Монгол Улсын зам тээврийн салбарт дорвитой ажил, зохицуулалт хийх хэрэгтэй. Үүнийг олж харсан хэн бүхэн хууль, эрх зүйн зохицуулалтын нэн яаралтай хийхийг бодох нь мэдээж юм. Зам, тээврийн хөгжлийн сайд Б.Энх-Амгалан ч энэ зарчмаар ажиллаж, “Авто тээврийн тухай хуулийн шинэчилсэн найруулга”-ыг УИХ-ын даргад өргөн барьсан тухай өмнө нь мэдээлж байсан.
Тэгвэл энэ хуульд Монголчуудын дургүйцдэг нэгэн заалт орсон нь баруун буюу буруу жолооны хүрдтэй автомашиныг хязгаарлах тухай асуудал байв. Монголчууд энэ асуудалд хоёр талын байр суурьтай байдаг. Уг нь анхнаасаа л буруу гэгдээд буй эдгээр автомашины импортыг хориглох ёстой байсан. Гэвч хориглох, хязгаарлалт тавих ямар ч зохицуулалтгүй явж ирсэн гэнэт хяналт тавих тухай яриа нь шинэ сайд зөв талдаа буюу солонгос автомашин импортлогчдын лоббид автав уу гэх хардлагыг төрүүлж байгаа юм.
Гэтэл олон нийтийн энэ мэт хардлага сэрдлэгийн дараа сайд “Энэ асуудлыг сайн судалж байж шийдэх ёстой. Баруун гар талдаа жолооны хүрдтэй автомашин гүйцэж түрүүлэх үйлдэл хийх үедээ осол гаргах тохиолдол өндөр. Манай улс зүүн гарын дүрэмтэй. Гэхдээ өөрчлөлтийг хийх цаг нь биш гэж үзэж байгаа. Хуулийн төслийг боловсруулсан ажлын хэсгийн 20 гаруй хүний дундаас баруун гар талдаа жолооны хүрдтэй автомашиныг хориглох санал гарсан. Гэвч яамны зүгээс “энэ саналаа хас” гэсэн. Яг нарийндаа баруун гар талдаа жолооны хүрдтэй автомашин осол гаргахад хамгийн их нөлөөлж байна гэсэн судалгаа байхгүй. Нөгөөтэйгүүр баруун гар талдаа жолооны хүрдтэй буюу япон машин чанартай гэсэн хэрэглэгчдийн судалгаа байдаг. Мөн иргэдийн ихэнх нь япон машин унаж байгаа. Ялангуяа шатахуун бага зарцуулдаг приус маркийн машин олон бий. Тиймээс энэ хэрэглээг хориглох санал санаачлага Засгийн газарт одоогоор байхгүй” гэж хариулт өгчээ.
Шинэ хуульд “хориглох тухай заалт байхгүй” гэж сайд мэдэгдлээ. Гэхдээ л ийм яриа сайдын хүрээнд өрнөжээ. Өөрсдөө том шатахуун их иддэг, зөв хүрдтэй жийп автомашин унадаг хүнээс л иргэдийн хэрэглээг үл тоомсорлох санал гарах байх. Дарга нар минь, хөрсөндөө буу гэж олон удаа бичиж байна даа. Иргэдийнхээ амьдралыг мэддэг дарга өөрөө приус унаж, шатахууны мөнгө хэмнэх учиртай.
Гэтэл иргэдийн хэрэглээг хязгаарлах тухай санал гаргаад сууж байгааг юу гэх вэ. Мөн боломж гарах бүрт дундаж орлоготой иргэдийг унаанаас нь салгачих гээд тандалт хийгээд байдгаа манай дарга нар больчихвол зүгээр шүү.
