Э.Бат-Үүл эмх замбараагүй байдалд уриалаад байна уу

 

 

 

Монгол
Улсад нэг шөнө хоёр өдрийн дотор их олон том үйл явдал болж өнгөрлөө. Эндээс эргэцүүлж
тунгаах зүйлс их олон ажиглагдлаа. Ардчилсан нам ялагдчихаад, нөгөө Ж.Мөнхбат
гишүүний хэлсэнчлэн өвдгөөрөө улаан нялга болтлоо уначихаад засуул, хөлийн
цэцтэйгээ нийлж байгаад туг тойрчих гээд зүтгээд буй АН-ынхан УИХ-ын гишүүдийн
тангараг өргөх ёслолыг ямар ч хамаагүй аргаар хойшлуулах гэсэн, цаг хожих гэсэн
арга нь амжилтгүй болов.

Сонгуулийн шөнө \”Ард түмний сонголтыг хүндэтгэж байна,
ялсан намд баяр хүргэе” хэмээн ялагдлаа хүлээн зөвшөөрч зогссон дарга адаг
сүүлд нь эрх мэдлээс чаргууцалдаж, АН-ынханд хэдэнтээ молигодуулж шилний цаанаас
чихэр долоосон Н.Энхбаярын дахиж хэзээ ч АН-тай хамтрахгүй гэсэн үзэл санаа нь
тангаргийн ёслолын өмнө хийсэн одож АН-тай хамтарсан зэрэг хүн яаж ингэж
өөрчлөгдөж чаддаг байна аа гэмээр зүйлүүд болов. Бүр АН дотор Төрийн эргэлт шахуу
юм хийж байгаад ч хамаагүй эрх мэдлээ хадгалж үлдэх гэсэн хүмүүс ч байв. Энэхүү
байдлыг Ерөнхийлөгч Ц.Элбэгдорж өөрийн биеэр таслан зогсоож, улстөрийн улаан
галаас цээжээрээ хааж гарав.

Ц.Элбэгдорж Төрийн тэргүүн хүний зангаргаар ард
түмний сонголт бол хамгийн дээд шийдвэр гэдгийг онцлоод МАН-ын 65 гишүүнийг
65-ууланг нь тангараг өргүүлсэн юм. Гэхдээ энэ асуудал ингээд дуусахгүй нь бололтой,
тэмцлийн оч үсэргэх гээд байгаа юм уу гэмээр үг, өгүүлбэр гарсаар байна.
Тухайлбал, НИТХ-ын анхдугаар хуралдаан өнөөдөр болж, 45 суудлаас 34-ийг нь
авсан МАН өөрсдийн удирдлагуудаа сонгох үеэр Хотын даргын албан тушаалаа
хүлээлгэн өгч буй Э.Бат-Үүл дахин хэлье, дахин сануулья хэмээн тодотгож байгаад
сонгуулиар ялагдаад гудамжид гарчихсан байгаа хүмүүс, хөдөлгөөнүүд жагсана шүү
хэмээн Ардын намынхныг айлган сүрдүүлсэн, заналхийлсэн маягтай үгс хэлэв.

Э.Бат-Үүл
даргын Ардын намынханд хаягласан эдгээр үгсээс Ардын намынхныг сайн ажиллаарай,
муу ажиллавал хариуцлага тооцно шүү гэхээсээ илүүтэй айлган сүрдүүлсэн, заналхийлсэн
өнгө аяс ихээр мэдрэгдэж байв. Ардын нам 2017 оноос эхэлж төлж эхлэх энэ их өр
зээлээс үүдэлтэй төсвийн хүндрэлтэй байдлаас шалтгаалж маш хүнд нөхцөлд ажиллах
нь тодорхой байгаа. Үүнийг Э.Бат-Үүл ойлгож байгаагаа ч хэлсэн.

Гэхдээ
Э.Бат-Үүл дарга хууль ёсны дагуу, ард түмний сонголтоор байгуулагдсан Ардын
намын төлөөлөгчдийн бүрэлдэхүүнийг хууль бус гэж үзээд байгаа бололтой, эсвэл
хүлээн зөвшөөрч чадахгүй байгаа бололтой. Ардчилсан нам энэ удаагийн сонгуулиар
их дээрээс унасан. Өвдөлтийн шокноосоо одоо хүртэл гарч чадахгүй байгааг ард
түмэн болон эсрэг намынхан нь ойлгож байгаа. Гэхдээ энэ мэтээр өөрөөсөө өөр хүнийг
үл тоосон, юм хийж чадахгүй хэмээн бассан, ялагдлынхаа шалтгааныг бусдаас
эрсэн, өс санасан, хонзогносон байж болохгүй байх. Албан тушаалд арай л илүү шунаад
байх шиг. Нөгөө талаас их хүссэн хүнд төрийн жолоог бүү атгуул гэдэг эцэг
өвгөдийн сургаалийг ард түмэн биелүүлсэн ч юм шиг.

 

Төгс