\”Эрдэнэт\” үйлдвэрийн асуудлаархи зөрүүтэй байр суурь

 

 

 

Ардчилсан намын эрх баригчид сонгуулийн өмнөхөн Монгол Улсын ганц \”саалийн үнээ\” гэгддэг Эрдэнэт үйлдвэрийн Оросын талын эзэмшиж байсан 49 хувийг авч байгаа бөгөөд үүнийг дотоодын компанид өгч байгаа юу, гадаадын компанид өгч байгаа юу гэдгээс хамаарч нэлээд асуудал босч ирэх шинжтэй. Мэдээж дотоодын компанид өгвөл Монголын талд 100 хувь шилжиж, бидэнд ашигтай. Харин Оросын талаас авсан хувиа барууныханд өгч байгаа бол энэ Монгол Улсад ашиггүй. Ямартай ч, Эрдэнэт үйлдвэрийн 49 хувийн асуудлаар АН болон МАН-ын байр суурийг хүргэе. 

 

 

\”Эрдэнэт\” үйлдвэр 100 хувь Монгол Улсын талт шилжсэн үү

 

Уулын баяжуулах Эрдэнэт үйлдвэрийн 51 хувийг Монголын Засгийн газар үлдсэн 49 хувийг Оросын төрийн өмчит \”Ростех” компани эзэмшдэг.

Тэгвэл Оросын Interfax.ru сайтад \”Төрийн өмчит Ростех корпораци \”Эрдэнэт\” үйлдвэр, \”Монголросцветмет\” компаниудад эзэмшдэг 49 хувиа Монголын талд худалдаалахаар боллоо\” гэсэн мэдээлэл цацагдлаа. Энэ талаар Ерөнхий сайд Ч.Сайханбилэг мэдээлэл хийлээ.

Тэрбээр \”Өнөөдөр би нэгэн сайн мэдээ дуулгах гэж байна. Гэхдээ үүнийг улс төрийн сонгуулиас хол байлгахыг зорьсон. Монгол Оросын хамтарсан \”Эрдэнэт\” үйлдвэр өнөөдрөөс эхлэн 100 хувь Монгол Улсын үйлдвэр болж байгааг албан ёсоор зарлах гэсэн юм. Энэ талаарх мэдээллийг дөнгөж сая ОХУ-ын Интерфакс олон нийтэд цацаж эхэлсэн гэдгийг дуулгамаар байна. Улс төрийн эрх ашгаас илүүтэйгээр улс орны эрх ашиг гэж байдаг. Монголоо боддог ямар ч хүнд ойлгомжтой.

ОХУ-ын \”Ростех\” компанийн эзэмшиж байсан Эрдэнэт үйлдвэрийн 49 хувийг Монголын хувийн компани эзэмшихээр боллоо. Монголын компани гэдэг нь Худалдаа хөгжлийн банк болон түүний төлөөний компани болох \”Монголын зэс\” компани юм. Өөрөөр хэлбэл, \”Эрдэнэт” үйлдвэр Монгол Улсын хуулиас дээгүүр Олон Улсын гэрээ хэлэлцээрээр зохицуулагддаг хамтарсан үйлдвэрийн статустай байсан бол одоо Монгол Улсын хуулиар, манай улсын компанийн тухай хуулиар зохицуулагддаг Монгол Улсын үндэсний аж ахуйн нэгж болж хувирах юм.

Мөн тус үйлдвэрийн ногдол ашиг 100 хувь Монгол Улсад үлдэх болж байна. Энэ үйл ажиллагаатай холбоотой хэд хэдэн албан ёсны мэдэгдлийг хиймээр байна.

 

1. Эрдэнэт үйлдвэрийг дагасан бүх барилга байгууламж Монгол Улсад дагаж шилжиж ирнэ. Тиймээс Засгийн газар яг энэ хэвээр нь үргэлжлүүлэн авч явна. Эрдэнэт үйлдвэрийн үйл ажиллагаа хэвийн явагдаж байна. Дансыг хаасан, тамга тэмдэг хураасан зүйл байхгүй. Цаашдаа ч үйл ажиллагаагаа хэвийн үргэлжлүүлнэ.

2. Зургаадугаар сарын 30-наас эхлэн хоёр тал албан ёсоор байр сууриа илэрхийлж мэдэгдлүүдээ гаргаж эхэлнэ.

3. Энэ асуудлыг Оросын талын хамгийн өндөр түвшинд шийдвэрлэсэн болно.

