын тосны газрын даргаар ажиллаж байсан Г.Өлзийбүрэнг ОХУ-д суух элчин сайдаар томилох саналыг салбарын сайд оруулж иржээ. Г.Өлзийбүрэнгийн хувьд УИХ-ын гишүүн асан, Баянгол дүүргийн Засаг дарга С.Одонтуяагийн нөхөр гэдгээр нь бид сайн мэднэ.
Ерөнхийлөгчөөс ОХУ-д суугаа Элчин сайд Б.Дэлгэрмааг эргүүлэн татах асуудлыг УИХ-д хүргүүлсэн. Тэгэхээр Б.Дэлгэрмааг татаж, Г.Өлзийбүрэнг томилох тохироо хийгдсэн үү гэж харагдаж байна. Харин Г.Өлзийбүрэнгийн хувьд туршлага ур чадварын хувьд Элчин сайдаар ажиллаж чадах уу гэдгийг хэлэхэд эрт байна. Гэхдээ энд нэг асуудал байгаа өнөөх л ур садны холбоо юм.
УИХ-ын гишүүн асан Л.Энэбишийн хүү
Одоо Турк улсын Истанбул хотод Ерөнхий консулаар ажиллаж байгаа Э.Мөнх-Очирыг Монгол Улсаас Турк улсад суух Элчин сайдаар томилох саналыг оруулж иржээ. УИХ-ын гишүүн асан Л.Энэбишийн хүү гэдгээр нь Э.Мөнх-Очирыг бид сайн мэддэг. Гэхдээ Э.Мөнх-Очирын хувьд өөрөө УИХ-ын гишүүнээр сонгогдож, дүүргийн Засаг дарга, хотын ерөнхий менежерээр ажиллаж байсан албан тушаалын туршлага арвинтай нэгэн. Өмнөх хоёроо бодвол ургийн хамаарлыг их эрт ашиглачихсан одоо өөрийн мөнчгөрөөр албан тушаалын томилгоог амталж яваа нэгэн юм.
Гэхдээ л эдгээр хүмүүст нийтлэг нэг зүйл ажиглагдаж байгаа нь ураг төрлийн хамаарал юм. Эрх баригчид төрийн албыг төрлийн алба болгохгүй л гэсэн. Гэвч амлалтдаа хүрч чадахгүй л байна. Харин ургийн хамаарал бүхий хүмүүсийг Элчин сайдаар томилох уу үгүй юу гэдэг эцсийн шийдийг Монгол Улсын Ерөнхийлөгч гаргах юм.
