АНУ-ын Ерөнхийлөгч Дональд Трамп Япон улсад хийж буй албан ёсны айлчлалынхаа хүрээнд мэргэжлийн сүмо бөхийн Нацү башёгийн сүүлийн өдрийн барилдааныг үзэж сонирхлоо. Тэрээр энэхүү барилдааныг өөрийн эхнэр болон Япон улсын Ерөнхий сайд Шинзо Абэ, түүний эхнэрийн хамт үзсэн байна.
Японы мэргэжлийн сумо бөхийн энэ удаагийн Нацү башё нь Рэйва эриний анхны башё гэдгээрээ ихээхэн олны анхаарлыг татаж байсан юм. Шинэ хаан ширээндээ заларсаны анхны башёд Сэкивакэ Асанояма 12 даваа, 3 унаатайгаар түрүүлж, Японы эзэн хааны цомыг анх удаагаа гардан авчээ. Мөн тэрээр АНУ-ын Ерөнхийлөгчийн нэрэмжит цомыг анхлан гардан авсан бөх болж байгаа юм. Маэгэширагийн наймаас эрэмбэлэгдсэн Асанояма нь өдгөө 25 настай залуу сумоч бөгөөд сүмод орсноосоо хойш хамгийн богино хугацаанд Эзэн хааны цомыг хүртэж буй бөхчүүдийн жагсаалтад гуравдугаарт орж ирлээ.
АНУ-ын Ерөнхийлөгч Дональд Трамп өөрийн нэрэмжит цомоо гардуулан өгөхдөө “Сүмогийн ордонд хүчит тамирчдын барилдааныг үзэх үнэхээр таатай байлаа. Мэргэжлийн сүмо бөхийн тэмцээнд гаргасан гайхалтай амжилтыг тань үнэлж, энэхүү цомыг гардуулан өгч байна” хэмээн хэлж 1,37 метр өндөр 20 гаруй килограмм жинтэй мөнгөн цомыг Асаноямад гардуулан өгчээ. Харин түрүү бөх Асанояма “Үнэхээр хэлэх үг олдохгүй байна. Маш их баяртай байна” хэмээн сэтгэгдлээ илэрхийлжээ.
Дональд Трампыг сүмогийн ордонд зочлохтой холбогдуулан ордныг өндөр хамгаалалтад авч, түүний суух хэсэг, ордны автомат машин, тээш хадгалах хайрцаг гээд бүгдийг битүүмжилж, метал илрүүлэгч байрлуулж, хамгаалалтад нийт 25 мянган хүн гарсан бөгөөд урьд шөнө нь ордныг бүтэн шалгасан байна.
