Монгол улсад зохион байгуулагдаж буй сагсан бөмбөгийн 3х3 ДАШТ амжилттай үргэлжилж байна. Тэмцээний 18 хүртэлх насны охидын төрөлд оролцож буй манай баг өчигдөр хэсгийн сүүлийн тоглолтоо Голланд улстай хийж 11:10-ын харьцаатайгаар ялалт байгуулаа. Ингэснээр тэд дэлхийн аваргын тэмцээний анхны хожлоо авч байгаа юм.
Тэд өмнөх тоглолтоо Чехтэй хийж 14:13-ын харьцаатай ганцхан оноогоор хожигдож хэсгээс гарах боломжоо алдсан билээ.
Энэ удаагийн “FIBA 3×3 U18 World Cup 2019” тэмцээнд эрэгтэй, эмэгтэй тус бүр 20 баг өрсөлдсөн бөгөөд тэмцээний охидын багийн медальтнууд өнөөдөр тодорно.
Харин Монголын хөвгүүдийн баг “С” хэсэгт АНУ, Гүрж, Беларус, Латвийн багуудтай багтсан. Тэд эхний хоёр тоглолтод Латвийг 20:16-аар, Беларусыг 21:15-аар хожиж, үзэгчдээ томоохон бэлэг барьсан юм. Хэсгийн сүүлийн тоглолтоо өнөөдөр АНУ болон Гүрж улсын багтай хийх хуваарьтай байна. Өнөөдөр ийнхүү хэсгийн тоглолтоо хийж дуусгаснаар хэсгээс шалгарах хоёр баг тодрох юм. Одоогоор энэ хэсгийг АНУ, Монголын баг тус бүр хоёр хожилтойгоор тэргүүлж Гүрж нэг хожилтой удаалж байна. Харин Латви, Беларус хоёр хожигдолтойгоор хэсгийн сүүлд бичигдэж байна.
Монголын 18 хүртэлх насны хөвгүүдийн багт А.Батхуяг, Л.Авирмэд, Ө.Пэрэнлэйжамц, Ш.Энхийн-Од нар багтаж дасгалжуулагчаар С.Тулга тэргүүтэй дасгалжуулагчид ажиллаж байгаа юм.
Тэдний хувьд өнөөдөр 18:30 цагт Гүржтэй, 20:30 цагт АНУ-тай тоглох хуваарьтай байна.
