Таны фэйсбүүкийн сэтгэгдлүүд дунд нэр, зүсээ нууцалсан доромжлогчид, их мэдэгчид, тавьсан зүйлийг чинь гутаагчид орж ирдэг үү.
Та тэр даруйд нь “тролл”-ыг няц дарж чаддаггүй юм биш биз. Троллчид, хөлсний сэтгэгдэл бичигчид сөнөтүгэй гэж таныг өмөөрье. “Тролл” гэдэг нь Скандиновын домог үлгэрт гардаг агуй, ууланд бүлээрээ харанхуйд нуугдан суудаг, аймшгийн муухай царайтай мангасуудыг нэрлэдэг.
Харин өнөөдөр олон нийтийн сүлжээний ард нууц нэр, хаяг нээж, зохион байгуулалттайгаар бусдыг гутаан доромжлох хөлсний сэтгэгдэл бичигчдийг хэлж байна. Манай улсын 2.1 сая фэйсбүүкчид хөлсний троллчдын шууд хяналтан дор байж, тэднээр тархиа угаалгаж, гутаалгаж, дарлуулж буй. Миний бие үгийн үйлдвэрлэл хийдэг ажилтай, гол түүхий эд маань үгс, байнга мэдээлэл үйлдвэрлэж орон даяар цацдаг, түүгээрээ хүмүүст нөлөөлдөг “ноцтой ажил” хийдэг хүний хувьд монголын цахим ертөнцөөс хөлсний сэтгэгдэл бичигчдийг бүх нийтээрээ зайлуулах цаг болсныг хариуцлагатайгаар мэдэгдье.
Үг бол маш аюултай, нөлөөтэй зэвсэг бөгөөд устаж алга болдоггүй, энерги мэдээллийн ертөнцөд таны хэлсэн, бичсэн үг бүрийн долгион үлдэж, өөрийг чинь хүрээлж, эргэж нөлөөлж байдаг билээ. Тийм ч учраас өвөг дээдэс “Амны билгээс л ашдын билэг шалтгаална” гэж хатуу сургажээ.
Ингээд Оросын Троллчны ярилцлагаас танд хүргэе. “Миний ажилладаг компани 40 өрөөтэй, өрөө бүрт 20 тролл суудаг. Хоорондоо ярихгүй, инээсэн хүнийг ажлаас шууд халдаг. Цалин өндөр тул юм л бол торгож, хална гэж айлгана. Ажлын өрөө бараг шорон шиг. Өрөө бүрт бичиж байгаа зүйл хянадаг 3 харгалзагчтай. 1 минут хоцроход 500 рубль, буруу сэтгэгдэл бичвэл 1000 рубль, буруу зураг тавьбал 5000 рублиэр торгодог.
Ажил маань маш ачаалалтай, дэндүү хүнд. Өдөрт доод тал нь 135 сэтгэгдэл, 200 тэмдэгт буюу сонингийн 3 нүүр бичих үүрэгтэй гээд бод доо. Огт хуулж болохгүй бөгөөд өөрийн сэтгэгдлийг оруулах хатуу хориотой, зөвхөн эзний даалгавраар л зохиож бичнэ.
Манай компани 2 ээлжээр 24 цаг ажилладаг. Ядарч үхэх гэж байгаа амьтан л харьдаг” гэжээ. Тиймээ, троллчид ийм л хүнд, хатуу ажлыг мөнгөнөөс болж хийдэг хүмүүс. Манай улсад байдаг “хөлсний сэтгэгдэл бичигч” залуус ч аймшгийн ажлаа өндөөдөр ингэж л хийж байгаа. Троллчид улс төрийн том халаа сэлгээ, худалдааны том тохироо, үндэстэн дамнасан бизнес эхлэх үед эрс идэвхиждэг бөгөөд аливаа нийгмийг өдөөн турхирч, , ард түмнийг талцуулж, иргэний дайн ч гаргаж болзошгүй аж. Тийм ч учраас тролл бол өнөө цагийн хамгийн аюултай дайсан болжээ.
Нэр, зүсээ нууцлах троллчин ч өөрөө маш их зовж зүдэрдэг гэнэ.
“Хөлсний сэтгэгдэл бичигч” хэмээх ажил асар стресстэй, хүнд хөдөлмөр бөгөөд троллчид бусдыг гутаан доромжилдог хорон муу үгсийнхээ нөлөөгөөр сэтгэлийн гүн хямралд автан, тархи, зүрх, судас нь гэмтдэг байна. Мөн маш богино хугацаанд цөс нь өвдөж, шүд нь суларч, үс нь халзарч, гэнэт нас барах явдал тохиолддог гэнэ. Үг ийм л нөлөөтэй эд. Гэсэн ч богино бодолтой, олхиогүй залуус энэ ажлыг хийсээр, ард түмнийг гутаан доромжилсоор л байна.
Эцэст нь нөхөр хөлсний сэтгэгдэл бичигч, монголчуудаа гутаан доромжилж, гэм зэмгүй хүмүүсийг хохироогч Монгол троллч залуучуудад хандаж хэлэхэд “Ижий аав чинь чамайг төрүүлэхдээ царайг чинь нуугаагүй билээ, чиний чихэнд нэрийг чинь шивнэхдээ хайрласан нэрээсээ ичээгүй билээ. Гэтэл чи эцэг эхдээ өш санах мэт нэрээ, зүсээ нуун эх орноо, Монгол түмнээ үгээр бүү доромжил. Бичсэн үг бүрийнхээ төлөөсийг чи үйлийн үрээрээ төлөх болно гэдгийг хатуу сануулья. Фэйсбүүкийн андууд та нар троллтой таарангуут тэр дор нь төрөл бүрээр тэмцэж, няц дарагтун, зоригтой байгтун, яг одооноос.
Харин манай фэйсбүүкт троллчид ховор юм даа.
