АН-ын дүрмийн дагуу \”өрсөлдөөд\” адаг сүүлд нь булхайцсан гэгдэв

 

 

100 хувь шударга сонгууль гэж хаана ч байдаггүй гэдэг. Гэхдээ энэ удаагийн сонгууль Ардчилсан Монгол Улсын түүхэн дэх хамгийн шударга сонгууль болж өнгөрсөн. Ардчилсан намынхны рекламддаг хахууль авдаггүй, худал хэлдэггүй \”хар машин\”-аар энэ удаагийн сонгуулийг явуулсан. Гэхдээ Ардчилсан намаас бусад бүх улстөрийн намууд нэгдэж \”хар машин\”-ы програмыг өөрчилж, нэг намд илүү санал тоолуулах боломж байдаг гэж сэрдсэн учраас саналын хуудсыг гараар давхар тоолж, хяналтын тооллого хийхийг АН-аас шаардсан. Гэсэн ч Ардчилсан нам саналын хуудсын зөвхөн 50 хувийг гараар давхар тоолж, хяналтын тооллого хийхийг зөвшөөрсөн. Азаар хяналтын тооллого хийх саналын хуудсын 50 хувийг бүрдүүлэхдээ сонгуулийн тойргуудаас таамгаар сонгох болсон нь \”хар машин\”-ыг шударга ажиллах үндэс болсон.

Тиймээс ч тэр үү, Ардчилсан намаас бусад бүх улстөрийн намууд сонгуулийн үр дүнг хүлээн зөвшөөрөв. Харин АН сонгуулийг будлиантай болсон гэв. Бид ярьдаг. Нутаг дээр нь очоод ялалт байгууллаа. Тэдний дүрмээр тоглоод хожлоо гэж. Үүнтэй адилаар АН энэ удаагийн сонгуулийг өөрсдийн дүрмээр зохиосон ч өөрсдийнхөө ялагдлыг үл хүлээн зөвшөөрч, өрсөлдөгчийнхөө ялалтыг эсэргүүцэж байна. Сонгуулийн хууль, Үндсэн хуулийг өөрсдийн талд ашигтайгаар эргүүлэхийг санаархаж өч төчнөөн ажил хийсэн. Аймгуудын мандатын тоог дураар өөрчилж, алслагдсан дүүргүүдийг нийслэлийн дүүргүүдтэй нэгтгэсэн зэрэг нь зөвхөн санал авах гэсэн, ялалт байгуулах гэсэн ажил байсан. Ардчилсан намаас арай илүү ажилласан нь Хотын дарга Э.Бат-Үүл байсан. Үүнийг хэн хүнгүй мэдэж байгаа, хүлээн зөвшөөрч байгаа. Мөн аймаг хөдөө орон нутагт МАН, Нийслэл хотод АН-ын нэр хүнд сайн байгаа гэх судалгаа ч байсан.

Тиймээс Ардчилсан намынхан Нийслэл хотод оногдох мандатын тоог нэмэгдүүлэхээр хичээсэн. Хотод ялалт байгуулна гэдэгтээ дэндүү итгэчихсэн учраас хотын мандатыг тоог нэмэгдүүлэхээр улайрч байсан. Нэмэгдүүлж ч чадсан. Энэ мэтчилэн АН өөрсдийнхөө дүрмээр энэ удаагийн сонгуулийг явуулсан. Түүнчлэн Ардчилсан нам төрийн бүх шатанд ноёрхож, хууль шүүх, банк санхүү гээд бүх байгууллагуудаар дэмжүүлэн сонгуульд оролцсон. Хотын даргын хэлсэнчлэн 6000 хүрэхгүй ч нэлээд хэдэн \”нүүрээ нуусан нөхдүүд\” ард түмнийнхээ амьдралыг харахгүйгээр сошиал ертөнцөд Нийслэл хотын бүтээн байгуулалтыг тэнгэрт тултал магтацгаасан. Бүх зүйл эсрэг байсан ийм хүнд \”өрсөлдөөн\”-өөс ард түмний туйлын хүсэл зорилгын дэмжлэгтэйгээр МАН өнөөдөр үнэмлэхүй ялалт байгуулчихаад байна.

Гэсэн ч \”лалар\” хэмээн доромжлуулж байсан ард түмэн АН-ынханд дахиад л доромжлуулж, \”царцаа\”-нуудаас болж бид ялагдчихлаа гэв. Үндэсний томоохон үйлдвэрлэгч \”Талх чихэр\” компанид ажилладаг залуугийн ам алдсанаар \”Энэ сонгуулиар тус компанийг Баянхонгор уруу бараг нүүлгэсэн гэнэ\”. Харин ингэж ажилчдыг нь нүүлгэж \”хүн царцаанууд\” болгочихоод \”Би царцаануудаас болж ялагдчихлаа\” хэмээн өрсөлдөгч рүүгээ дайрах нь тэгээд ариун явдал уу. Үүнийг хууль хяналтын байгууллага нь шалгах л хэрэгтэй. Хамгийн гол нь, алдааг бусдаас бус өөрөөсөө эхлээд хайж, юун дээр алдсанаа тогтоож, түүнийг засч залруулаад явбал амжилт үргэлж дагах юм шиг ээ.