4. \”Ростех\” компани зөвхөн энэ хэлбэрээр хэлэлцээрийг хийнэ гэдгээ албан ёсоор илэрхийлсэн баримт энд байгаа. Энд Монголын Засгийн газар болон аль нэг улсын Засгийн газар аль нэг гуравдагч этгээдэд 49 хувиа зарахгүй. 

5. Хэн нэг гуравдагч этгээд энэ хэлэлцээрт оролцохыг хориглосон гэдгийг дахин хариуцлагатайгаар хэлэхийг хүсч байна. Өөрөөр хэлбэл, хэн нэгэн гуравдагч этгээдийн санхүүгийн төлбөр тооцоо энэ асуудалд оролцохгүй.

6. Хэрвээ Монгол Улсын компани худалдан авсан 49 хувиа зарах тохиолдолд зөвхөн Монгол Улсын Засгийн газарт эхний ээлжинд зарна.

7. Энэ хэлэлцээр дуусахад Монгол Улсын Засгийн газрын зүгээс энэ асуудлыг УИХ-д албан ёсоор оруулж танилцуулах болно\” гэв.

Мөн \”Ийнхүү үе үеийн Засгийн газар болон Монголын ард түмний хүсч мөрөөдөж байсан том асуудал биелэгдэх боломжтой гэдгийг хэлэхийг хүсч байна. Мөн хамгийн сүүлийн зээлийн төлбөрийг Засгийн газар төлж барагдуулсан болно” гэсэн юм.

 

Ерөнхий сайд Ч.Сайханбилэг \”Эрдэнэт\” үйлдвэрийн 49 хувийг барууныханд өгсөн үү

 

Тэгвэл МАН-аас Ерөнхий сайд Ч.Сайханбилэгийг \”Эрдэнэт\” үйлдвэрийн хувийг гадаадын компанид зарсан гэсэн юм. Монгол Ардын Намаас хэвлэлийн хурал хийж, мэдэгдэл гаргасан бөгөөд мэдэгдэлд \”Ерөнхий сайд Ч.Сайханбилэг хэдхэн мөчийн өмнө хэвлэлийн хурал хийж, \”Эрдэнэт\” үйлдвэрийн Оросын талын 49 хувийг Худалдаа хөгжлийн банк түүний төлөөний компани болох \”Монголын Зэс\” компани хувьчилж авсан тухай мэдээллээ. УИХ-ын сонгууль явагдах гэж байгаа эгзэгтэй үед Ардчилсан намын удирдлага, Ерөнхий сайд Ч.Сайханбилэг \”Эрдэнэт\” үйлдвэрийн 49 хувийг завших луйвар хийж байна. Тиймээс  Монгол Улсын хууль тогтоомжийг бүдүүлгээр зөрчсөн энэ үйлдлээ зогсоохыг шаардаж байна\” гэжээ.

Энэ үеэр УИХ-ын гишүүн Су.Батболд хэлэхдээ \”Ерөнхий сайдын зүгээс Монголын үндэсний компани \”Эрдэнэт\” үйлдвэрийн хувийг худалдаж авлаа гэсэн мэдээлэл олон нийтэд өгч байгаа ч Худалдаа хөгжлийн банкны нийт хувьцааны 65.83 хувийг нь Люксембург Улсын \”Global investment and Development\” компани, 7.32 хувийг Америкийн \”US Global investment\” компани, 19.95 хувийг Америкийн \”United Banking Corporation\”, 4.78 хувийг \”GS Mongolia investment\” , 2.12-хон хувийг монголчууд эзэмшиж байгаа. Ерөнхий сайд Ч.Сайханбилэг Засгийн газрыг толгойлсноосоо хойш дандаа Монголын ард түмний эрх ашгийн эсрэг шийдвэр гаргасан. Жишээ нь, Дубайн гэрээ байна. 1999 онд АН-ыг Засгийн эрх барьж байх үед \”Эрдэнэт\” үйлдвэрийн 49 хувийг хууль бусаар худалдах оролдлого хийж байсан. Засгийн газрын хуралдаанаар энэ асуудлыг огт яриагүй. Яамдаас санал аваагүй байж авсан мэт мэдээлж байгаа нь хууль зөрчиж байна\” гэсэн юм. Өөрөөр хэлбэл,  \”Эрдэнэт \” үйлдвэрийн 49 хувь нь гадаадын компанийн эзэмшилд очиж байна гэсэн үг. Ямартай ч, эдгээр компани дотор \”US Global investment\” гэх оффшор компани байгаа нь иргэдийн бухимдлыг төрүүлж байна.

 

Төгс