Өнгөрсөн шөнө хөлбөмбөгийн ногоон талбайд нэгэн гайхамшигт тоглолт болж өнгөрлөө. Хөлбөмбөгийн талбайд бүтэшгүй юм байхгүй гэдэг билээ. Үүний нэгэн жишээ болсон тоглолт Английн “Энфильд” цэнгэлдэхэд болж өнгөрсөн юм.
Аваргуудын лигийн хагас шигшээгийн нэг тоглолт Дархан аваргууд болох Английн ”Ливерпүүл” болон Испанийн “Барселона” багуудын хооронд боллоо. Хоёр багийн эхний тоглолт Барса-ийн талбайд болж талбайн эзэд 3:0-ийн харьцаатай ялалт байгуулсан юм. Энэхүү тоглолтын дараагаар шигшээ тоглолтонд шалгарах баг нь албан бусаар тодорчихлоо хэмээн хөлбөмбөг сонирхогчид үзэж байсан билээ.
Гэвч Юрген Клоппын “Ливерпүүл” баг тэдний энэхүү ойлголт буруу гэдгийг ойлгуулж, өөрийн талбайдаа 4:0-ийн харьцаатай хожиж, аваргуудын лигийн финалын шатанд шалгарч үлдсэн байна.
Тэдний энэхүү тоглолтын үед “хөлбөмбөгийн бурхан тэнгэр” нь “Ливерпүүл”-ийн талд байж довтлогч М.Салах, Р.Фирминьо нарын эзгүйд энэхүү гайхамшигийг бүтээсэн юм.
Хоёр багийн тоглолтын гоолын салхийг 7 дахь минутанд М.Салахын оронд талбайд гарсан Ориги нээж үзэгчдийг баясгасан юм. Тоглолтын эхний үе энэ гоолоор өндөрлөсөн бөгөөд хоёрдугаар үед тэднийг гайхамшиг хүлээж байлаа.
Хоёрдугаар үеийн 54 болон 56 дахь минутанд Робертсоны оронд талбайд гарч ирсэн Вейналдум дараалан гоолдож хөгжөөн дэмжигчдээ хөөрлийн дээд цэгт аваачсан. Энэ үед эсрэг багийн Л.Месси гоол оруулах бүрэн боломжтой байрлалаас алдсан нь харамсмаар.
Тоглолтын санаачлагыг гартаа авсан талбайн эзэд амжилттай довтлож байсан бөгөөд 79 дэх минутанд Трент Александр Арнольд хэмээх залуу тоглолтын эцсийн цэгийг тавьлаа. Тэрээр багтаа булангийн цохилт авчирсан бөгөөд өөр тоглогчоор цохиулах гэж буй мэт дүр эсгэн талбай руу орж явснаа гэнэт буцан булангийн цохилт гүйцэтгэж, Д.Ориги амжилттай гүйцээн тоглолтыг дуусгалаа.
Ийнхүү хоёр дархан аваргын тулаан мартагдашгүйгээр өнгөрч, “Ливерпүүл” зургаа дахь удаагаа “дэлдэн чихт”-ийг өргөхөөр шалгаран үлдэж, “Барселона” гэрийн зүг жолоо эргүүллээ.
