Нийслэлчүүд сард 4.2 мянган тн мах хэрэглэдэг

Өчигдөр хуралдсан УИХ-ын Байгаль орчин, хүнс хөдөө аж ахуйн байнгын хорооны хуралдаанаар, хүнсний гол нэрийн бүтээгдэхүүний хангамжийн талаарх ХХААХҮ-ийн сайд Ч.Улааны мэдээллийг сонссон байна. ХХААХҮЯ-наас махны хомсдол, үнийн савалгааг арилгахаар ажиллаж байгаа бөгөөд энэ онд гурил, хүнсний ногооны хангамж тогтвортой байхыг мэдээлэлдээ танилцуулсан.
ХХААХҮ-ийн сайд манай улсын хүн амын энэ оны хүнсний хэрэгцээнд нийт 117.6 мянган тонн, үүнээс Улаанбаатар хотын хэмжээнд 50.6 мянган тонн мах шаардлагатайг дурджээ. Улаанбаатар хотын хүн амын хаврын улирлын хэрэгцээнд 12.6 мянган тонн, нэг сарын хэрэгцээнд 4.2 мянган тонн мах шаардагддаг байна. Нийслэлийн хүн амыг махаар тогтвортой хангах зорилгоор, махны үйлдвэрүүдийн банкны зээлийн хүүг хөнгөлөх замаар нөөцийн махыг хямд худалдаж байна. Арилжааны банкны шалгуурт тэнцсэн “Баатрууд Тэнгэр”, “Дархан меат фүүдс”, “Сүхбаатар мах маркет” ХХК-иуд дөрвөн мянган тонн мах бэлтгэснийг өнгөрсөн сарын 15-наас худалдаж эхэлсэн. Одоогоор, нөөцийн 58 хувийг борлуулаад байна. Нөөцийн мах зах зээл дэх жижиглэнгийн үнээс 16-45 хувиар хямд байгааг салбарын сайд мэдээлэлдээ онцолж байлаа.
Харин Монгол Улсын хүн амын энэ оны хэрэгцээт гурилын хэмжээ 225.6 мянган тонн, үүнээс 97.2 мянган тонн гурил нь нийслэлд ногдоно. Тиймээс дээрх хэмжээний гурил үйлдвэрлэхэд хүрэлцэхүйц буудайн нөөцийг дотоодын ургацаас бүрдүүлсэн байхыг зорьж байгаа аж. Дотоодын үйлдвэрүүдийн агуулахад байгаа гурилын болон буудайн үлдэгдэл, импортын нийлүүлэлтээс үзэхэд шинэ ургацыг хураан авах хүртэл гурилын хангамж харьцангуй тогтвортой байх боломжтой байгааг мөн дуулгалаа.
Ноднин 13.1 мянган га талбайд төмс тарьж, 167.9 мянган тонн ургац хураажээ. Мөн хүнсний нарийн ногоог 8.6 мянган га талбайд тарьж 102.2 мянган тонн ургац авсан байна. Тариаланчдыг дэмжиж, эх орондоо тарьж ургуулсан хүнсний ногоог НӨАТ-аас чөлөөлж, ААНОАТ-ын 50 хувийг хөнгөлсөн. Түүнчлэн хүлэмжийн тоног төхөөрөмж импортлох татварыг мөн чөлөөлжээ. Төмс, хүнсний ногооны үнийг өмнөх долоо хоногтой харьцуулахад, төмс хоёр хувиар, хүнсний нарийн ногоо 1.7-3.1 хувиар буурсан байна. Төмс, хүнсний ногооны хангамж шинэ ургац гарах хүртэл тогтвортой байх бүрэн боломжтойг мөн мэдэгдсэн юм.