МАН-ын мөрийн хөтөлбөрт тусгагдсан нэн яаралтай эхлүүлчихмээр хэд хэдэн ажил байна

Ардын нам үнэмлэхүй ялалт байгууллаа.
Мэдээж иргэд сонгогчид тэдэнд итгэсэн учраас л ийм сонголтыг хийсэн. Ардчилсан
намд маш олон буруу, алдаатай зүйл байсан учраас л ард түмэн ийм дүн тавьсан
хэрэг. Түүнээс АН л биш бол хэн ч байсан хамаагүй гэж сонголтоо хийгээгүй гэж
найдаж байна. Магадгүй энэ удаад л Монголчууд сонголтоо зөв хийж, итгэл ба
хариуцлагыг давхан өгсөн болов уу гэж бодогдож байна. МАН ирэх дөрвөн жилийн
хугацаанд АН шиг байвал тэднийг мөн л олноор нь солих эрх мэдэл ард түмэнд бий
гэдгээ л энэ сонгуулиар ойлгож авлаа.

Тэгвэл ирэх дөрвөн жилд засаг барих МАН-ын
мөрийн хөтөлбөрөөс дараах зүйлсийг онцолж, ирэх сонгуулиар биш энэ өдрөөс эхэлж
нэхэж, шаардмаар байна.

Тухайлбал, цалин тэтгэврийг үе шаттайгаар
жил бүр нэмэгдүүлнэ гэж тусгасан байна. Өмнөх Засгийн газар ч цалин нэмдэг
байсан учраас энэ асуудалгүй биз. Гэхдээ хувийн хэвшлийнхэн үргэлж хойно үлдэж,
хамгийн бага цалингаар хамгийн их бүтээн байгуулалтыг хийж, гүйцэтгэж байгааг
санах хэрэгтэй болов уу. Мэдээж цалин нэмэгдвэл өрхийн орлого ч дагаад өсөх нь
ойлгомжтой.

Арилжааны зээлийн хүүг багасгаж, хугацааг
уртасгах тухай мөрийн хөтөлбөрт тусгасан байна. Энэ боломжтой юу? Арилжааны
банкууд Засгийн газрын мөрийн хөтөлбөрийг хэрэгжүүлэхийн тулд эрсдэл хүлээх
боломж бий юу. Ер нь буулгах боломжтой учраас л мөрийн хөтөлбөртөө тусгасан
биз. Тэгвэл энэ ажлыг нэн яаралтай эхлүүлж, иргэдийн нуруун дээрх нэг ачааг
хөнгөлж өгөхийг хүсч байна.

 

Дараагийнх нь \”Эрдэнэс Тавантолгой”
компанийн 1072 ширхэг хувьцааг амь оруулж, үнэ цэнэтэй болгоно гэжээ. Амьд орох
нь орчихлоо. Харин үнэ цэнэ нь навс унаж, шороотой хутгалдаж байна. Засгийн
газарт хувьцаагаа заралгүй үлдсэн, хувьцаанаасаа жил бүр ашиг хүртье, эсвэл
арай өндөр үнээр зарья гэж бодож байгаа хүмүүс боломж бий юу. Байгаа бол энэ
ажлыг ч гэсэн нэн яаралтай эхлүүлмээр байна. Мөн хувьцаагаа зарсан иргэдийн
мөнгө цаг хугацаандаа орж, хохирол гомдол үлдээхээргүй шийдвэрлэнэ гэж найдаж
байгаагаа хэлье.

Мөн эрх барих МАН-ын мөрийн хөтөлбөрт бүх
хүүхдүүдийг цэцэрлэгт хамруулна гэж тусгажээ. Бүх хүүхэд цэцэрлэгт хамрагдах
боломж бололцоо бол байхгүй. Харин МАН энэ асуудлыг хэрхэн шийдвэрлэхээр
төлөвлөж байгаа нь тун сонирхолтой санагдаж байна. Бүх хүүхэд цэцэрлэгт
хамрагдаад эхэлбэл эцэг эх нь ажиллах боломжтой болно. Ингэснээр айл өрхийн
орлого нэмэгдэх нигуртай юм. Тиймээс энэ ажлаа ч яаралтай бусдад хохиролгүйгээр
хийж гүйцэтгэнэ гэж итгэж байна.