Монгол улсын Ерөнхий сайд асан Н.Алтанхуяг өнөөдөр УИХ-ын гишүүн С.Эрдэнийг шалгуулахаар АТГ-т гомдол гаргаж байгаагаа мэдэгдлээ.
Тэрбээр “Би Капитал банканд байршиж байсан иргэдийн 240 гаруй тэрбум төгрөг эрсдэлд орчихоод байна. Энэхүү мөнгийг эрсдэлд оруулсан эзнийг олоход анхаараач, энэ асуудал дээр УИХ-ын гишүүн С.Эрдэнийг шалгаж өгөөч гэж АТГ-т гомдол гаргаж байгаа юм.
Энэ гомдлыг гаргах болсон гурван шалтгаан бий.
Нэгдүгээрт, УИХ-ын гишүүн Н.Номтойбаяр тэтгэвэр, халамжийн мөнгийг янз бүрийн банканд байршуулахад эрсдэл үүсэж байна хэмээн 2, 3 жил ярилаа. Гэвч энэ нь ажил хэрэг болоогүй.
Эндээс харахад энэ асуудал дээр эд нар огт ажиллахгүй юм байна хэмээн харагдаж байна. Манай улстөрчид энэ асуудлыг хав дарж байгаад намар юм уу өвөл гаргаж тавиад 2020 оны сонгууль дөхүүлж баахан шоу хийж, ингээл хоорондоо тохиролцон өөртөө нэг сул өрсөлдөгч тавиулах байх.
Тиймээс АТГ энэ асуудлыг шийдэж 240 гаруй тэрбум төгрөгийг олж өгөх болов уу гэсэн горьдлого тээж байна.
Хоёрдугаарт, С.Эрдэнэ улаан цайм худал ярьж байна. Банканд мөнгө байршуулж байгаа асуудал надтай ямар ч хамаагүй гэсэн. С.Эрдэнэ сайд болсныхоо дараа Нийгмийн даатгалын үндэсний зөвлөл гэдэг байгууллагыг толгойлдог болсон. Уг нь дэд сайд нь тэргүүлдэг байсныг өөрчилж өөрөө толгойлсон юм. Тэр байгууллага нь иргэдийн тэтгэвэр, эрүүл мэндийн даатгалын мөнгйг арилжааны банканд байршуулдаг журам баталсан байгаа. Тэр журам нь С.Эрдэнийн гарын үсэгтэй. Тэр журамд аль банканд байршуулахыг заавал С.Эрдэнээс асууж зөвшөөрөл авна гээд заачихсан.
Ингэж л өөрийнхөө хийсэн үйлдлээ надад хамаагүй гэж байгаа нь их муухай юм. Тиймээс бичиг цаасыг нь нягтлаад үнэн мөнийг нь тогтоох хэрэгтэй.
Гуравдугаарт, шүүх, прокурор зэрэг хуулийн байгууллагын удирлагууд өөрчлөгдлөө. Би тэр удирдлагуудыг танихгүй. Ямар ч байсан Ц.Элбэгдорж, М.Энхболдын тавиулууд өөрчлөгдсөнд баяртай байгаа. Үнэнч, шударга ажиллах хүмүүс тавигдсан юм болов уу гэж найдаж байгаа.
Тэр 240 тэрбум гэдэг бол маш их мөнгө. Арилжааны банканд байршуулах бол боломжтой банканд байршуулах ёстой байсан. Гэтэл чадал муутай, хэзээ ч дампуурч мэдэх банканд тэтгэвэр, эрүүл мэндийн даатгалын мөнгийг байршуулж, иргэдийн мөнгийг гарзанд гаргаад, тухайн банкийг аврах оролдлого хийсэн. Энэ бол гэмт хэргийн шинжтэй зохион байгуулалттай үйлдэл.
Тиймээс энэхүү үйлдлийн буруутанг нь тогтоож, шийдэж өгөөч ээ гэж С.Эрдэнийн талаар АТГ-т гомдол гаргаж байгаа юм” гэж тайлбарлалаа.
